ਸ਼ਹਿਰ ‘ਚ ਆਇਆ ‘ਨੰਗਾ ਚੋਰ’, ਮੂੰਹ ‘ਚ ਟਾਰਚ ਪਾ ਕੇ 4 ਦੁਕਾਨਾਂ ‘ਚ ਵੜਿਆ ਤੇ ਕੱਢ ਕੇ ਲੈ ਗਿਆ ਨਕਦੀ, ਘਟਨਾ ਸੀਸੀਟੀਵੀ ‘ਚ ਕੈਦ
ਵੀਓਪੀ ਬਿਊਰੋ – ਪੰਜਾਬ ਦੇ ਫਰੀਦਕੋਟ ‘ਚ ਨੰਗੇ ਚੋਰ ਨੇ 4 ਦੁਕਾਨਾਂ ਨੂੰ ਨਿਸ਼ਾਨਾ ਬਨਾਉਂਦੇ ਹੋਏ ਮੂੰਹ ‘ਚ ਟਾਰਚ ਰੱਖ ਕੇ 2 ਦੁਕਾਨਾਂ ‘ਚੋਂ ਨਕਦੀ ਚੋਰੀ ਕਰ ਲਈ, ਜਦਕਿ 2 ਦੁਕਾਨਾਂ ‘ਚੋਂ ਕੁਝ ਵੀ ਚੋਰੀ ਨਹੀਂ ਕੀਤਾ। ਚੋਰ ਦੁਕਾਨ ਦੇ ਅੰਦਰ ਦਾਖਲ ਹੋਣ ਤੋਂ ਪਹਿਲਾਂ ਬਾਹਰ ਲੱਗੇ ਸੀਸੀਟੀਵੀ ਕੈਮਰੇ ਅਤੇ ਦੁਕਾਨ ਦੇ ਅੰਦਰ ਲੱਗੀ ਐਲ.ਈ.ਡੀ. ਨੂੰ ਤੋੜ ਦਿੰਦਾ ਸੀ।
ਘਟਨਾ ਸਾਦਿਕ ਕਸਬੇ ਦੀ ਹੈ। ਦੇਰ ਰਾਤ ਇੱਕ ਚੋਰ ਬਿਨਾਂ ਕੱਪੜਿਆਂ ਦੇ ਦੁਕਾਨਾਂ ਵਿੱਚ ਦਾਖਲ ਹੋ ਗਿਆ। ਪਹਿਲਾਂ ਉਹ 2 ਦੁਕਾਨਾਂ ‘ਤੇ ਗਿਆ ਜਿੱਥੇ ਉਸ ਨੇ ਕੁਝ ਵੀ ਚੋਰੀ ਨਹੀਂ ਕੀਤਾ। ਉਹ ਸਮਾਨ ਵਿਚ ਹੱਥ ਮਾਰ ਕੇ ਹੀ ਉਥੋਂ ਚਲਾ ਗਿਆ। ਇਸ ਤੋਂ ਬਾਅਦ ਉਹ ਹੋਰ 2 ਦੁਕਾਨਾਂ ‘ਤੇ ਗਿਆ ਅਤੇ ਮੂੰਹ ਵਿੱਚ ਟਾਰਚ ਲੈ ਕੇ ਗਲੇ ਵਿੱਚੋਂ ਨਕਦੀ ਕੱਢ ਲਈ।
ਉਸ ਨੇ ਦੁਕਾਨਾਂ ਵਿੱਚ ਲੱਗੇ ਸੀਸੀਟੀਵੀ ਅਤੇ ਐਲ.ਈ.ਡੀ ਵੀ ਤੋੜ ਦਿੱਤੇ। ਇਸ ਦੇ ਬਾਵਜੂਦ ਉਹ ਕੈਮਰੇ ‘ਚ ਕੈਦ ਹੋ ਗਿਆ। ਸਾਰੀ ਦੁਕਾਨ ਦੀ ਤਲਾਸ਼ੀ ਲੈਣ ਤੋਂ ਬਾਅਦ ਉਹ ਉਥੋਂ ਚਲਾ ਗਿਆ। ਅਜੇ ਤੱਕ ਇਹ ਪਤਾ ਨਹੀਂ ਲੱਗ ਸਕਿਆ ਹੈ ਕਿ ਚੋਰ ਕੌਣ ਹੈ ਅਤੇ ਉਸ ਨੇ ਕੱਪੜੇ ਕਿਉਂ ਨਹੀਂ ਪਾਏ ਹੋਏ ਸਨ। ਦੁਕਾਨਦਾਰਾਂ ਨੇ ਮਾਮਲੇ ਦੀ ਸ਼ਿਕਾਇਤ ਸਾਦਿਕ ਪੁਲਿਸ ਨੂੰ ਦੇ ਦਿੱਤੀ ਹੈ।
