ਸਾਬਕਾ ਪ੍ਰਧਾਨ ਮੰਤਰੀ ਨੇ ਆਪਣੇ ਤੋਂ 53 ਸਾਲ ਛੋਟੀ ਪ੍ਰੇਮਿਕਾ ਲਈ ਛੱਡੀ 9 ਅਰਬ ਰੁਪਏ ਦੀ ਜਾਇਦਾਦ
ਰੋਮ- ਪਿਆਰ ਵਿੱਚ ਤਾਂ ਆਪਣਾ ਆਪ ਵੀ ਕੁਰਬਾਨ ਹੋ ਜਾਂਦਾ ਹੈ ਅਤੇ ਫਿਰ ਧਨ ਦੌਲਤ ਤਾਂ ਹੈ ਹੀ ਕੁਝ ਨਹੀਂ। ਅਜਿਹੀ ਹੀ ਮਿਸਾਲ ਇਟਲੀ ਦੇ ਸਾਬਕਾ ਪ੍ਰਧਾਨ ਮੰਤਰੀ ਨੇ ਦਿੱਤੀ ਹੈ। ਇਟਲੀ ਦੇ ਸਾਬਕਾ ਪ੍ਰਧਾਨ ਮੰਤਰੀ ਸਿਲਵੀਓ ਬਰਲੁਸਕੋਨੀ, ਜਿਨ੍ਹਾਂ ਦੀ ਪਿਛਲੇ ਮਹੀਨੇ ਮੌਤ ਹੋ ਗਈ ਸੀ, ਉਸ ਨੇ ਆਪਣੀ ਵਸੀਅਤ ਵਿੱਚ ਆਪਣੀ 33 ਸਾਲਾ ਪ੍ਰੇਮਿਕਾ ਮਾਰਟਾ ਫਾਸੀਨਾ ਲਈ 100 ਮਿਲੀਅਨ ਯੂਰੋ (9,05,86,54,868 ਰੁਪਏ) ਛੱਡੇ ਹਨ।
ਫੋਰਜ਼ਾ ਇਟਾਲੀਆ ਦੇ ਡਿਪਟੀ ਫਸੀਨਾ ਨੇ ਮਾਰਚ 2020 ਵਿੱਚ ਬਰਲੁਸਕੋਨੀ ਨਾਲ ਰਿਸ਼ਤਾ ਸ਼ੁਰੂ ਕੀਤਾ ਸੀ। 33 ਸਾਲਾ ਫਸੀਨਾ 2018 ਦੀਆਂ ਆਮ ਚੋਣਾਂ ਤੋਂ ਇਟਲੀ ਦੀ ਸੰਸਦ ਦੇ ਹੇਠਲੇ ਸਦਨ ਦੀ ਮੈਂਬਰ ਰਹੀ ਹੈ। ਉਹ ਫੋਰਜ਼ਾ ਇਟਾਲੀਆ ਦੀ ਮੈਂਬਰ ਹੈ, ਜਿਸ ਪਾਰਟੀ ਦੀ ਸਥਾਪਨਾ ਬਰਲੁਸਕੋਨੀ ਦੁਆਰਾ 1994 ਵਿੱਚ ਕੀਤੀ ਗਈ ਸੀ, ਜਦੋਂ ਉਸਨੇ ਪਹਿਲੀ ਵਾਰ ਰਾਜਨੀਤੀ ਵਿੱਚ ਪ੍ਰਵੇਸ਼ ਕੀਤਾ ਸੀ।
ਬਰਲੁਸਕੋਨੀ ਦੀ ਬਾਕੀ ਵਸੀਅਤ ਬਾਰੇ ਗੱਲ ਕਰੀਏ ਤਾਂ ਬਰਲੁਸਕੋਨੀ ਦੇ ਵਪਾਰਕ ਸਾਮਰਾਜ ਨੂੰ ਉਸਦੇ ਦੋ ਸਭ ਤੋਂ ਵੱਡੇ ਬੱਚੇ ਮਰੀਨਾ ਅਤੇ ਪੀਅਰ ਸਿਲਵੀਓ ਦੁਆਰਾ ਨਿਯੰਤਰਿਤ ਕੀਤਾ ਜਾਵੇਗਾ। ਬਰਲੁਸਕੋਨੀ ਨੇ ਆਪਣੇ ਭਰਾ ਪਾਓਲੋ ਲਈ 100 ਮਿਲੀਅਨ ਯੂਰੋ ਅਤੇ ਮਾਰਸੇਲੋ ਡੇਲ’ਉਤਰੀ ਲਈ 30 ਮਿਲੀਅਨ ਯੂਰੋ ਛੱਡੇ, ਜੋ ਉਸਦੀ ਫੋਰਜ਼ਾ ਇਟਾਲੀਆ ਪਾਰਟੀ ਦੇ ਸਾਬਕਾ ਸੈਨੇਟਰ ਸਨ, ਜਿਸ ਨੇ ਮਾਫੀਆ ਨਾਲ ਸਬੰਧਾਂ ਲਈ ਜੇਲ੍ਹ ਦੀ ਸਜ਼ਾ ਕੱਟੀ ਸੀ।
ਬਰਲੁਸਕੋਨੀ ਦੀ 12 ਜੂਨ ਨੂੰ 86 ਸਾਲ ਦੀ ਉਮਰ ਵਿੱਚ ਮੌਤ ਹੋ ਗਈ ਸੀ। ਬਰਲੁਸਕੋਨੀ ਰੰਗੀਨ ਪਾਰਟੀਆਂ ਅਤੇ ਭ੍ਰਿਸ਼ਟਾਚਾਰ ਵਿੱਚ ਸ਼ਾਮਲ ਹੋਣ ਦੇ ਦੋਸ਼ਾਂ ਦੇ ਬਾਵਜੂਦ ਇਟਲੀ ਦੇ ਸਭ ਤੋਂ ਲੰਬੇ ਸਮੇਂ ਤੱਕ ਪ੍ਰਧਾਨ ਮੰਤਰੀ ਰਹੇ ਪਰ ਉਹ ਪਿਛਲੇ ਕੁਝ ਸਾਲਾਂ ਤੋਂ ਦਿਲ ਦੀ ਬਿਮਾਰੀ ਅਤੇ ਪ੍ਰੋਸਟੇਟ ਕੈਂਸਰ ਤੋਂ ਪੀੜਤ ਸਨ।
