ਮਾਛੀਵਾੜਾ (ਵੀਓਪੀ ਬਿਊਰੋ) ਨਸ਼ੇ ਦੀ ਲਤ ਇਨਸਾਨ ਨੂੰ ਇਸ ਹੱਦ ਤੱਕ ਲੈ ਜਾਂਦੀ ਹੈ ਕਿ ਉਹ ਆਪਣੇ ਹੀ ਪਰਿਵਾਰ ਦਾ ਭਰੋਸਾ ਤੋੜਣ ਤੋਂ ਵੀ ਨਹੀਂ ਹਿਚਕਚਾਉਂਦਾ। ਅਜਿਹਾ ਹੀ ਇੱਕ ਹੈਰਾਨ ਕਰਨ ਵਾਲਾ ਮਾਮਲਾ ਮਾਛੀਵਾੜਾ ਨੇੜਲੇ ਪਿੰਡ ਗੁਰੂਗੜ੍ਹ ਤੋਂ ਸਾਹਮਣੇ ਆਇਆ ਹੈ, ਜਿੱਥੇ ਇੱਕ ਨੌਜਵਾਨ ਨੇ ਨਸ਼ੇ ਦੀ ਪੂਰਤੀ ਲਈ ਆਪਣੀ ਹੀ ਦਾਦੀ ਨੂੰ ਬੇਹੋਸ਼ ਕਰਕੇ ਉਸਦੇ ਵਿਆਹ ਸਮੇਂ ਦੇ ਸੋਨੇ ਦੇ ਗਹਿਣੇ ਚੋਰੀ ਕਰ ਲਏ।
ਪੀੜਤ ਬਜ਼ੁਰਗ ਮਹਿਲਾ ਦੇ ਪੁੱਤਰ ਸ਼ਿੰਗਾਰਾ ਸਿੰਘ ਨੇ ਪੁਲਸ ਨੂੰ ਦਿੱਤੀ ਸ਼ਿਕਾਇਤ ਵਿੱਚ ਦੱਸਿਆ ਕਿ ਉਹ ਆਪਣੀ ਮਾਤਾ ਰਣਜੀਤ ਕੌਰ ਅਤੇ ਪਰਿਵਾਰ ਨਾਲ ਘਰ ਵਿੱਚ ਰਹਿੰਦਾ ਹੈ। ਉਸਦਾ ਭਤੀਜਾ ਤੇਜਵੰਤ ਸਿੰਘ ਰਾਤ ਸਮੇਂ ਘਰ ਆਇਆ ਅਤੇ ਆਪਣੀ ਦਾਦੀ ਨੂੰ ਚਾਹ ਪੀਣ ਲਈ ਦਿੱਤੀ। ਰਣਜੀਤ ਕੌਰ ਨੇ ਚਾਹ ਦੇ ਕੁਝ ਹੀ ਘੁੱਟ ਪੀਤੇ ਤਾਂ ਚਾਹ ਦਾ ਸੁਆਦ ਕੌੜਾ ਲੱਗਣ ਕਾਰਨ ਗਿਲਾਸ ਹੇਠਾਂ ਰੱਖ ਦਿੱਤਾ। ਕੁਝ ਸਮੇਂ ਬਾਅਦ ਉਹ ਬੇਹੋਸ਼ ਹੋ ਗਈ।
ਇਸ ਦਾ ਫਾਇਦਾ ਚੁੱਕਦਿਆਂ ਤੇਜਵੰਤ ਸਿੰਘ ਨੇ ਘਰ ਵਿੱਚ ਰੱਖੀ ਤਾਲਾਬੰਦ ਢੋਲੀ ਦਾ ਤਾਲਾ ਤੋੜ ਦਿੱਤਾ। ਉਸ ਢੋਲੀ ਵਿੱਚ ਰਣਜੀਤ ਕੌਰ ਨੇ ਆਪਣੇ ਵਿਆਹ ਸਮੇਂ ਦੇ ਕੀਮਤੀ ਸੋਨੇ ਦੇ ਗਹਿਣੇ ਸੰਭਾਲ ਕੇ ਰੱਖੇ ਹੋਏ ਸਨ। ਮੁਲਜ਼ਮ ਗਹਿਣੇ ਚੋਰੀ ਕਰਕੇ ਮੌਕੇ ਤੋਂ ਫਰਾਰ ਹੋ ਗਿਆ।
ਸਵੇਰੇ ਜਦੋਂ ਰਣਜੀਤ ਕੌਰ ਨੂੰ ਹੋਸ਼ ਆਇਆ ਤਾਂ ਘਰ ਦਾ ਸਮਾਨ ਖਿੱਲਰਿਆ ਹੋਇਆ ਸੀ ਅਤੇ ਢੋਲੀ ਵਿੱਚੋਂ ਸਾਰੇ ਸੋਨੇ ਦੇ ਗਹਿਣੇ ਗਾਇਬ ਸਨ। ਇਸ ਤੋਂ ਬਾਅਦ ਪਰਿਵਾਰ ਵੱਲੋਂ ਪੁਲਸ ਨੂੰ ਸੂਚਿਤ ਕੀਤਾ ਗਿਆ।
