ਪੰਜਾਬ ਦੇ ਸਾਬਕਾ ਮੁੱਖ ਮੰਤਰੀ ਤੇ ਜਲੰਧਰ ਤੋਂ ਮੌਜੂਦਾ ਸਾਂਸਦ ਚਰਨਜੀਤ ਸਿੰਘ ਚੰਨੀ ਨਾਰਾਜ਼ ਹੋ ਗਏ ਹਨ ਤੇ ਉਨ੍ਹਾਂ ਨੂੰ ਹੋਰ ਵੀ ਕਈ ਸੀਨੀਅਰ ਆਗੂਆਂ ਦਾ ਸਾਥ ਮਿਲਿਆ।
ਪੰਜਾਬ ਵਿਧਾਨ ਸਭਾ ਚੋਣਾਂ 2027 ਨੂੰ ਕੁਝ ਹੀ ਮਹੀਨੇ ਬਾਕੀ ਹਨ, ਅਜਿਹੇ ‘ਚ ਪੰਜਾਬ ਦੇ ਕਈ ਦਿੱਗਜ ਕਾਂਗਰਸੀ ਆਗੂ ਮੁੱਖ ਮੰਤਰੀ ਬਣਨ ਦਾ ਸੁਪਨਾ ਦੇਖ ਰਹੇ ਹਨ। ਇਸ ਦੇ ਚਲਦੇ ਪੰਜਾਬ ਕਾਂਗਰਸ ਪ੍ਰਧਾਨ ਦਾ ਅਹੁਦੇ ‘ਤੇ ਵੀ ਸਭ ਦੀ ਨਜ਼ਰ ਸੀ।
ਹਾਲਾਂਕਿ, ਕਾਂਗਰਸ ਹਾਈਕਮਾਂਡ ਨੇ ਕਈ ਮੀਟਿੰਗਾਂ ਤੋਂ ਬਾਅਦ ਅਮਰਿੰਦਰ ਸਿੰਘ ਰਾਜਾ ਵੜਿੰਗ ਨੂੰ ਅਹੁਦੇ ‘ਤੇ ਬਰਕਰਾਰ ਰੱਖਣ ਦਾ ਫੈਸਲਾ ਕੀਤਾ, ਜਿਸ ਤੋਂ ਬਾਅਦ ਪ੍ਰਧਾਨਗੀ ਦੀ ਰੇਸ ਸਭ ਤੋਂ ਵੱਡੇ ਚਿਹਰਿਆਂ ‘ਚੋਂ ਚਰਨਜੀਤ ਸਿੰਘ ਚੰਨੀ ਨੇ ਬਾਗੀ ਰੁਖ਼ ਅਖ਼ਤਿਆਰ ਕਰ ਲਿਆ।
ਵੜਿੰਗ ਦੀ ਪ੍ਰਧਾਨਗੀ ਤੋਂ ਨਾਖੁਸ਼ ਚੰਨੀ
ਪੰਜਾਬ ਦੇ ਸਾਬਕਾ ਮੁੱਖ ਮੰਤਰੀ ਤੇ ਜਲੰਧਰ ਤੋਂ ਮੌਜੂਦਾ ਸਾਂਸਦ ਚਰਨਜੀਤ ਸਿੰਘ ਚੰਨੀ ਨਾਰਾਜ਼ ਹੋ ਗਏ ਹਨ ਤੇ ਉਨ੍ਹਾਂ ਨੂੰ ਹੋਰ ਵੀ ਕਈ ਸੀਨੀਅਰ ਆਗੂਆਂ ਦਾ ਸਾਥ ਮਿਲਿਆ।
ਚੰਨੀ ਧੜਾ ਵੜਿੰਗ ਨੂੰ ਪ੍ਰਧਾਨ ਵਜੋਂ ਦੇਖਣ ਲਈ ਤਿਆਰ ਨਹੀਂ ਹੈ ਤੇ ਉਨ੍ਹਾਂ ਵੱਲੋਂ ਪਾਰਟੀ ਨੂੰ ਪੁਨਰ ਵਿਚਾਰ ਕਰਨ ਦੀ ਸਲਾਹ ਦਿੱਤੀ ਗਈ ਹੈ। ਚੰਨੀ ਨੇ ਕਰੀਬ 65 ਆਗੂਆਂ ਨਾਲ ਬੀਤੀ ਦਿਨੀਂ ਆਪਣੀ ਰਿਹਾਇਸ਼ ‘ਤੇ ਮੀਟਿੰਗ ਕੀਤੀ ਸੀ।
ਦੂਜੇ ਪਾਸੇ, ਬੀਤੇ ਦਿਨ ਚੰਨੀ ਨੇ ਦੁਬਾਰਾ ਮੌਜੂਦਾ ਵਿਧਾਇਕਾਂ ਸਮੇਤ ਕਈ ਸੀਨੀਅਰ ਕਾਂਗਰਸੀ ਆਗੂਆਂ ਨਾਲ ਮੁਲਾਕਾਤ ਕੀਤੀ, ਜਿਸ ‘ਚ ਸਾਬਕਾ ਡਿਪਟੀ ਸੀਐਮ ਤੇ ਗੁਰਦਾਸਪੁਰ ਤੋਂ ਮੌਜੂਦ ਸਾਂਸਦ ਸੁਖਜਿੰਦਰ ਸਿੰਘ ਰੰਧਾਵਾ ਵੀ ਉਨ੍ਹਾਂ ਨਾਲ ਨਜ਼ਰ ਆਏ। ਰੰਧਾਵਾ ਵੀ ਪੰਜਾਬ ਕਾਂਗਰਸ ਪ੍ਰਧਾਨ ਦੀ ਰੇਸ ‘ਚ ਸਨ। ਉਹ ਵੀ ਗੱਲਾਂ-ਗੱਲਾਂ ‘ਚ ਚੰਨੀ ਦੇ ਸੁਰ ‘ਚ ਸੁਰ ਮਿਲਾਉਂਦੇ ਨਜ਼ਰ ਆ ਰਹੇ ਹਨ।
ਕਲੇਸ਼ ਵਿਚਕਾਰ ਪੰਜਾਬ ਕਾਂਗਰਸ ਇੰਚਾਰਜ ਦਾ ਚੰਡੀਗੜ੍ਹ ਦੌਰਾ
ਚੰਨੀ ਤੇ ਵੜਿੰਗ ਵਿਵਾਦ ਨੂੰ ਸੁਲਝਾਉਣ ਲਈ ਹਾਈਕਮਾਂਡ ਨੇ ਪੰਜਾਬ ਕਾਂਗਰਸ ਇੰਚਾਰਜ ਭੁਪੇਸ਼ ਬਘੇਲ ਨੂੰ ਬੀਤੇ ਦਿਨ ਚੰਡੀਗੜ੍ਹ ਭੇਜਿਆ। ਪਰ, ਇਸ ਵਿਚਕਾਰ ਚਰਨਜੀਤ ਚੰਨੀ ਤੇ ਸੁਖਜਿੰਦਰ ਰੰਧਾਵਾ ਨੇ ਉਨ੍ਹਾਂ ਨਾਲ ਮੁਲਾਕਾਤ ਨਹੀਂ ਕੀਤੀ।
ਸੂਤਰਾਂ ਮੁਤਾਬਕ, ਚੰਨੀ ਤੇ ਰੰਧਾਵਾ ਸਮੇਤ ਹੋਰ ਕਾਂਗਰਸੀ ਆਗੂ ਦਿੱਲੀ ਹਾਈਕਮਾਂਡ ਕੋਲ ਪਹੁੰਚੇ। ਬਘੇਲ ਚੰਡੀਗੜ੍ਹ ‘ਚ 5 ਦਿਨਾਂ ਲਈ ਰੁਕਣਗੇ। ਅਜਿਹੇ ‘ਚ ਚੰਨੀ ਧੜਾ ਅੱਜ, ਮੰਗਲਵਾਰ ਨੂੰ ਵੀ ਬਘੇਲ ਨਾਲ ਮੀਟਿੰਗ ਕਰਦਾ ਨਜ਼ਰ ਨਹੀਂ ਆਉਂਦਾ ਤਾਂ ਇਹ ਹਾਈਕਮਾਂਡ ਦੇ ਫੈਸਲੇ ਖਿਲਾਫ਼ ਇੱਕ ਤਰ੍ਹਾਂ ਦੇ ਬਿਗੁਲ ਵਾਂਗ ਹੋਵੇਗਾ।
ਹਾਈਕਮਾਂਡ ਨੂੰ ਝੁਕਾਉਣ ‘ਤੇ ਅੜਿਆ ਚੰਨੀ ਧੜਾ!
ਸੂਤਰਾਂ ਮੁਤਾਬਕ ਚੰਨੀ ਧੜਾ ਹਾਈਕਮਾਂਡ ਨੂੰ ਝੁਕਾਉਣ ‘ਤੇ ਅੜ ਗਿਆ ਹੈ। ਕਿਹਾ ਜਾ ਰਿਹਾ ਹੈ ਕਿ ਉਨ੍ਹਾਂ ਵੱਲੋਂ ਰਾਜਾ ਵੜਿੰਗ ਦੇ ਕਾਂਗਰਸ ਪ੍ਰਧਾਨ ਰਹਿਣ ਤੱਕ ਕਿਸੇ ਵੀ ਮੀਟਿੰਗ ‘ਚ ਨਾ ਜਾਣ ਦਾ ਫੈਸਲਾ ਲਿਆ ਗਿਆ ਹੈ। ਅੱਜ ਦਾ ਦਿਨ ਮੰਗਲਵਾਰ, 7 ਜੁਲਾਈ ਕਾਂਗਰਸ ਲਈ ਵੱਡਾ ਦਿਨ ਹੈ। ਚੰਨੀ ਦਾ ਬਾਗੀ ਧੜਾ ਜੇਕਰ ਅੱਜ ਬਘੇਲ ਨਾਲ ਮੀਟਿੰਗ ਨਹੀਂ ਕਰਦਾ ਤਾਂ ਇਹ ਪਾਰਟੀ ਹਾਈਕਮਾਂਡ ਦੀ ਨਿਖੇਧੀ ਹੋਵੇਗੀ ਤੇ ਕਾਂਗਰਸ ਦੀ ਕਿਰਕਿਰੀ ਹੋਵੇਗੀ।
