ਬਾਈਕ ਉਤੇ ਜਾਂਦੇ ਤਿੰਨ ਕੁੜੀਆਂ ਤੇ ਇਕ ਪੁੱਤ ਦੇ ਪਿਤਾ ਅੱਗੇ ਆਇਆ ਆਵਾਰਾ ਪਸ਼ੂ, ਫਿਰ ਵਾਪਰਿਆ ਦਰਦਨਾਕ ਭਾਣਾ
ਵੀਓਪੀ ਬਿਊਰੋ, ਭਵਾਨੀਗੜ੍ਹ : ਸ਼ੁੱਕਰਵਾਰ ਸਵੇਰੇ ਪਿੰਡ ਬਲਿਆਲ ਸੂਏ ਨੇੜੇ ਦਰਦਨਾਕ ਹਾਦਸਾ ਵਾਪਰਿਆ। ਜਿਸ ਵਿਚ ਮੋਟਰਸਾਈਕਲ ਸਵਾਰ ਵਿਅਕਤੀ ਦੀ ਮੌਤ ਹੋ ਗਈ। ਜਾਣਕਾਰੀ ਮੁਤਾਬਕ ਮ੍ਰਿਤਕ 3 ਕੁੜੀਆਂ ਤੇ ਇੱਕ ਮੁੰਡੇ ਦਾ ਪਿਤਾ ਸੀ। ਹਾਦਸੇ ਸਬੰਧੀ ਨੀਟੂ ਸਿੰਘ ਵਾਸੀ ਬਲਿਆਲ ਰੋਡ ਨੇ ਦੱਸਿਆ ਕਿ ਉਸਦਾ ਚਾਚਾ ਜਸਵੀਰ ਸਿੰਘ (42) ਪੁੱਤਰ ਬਘੇਲ ਸਿੰਘ ਵਾਸੀ ਪਿੰਡ ਬਾਸੀਅਰਕ ਅੱਜ ਸਵੇਰੇ ਮੋਟਰਸਾਈਕਲ ‘ਤੇ ਪਿੰਡ ਤੋਂ ਭਵਾਨੀਗੜ੍ਹ ਵੱਲ ਨੂੰ ਆ ਰਿਹਾ ਸੀ। ਬਲਿਆਲ ਲਿੰਕ ਰੋਡ ‘ਤੇ ਸੂਏ ਕੋਲ ਮੋਟਰਸਾਈਕਲ ਅੱਗੇ ਇੱਕ ਬੇਸਹਾਰਾ ਪਸ਼ੂ ਆ ਗਿਆ ਜਿਸ ਨਾਲ ਟਕਰਾ ਕੇ ਜਸਵੀਰ ਸਿੰਘ ਸੜਕ ‘ਤੇ ਜਾ ਡਿੱਗਿਆ।
ਇਸ ਦੌਰਾਨ ਉਹ ਭਵਾਨੀਗੜ੍ਹ ਤੋਂ ਭੱਟੀਵਾਲ ਨੂੰ ਅਧਿਆਪਕਾਂ ਨੂੰ ਛੱਡਣ ਜਾ ਰਹੀ ਟਵੇਰਾ ਗੱਡੀ ਹੇਠ ਆ ਗਿਆ। ਨੀਟੂ ਸਿੰਘ ਨੇ ਦੱਸਿਆ ਕਿ ਘਟਨਾ ਉਪਰੰਤ ਰਾਹਗੀਰਾਂ ਵੱਲੋਂ ਜਲਦ ਹੀ ਗੰਭੀਰ ਜ਼ਖ਼ਮੀ ਹੋਏ ਉਸਦੇ ਚਾਚਾ ਜਸਵੀਰ ਸਿੰਘ ਨੂੰ ਭਵਾਨੀਗੜ੍ਹ ਦੇ ਸਰਕਾਰੀ ਹਸਪਤਾਲ ਵਿਖੇ ਭਰਤੀ ਕਰਵਾਇਆ ਜਿੱਥੇ ਉਸਦੀ ਮੌਤ ਹੋ ਗਈ।
