ਬੁਲਟ ਉਤੇ ਆਏ ਮੁਲਜ਼ਮ ਨੇ ਕੰਟਰੈਕਟ ਕੰਪਨੀ ਦੇ ਮਾਲਕ ਨੂੰ ਮਾਰੀਆਂ ਪੰਜ ਗੋਲ਼ੀਆਂ, ਦੋ ਸਿਰ ਵਿਚ ਵੱਜੀਆਂ, ਵਾਰਦਾਤ ਅੱਖੀਂ ਵੇਖਣ ਵਾਲਿਆਂ ਦੇ ਉਡ ਗਏ ਹੋਸ਼
ਵੀਓਪੀ ਬਿਊਰੋ, ਪਟਿਆਲਾ : ਨਾਭਾ ਰੋਡ ‘ਤੇ ਯਾਦਵਿੰਦਰਾ ਇਨਕਲੇਵ ਦੀ ਮਾਰਕੀਟ ‘ਚ ਮੋਟਰਸਾਈਕਲ ਸਵਾਰ ਨੇ ਕੰਟਰੈਕਟ ਕੰਪਨੀ ਦੇ ਮਾਲਕ ‘ਤੇ ਗੋਲ਼ੀਆਂ ਚਲਾ ਦਿੱਤੀਆਂ। ਹਮਲਾਵਰ ਮੌਕੇ ਤੋਂ ਫ਼ਰਾਰ ਹੋ ਗਏ ਤੇ ਜ਼ਖ਼ਮੀ ਹਾਲਤ ਵਿੱਚ ਕੰਪਨੀ ਮਾਲਕ ਨੂੰ ਸਰਕਾਰੀ ਰਾਜਿੰਦਰਾ ਹਸਪਤਾਲ ਚ ਦਾਖਲ ਕਰਵਾਇਆ ਗਿਆ ਜਿੱਥੇ ਉਸ ਦੀ ਮੌਤ ਹੋ ਗਈ ਹੈ। ਕੰਪਨੀ ਮਾਲਕ ਦੀ ਪਛਾਣ ਦਰਸ਼ਨ ਸਿੰਗਲਾ ਵਾਸੀ ਸੁਨਾਮ ਵਜੋਂ ਹੋਈ ਹੈ। ਪੁਲਿਸ ਨੇ ਮੌਕੇ ‘ਤੇ ਪੁੱਜ ਕੇ ਮਾਮਲੇ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।
ਮੌਕੇ ‘ਤੇ ਮੌਜੂਦ ਲੋਕਾਂ ਅਨੁਸਾਰ ਸਵੇਰੇ ਕਰੀਬ ਪੌਣੇ ਦਸ ਵਜੇ ਦਰਸ਼ਨ ‘ਤੇ ਇਕ ਬੁਲਟ ਸਵਾਰ ਵਿਅਕਤੀ ਵੱਲੋਂ ਧੜਾਧੜ ਗੋਲੀਆਂ ਚਲਾਈਆਂ ਗਈਆਂ। ਇਹ ਮੰਜ਼ਰ ਵੇਖ ਉਨ੍ਹਾਂ ਦੇ ਰੌਂਗਟੇ ਖੜ੍ਹੇ ਹੋ ਗਏ। ਕੰਟਰੈਕਟ ਕੰਪਨੀ ਦੇ ਮਾਲਕ ਦੇ ਦੋ ਗੋਲ਼ੀਆਂ ਸਿਰ, ਦੋ ਪਿੱਠ ਤੇ ਇਕ ਵੱਖੀ ‘ਚ ਲੱਗੀ ਹੈ। ਮ੍ਰਿਤਕ ਦੀ ਉਮਰ 55 ਸਾਲ ਦੇ ਕਰੀਬ ਦੱਸੀ ਜਾ ਰਹੀ ਹੈ। ਠੇਕੇਦਾਰ ਦਰਸ਼ਨ ਕੁਮਾਰ ਵੱਡਾ ਕੰਟਰੈਕਟਰ ਹੈ ਜੋ ਪੰਜਾਬ ਭਰ ‘ਚ ਸਰਕਾਰੀ ਮਹਿਕਮਿਆਂ ਵਿਚ ਠੇਕੇ ‘ਤੇ ਮੁਲਾਜ਼ਮ ਮੁਹੱਈਆ ਕਰਵਉਣ ਦਾ ਕੰਮ ਕਰਦਾ ਹੈ। ਇਸ ਵਾਰਦਾਤ ਨਾਲ ਸ਼ਹਿਰ ਵਿਚ ਦਹਿਸ਼ਤ ਦਾ ਮਾਹੌਲ ਹੈ।
