ਨਹੀਂ ਸੀ ਲਾਇਸੈਂਸ ਤੇ ਹੈਲਮੇਟ, ਨਾਕਾ ਵੇਖ ਭੱਜਾ ਤਾਂ ਏਐਸਆਈ ਨੇ ਮਾਰ’ਤੀ ਗੋਲ਼ੀ, ਰੀੜ੍ਹ ਦੀ ਹੱਡੀ ਵਿਚ ਫਸੀ,
ਵੀਓਪੀ ਬਿਊਰੋ, ਨੈਸ਼ਨਲ- ਚੈਕਿੰਗ ਦੌਰਾਨ ਪੁਲਿਸ ਵੱਲੋਂ ਰੋਕਣ ਉਤੇ ਬਿਨਾਂ ਹੈਲਮੇਟ ਪਾਏ ਮੋਟਰਸਾਈਕਲ ਚਲਾਉਂਦੇ ਨੌਜਵਾਨ ਨੂੰ ਭਜਣਾ ਮਹਿੰਗਾ ਪੈ ਗਿਆ। ਨਾਕੇ ਉਤੇ ਮੌਜੂਦ ਇਕ ਏਐਸਆਈ ਨੇ ਉਕਤ ਮੋਟਰਸਾਈਕਲ ਸਵਾਰ ਨੌਜਵਾਨ ਨੂੰ ਪਿੱਛੋਂ ਗੋਲ਼ੀ ਮਾਰ ਦਿੱਤੀ। ਜ਼ਖ਼ਮੀ ਨੌਜਵਾਨ ਦੀ ਹਾਲਤ ਗੰਭੀਰ ਦੱਸੀ ਜਾ ਰਹੀ ਹੈ। ਉਧਰ, ਪੁਲਿਸ ਨੇ ਉਕਤ ਏਐਸਆਈ ਨੂੰ ਗ੍ਰਿਫਤਾਰ ਕਰ ਲਿਆ ਹੈ।
ਮਾਮਲਾ ਜਹਾਨਾਬਾਦ ਦਾ ਹੈ, ਜਦਕਿ ਪੀੜਤ ਨੌਜਵਾਨ ਸੁਧੀਰ ਨਾਲੰਦਾ ਜ਼ਿਲ੍ਹੇ ਦੇ ਪਿੰਡ ਕੋਰਥੂ ਦਾ ਰਹਿਣ ਵਾਲਾ ਹੈ। ਪਿਤਾ ਰਵਿੰਦਰ ਯਾਦਵ ਨੇ ਦੱਸਿਆ ਕਿ ਉਹ ਬੀਏ ਸੈਕੰਡ ਈਅਰ ਦਾ ਵਿਦਿਆਰਥੀ ਹੈ ਅਤੇ ਪਿਛਲੇ ਸਾਲ ਹੀ ਉਸ ਦਾ ਵਿਆਹ ਹੋਇਆ ਸੀ। ਉਹ ਇਕਲੌਤਾ ਪੁੱਤਰ ਹੈ। ਉਸ ਦੀਆਂ ਤਿੰਨ ਭੈਣਾਂ ਹਨ। ਗੋਲੀ ਮਾਰਨ ਵਾਲੇ ਏਐਸਆਈ ਦਾ ਨਾਂ ਮੁਮਤਾਜ਼ ਅਹਿਮਦ ਹੈ। ਹਾਲਾਂਕਿ ਪਿਤਾ ਨੇ ਪਹਿਲਾਂ ਐੱਸਐੱਚਓ ਚੰਦਰਹਾਸ ਕੁਮਾਰ ਉਤੇ ਗੋਲੀ ਚਲਾਉਣ ਦਾ ਦੋਸ਼ ਲਾਇਆ ਸੀ।
ਪਿਤਾ ਨੇ ਕਿਹਾ ਕਿ ਚੰਦਰਹਾਸ ਕੁਮਾਰ ਪਿੰਡ ਅਨੰਤਪੁਰ ਨੇੜੇ ਵਾਹਨਾਂ ਦੀ ਜਾਂਚ ਕਰ ਰਿਹਾ ਸੀ। ਇਸੇ ਦੌਰਾਨ ਉਸ ਦਾ ਪੁੱਤਰ ਸੁਧੀਰ ਉਥੋਂ ਬਾਈਕ ਉਤੇ ਜਾ ਰਿਹਾ ਸੀ। ਹੈਲਮੇਟ ਅਤੇ ਡਰਾਈਵਿੰਗ ਲਾਇਸੈਂਸ ਨਾ ਹੋਣ ਕਾਰਨ ਉਹ ਪੁਲਿਸ ਨੂੰ ਦੇਖ ਕੇ ਭੱਜਣ ਲੱਗਾ। ਸੁਧੀਰ ਨੂੰ ਭੱਜਦਾ ਦੇਖ ਕੇ ਪੁਲਿਸ ਨੇ ਉਸ ਦਾ ਪਿੱਛਾ ਕੀਤਾ ਅਤੇ ਜਦੋਂ ਉਹ ਨਾ ਰੁਕਿਆ ਤਾਂ ਪੁਲਿਸ ਨੇ ਉਸ ਨੂੰ ਗੋਲੀ ਮਾਰ ਦਿੱਤੀ। ਗੋਲੀ ਛਾਤੀ ਵਿੱਚ ਲੱਗੀ ਅਤੇ ਰੀੜ੍ਹ ਦੀ ਹੱਡੀ ਵਿੱਚ ਫਸ ਗਈ।
ਗੋਲੀ ਲੱਗਣ ਤੋਂ ਬਾਅਦ ਵੀ ਸੁਧੀਰ ਨਹੀਂ ਰੁਕਿਆ। ਉਹ ਕਰੀਬ 2 ਕਿਲੋਮੀਟਰ ਤਕ ਬਾਈਕ ‘ਤੇ ਗਿਆ ਅਤੇ ਆਪਣੇ ਪਿੰਡ ਨੇੜੇ ਡਿੱਗ ਪਿਆ। ਜਦੋਂ ਲੋਕਾਂ ਨੇ ਉਸ ਨੂੰ ਦੇਖਿਆ ਤਾਂ ਉਸ ਨੂੰ ਹਸਪਤਾਲ ਦਾਖਲ ਕਰਵਾਇਆ ਗਿਆ।
ਡਾਕਟਰ ਰਜਨੀਸ਼ ਅਨੁਸਾਰ ਉਸ ਦੀ ਹਾਲਤ ਨਾਜ਼ੁਕ ਬਣੀ ਹੋਈ ਹੈ। ਗੋਲੀ ਚਲਾਈ ਗਈ ਹੈ। ਨੌਜਵਾਨਾਂ ਲਈ 72 ਘੰਟੇ ਨਾਜ਼ੁਕ ਹਨ। ਇੱਥੇ ਜਹਾਨਾਬਾਦ ਦੇ ਐਸਪੀ ਦੀਪਕ ਰੰਜਨ ਨੇ ਦੱਸਿਆ ਕਿ ਮਾਮਲੇ ਦੀ ਜਾਂਚ ਲਈ ਇੱਕ ਟੀਮ ਬਣਾਈ ਗਈ ਹੈ। ਰਿਪੋਰਟ ਆਉਣ ਤੋਂ ਬਾਅਦ ਅਗਲੀ ਕਾਰਵਾਈ ਕੀਤੀ ਜਾਵੇਗੀ। ਗੋਲੀ ਚਲਾਉਣ ਵਾਲੇ ਏਐਸਆਈ ਮੁਮਤਾਜ਼ ਅਹਿਮਦ ਨੂੰ ਪੁਲਿਸ ਨੇ ਗ੍ਰਿਫ਼ਤਾਰ ਕਰ ਲਿਆ ਹੈ। ਉਸ ਖਿਲਾਫ ਕਤਲ ਦੀ ਕੋਸ਼ਿਸ਼ ਦਾ ਮਾਮਲਾ ਦਰਜ ਕੀਤਾ ਗਿਆ ਹੈ। ਉਸ ਨੂੰ ਅਦਾਲਤ ਵਿਚ ਪੇਸ਼ ਕਰਨ ਦੀ ਤਿਆਰੀ ਕੀਤੀ ਜਾ ਰਹੀ ਹੈ।
ਐਸਪੀ ਦੀਪਕ ਰੰਜਨ ਨੇ ਪੂਰੀ ਚੈਕਿੰਗ ਟੀਮ ਨੂੰ ਸਸਪੈਂਡ ਕਰ ਦਿੱਤਾ ਹੈ। ਇਸ ਟੀਮ ਵਿੱਚ ਓਪੀ ਪ੍ਰਧਾਨ, ਏਐਸਆਈ ਭੀਮ ਕੁਮਾਰ, ਕਾਂਸਟੇਬਲ ਵਿਨੈ ਕੁਮਾਰ ਅਤੇ ਕਾਂਸਟੇਬਲ ਕੁਮਾਰ ਮਹੇਸ਼ ਸ਼ਾਮਲ ਹਨ।
