ਗੁਆਂਢੀ ਦੀ ਸ਼ਿਕਾਇਤ ਲੈ ਕੇ ਥਾਣੇ ਗਈ ਔਰਤ ਨੂੰ ਏਐਸਆਈ ਨੇ ਮਾਰੇ ਥੱਪੜ
ਵੀਓਪੀ ਬਿਊਰੋ, ਲੁਧਿਆਣਾ-ਗੁਆਂਡੀ ਦੀ ਸ਼ਿਕਾਇਤ ਲੈ ਕੇ ਥਾਣੇ ਗਏ ਔਰਤ ਦੀ ਹੀ ਏਐਸਆਈ ਵੱਲੋਂ ਖਾਤਰਦਾਰੀ ਕਰ ਦਿੱਤੀ ਗਈ। ਗੁੱਸੇ ਵਿਚ ਆਏ ਏਐਸਆਈ ਨੇ ਔਰਤ ਦੇ ਥੱਪੜ ਜੜ੍ਹ ਦਿੱਤੇ। ਔਰਤ ਨੇ ਇਸ ਮਾਮਲੇ ਵਿਚ ਉਚ ਅਧਿਕਾਰੀਆਂ ਕੋਲੋਂ ਉਕਤ ਏਐਸਆਈ ਖਿ਼ਲਾਫ਼ ਕਾਰਵਾਈ ਦੀ ਮੰਗ ਕੀਤੀ ਹੈ।
ਜਾਣਕਾਰੀ ਅਨੁਸਾਰ ਲੁਧਿਆਣੇ ਦੀ ਈਡਬਲਯੂ ਕਾਲੋਨੀ ਵਾਸੀ ਸੁਨੀਤਾ ਗੁਆਂਢੀਆਂ ਵੱਲੋਂ ਰੋਜ਼ਾਨਾ ਉਚੀ ਆਵਾਜ਼ ਵਿਚ ਗਾਣੇ ਵਜਾਉਣ ਤੋਂ ਪਰੇਸ਼ਾਨ ਸੀ।
ਬੀਤੀ ਸਵੇਰ ਜਦੋਂ ਉਸ ਨੇ ਗੁਆਂਢੀ ਨੂੰ ਆਵਾਜ਼ ਘੱਟ ਕਰਨ ਲਈ ਕਿਹਾ ਤਾਂ ਉਨ੍ਹਾਂ ਨੇ ਝਗੜਾ ਕਰਨਾ ਸ਼ੁਰੂ ਕਰ ਦਿੱਤਾ। ਦੋਵੇਂ ਧਿਰਾਂ ਥਾਣਾ ਡਵੀਜ਼ਨ ਨੰ. 7 ਵਿਚ ਪੁੱਜੀਆਂ। ਗੁਆਂਢੀ ਪੁਲਿਸ ਮੁਲਾਜ਼ਮਾਂ ਸਾਹਮਣੇ ਹੀ ਸੁਨੀਤਾ ਨੂੰ ਮਾੜਾ ਬੋਲਣ ਲੱਗਾ। ਸੁਨੀਤਾ ਨੇ ਦੋਸ਼ ਲਾਇਆ ਕਿ ਉਸ ਨੇ ਏਐਸਆਈ ਨੂੰ ਕਿਹਾ ਕਿ ਉਨ੍ਹਾਂ ਸਾਹਮਣੇ ਹੀ ਗੁਆਂਢੀ ਉਸ ਨੂੰ ਮਾੜਾ ਬੋਲ ਰਿਹਾ ਹੈ।
ਸੁਨੀਤਾ ਨੇ ਮੋਬਾਈਲ ਕੱਢ ਕੇ ਵੀਡੀਓ ਰਿਕਾਰਡਿੰਗ ਕਰਨੀ ਸ਼ੁਰੂ ਕਰ ਦਿੱਤੀ। ਇਹ ਵੇਖ ਗੁੱਸੇ ਵਿਚ ਆਏ ਏਐਸਆਈ ਨੇ ਸੁਨੀਤਾ ਦੇ ਥੱਪੜ ਮਾਰ ਦਿੱਤੇ ਤੇ ਮੋਬਾਈਲ ਖੋਹ ਲਿਆ। ਸੁਨੀਤਾ ਨੇ ਉਚ ਅਧਿਕਾਰੀਆਂ ਕੋਲੋਂ ਮੰਗ ਕੀਤੀ ਕਿ ਥਾਣੇ ਵਿਚ ਉਸ ਨੂੰ ਥੱਪੜ ਮਾਰਨ ਵਾਲੇ ਖਿਲਾਫ ਕਾਰਵਾਈ ਕੀਤੀ ਜਾਵੇ।
