ਜਲੰਧਰ ਵਿਚ ਵੱਡੀ ਵਾਰਦਾਤ! ਦੁਕਾਨਦਾਰ ਤੇ ਗਾਹਕ ਦਾ ਝਗੜਾ ਛੁਡਾਉਣ ਗਏ ਸੁਨਿਆਰਾ ਐਸੋਸੀਏਸ਼ਨ ਦੇ ਪ੍ਰਧਾਨ ਨੂੰ ਥਿਨਰ ਸੁੱਟ ਕੇ ਲਾ’ਤੀ ਅੱਗ
ਵੀਓਪੀ ਬਿਊਰੋ, ਜਲੰਧਰ : ਸਰਾਫਾ ਬਾਜ਼ਾਰ ਵਿਚ ਉਸ ਵੇਲੇ ਹੰਗਾਮਾ ਹੋ ਗਿਆ ਜਦੋਂ ਸੁਨਿਆਰਾ ਐਸੋਸੀਏਸ਼ਨ ਦੇ ਪ੍ਰਧਾਨ ਨੂੰ ਇੱਕ ਦੁਕਾਨਦਾਰ ਨੇ ਥਿਨਰ ਪਾ ਕੇ ਅੱਗ ਲਾ ਦਿੱਤੀ। ਉਹ ਦੁਕਾਨਦਾਰ ਅਤੇ ਗਾਹਕ ਵਿਚਾਲੇ ਹੋਏ ਵਿਵਾਦ ਨੂੰ ਸੁਲਝਾਉਣ ਲਈ ਗਏ ਸਨ।
ਜਾਣਕਾਰੀ ਅਨੁਸਾਰ ਸੁਨਿਆਰਾ ਬਾਜ਼ਾਰ ਵਿਚ ਸਥਿਤ ਇਕ ਦੁਕਾਨਦਾਰ ਅਤੇ ਗਾਹਕ ਵਿਚਾਲੇ 400 ਮਿਲੀ ਗ੍ਰਾਮ ਪੰਦਰਾਂ ਸੌ ਰੁਪਏ ਦੇ ਸੋਨੇ ਨੂੰ ਲੈ ਕੇ ਵਿਵਾਦ ਹੋ ਗਿਆ ਸੀ, ਜਿਸ ਨੂੰ ਸੁਲਝਾਉਣ ਲਈ ਐਸੋਸੀਏਸ਼ਨ ਦੇ ਪ੍ਰਧਾਨ ਜੱਜ ਮੌਕੇ ਉਤੇ ਪਹੁੰਚੇ ਤਾਂ ਦੁਕਾਨਦਾਰ ਵੱਲੋਂ ਵਿਵਾਦ ਦੌਰਾਨ ਥਿਨਰ ਦੀ ਬੋਤਲ ਖੋਲ੍ਹ ਕੇ ਸਾਰਿਆਂ ਉੱਤੇ ਛਿੜਕ ਦਿੱਤੀ, ਇਸ ਤੋਂ ਬਾਅਦ ਸਾਰਿਆਂ ਨੂੰ ਡਰਾਉਣ ਲਈ ਜਿਵੇਂ ਹੀ ਉਸ ਨੇ ਲਾਈਟਰ ਜਗਾਇਆ ਅੱਗ ਭੜਕ ਉੱਠੀ ਅਤੇ ਜਿਸ ਨਾਲ ਜੱਜ ਪ੍ਰਧਾਨ ਬੁਰੀ ਤਰ੍ਹਾਂ ਝੁਲਸ ਗਿਆ । ਇਸ ਤੋਂ ਇਲਾਵਾ ਦੁਕਾਨਦਾਰ ਅਤੇ ਹੋਰ ਲੋਕ ਵੀ ਕੁਝ ਝੁਲਸ ਗਏ।
ਜੱਜ ਪ੍ਰਧਾਨ ਨੂੰ ਨਿੱਜੀ ਹਸਪਤਾਲ ਵਿਚ ਦਾਖਲ ਕਰਵਾਇਆ ਗਿਆ ਹੈ। ਘਟਨਾ ਦੀ ਸੂਚਨਾ ਮਿਲਦਿਆਂ ਹੀ ਪੁਲਿਸ ਨੇ ਮੌਕੇ ਉਤੇ ਪਹੁੰਚ ਕੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।
