ਲੁਧਿਆਣਾ ‘ਚ ਰੇਂਜ ਰੋਵਰ ਕਾਰ ‘ਚੋਂ 22 ਲੱਖ ਦੀ ਚੋਰੀ, ਡਰਾਈਵਰ ਪੰਕਚਰ ਲਗਵਾਉਣ ਲੱਗਾ ਤਾਂ ਬਾਈਕ ਸਵਾਰ ਕਰ ਗਏ ਕਾਰਾ
ਲੁਧਿਆਣਾ (ਵੀਓਪੀ ਬਿਊਰੋ) ਲੁਧਿਆਣਾ ਦੇ ਸਾਊਥ ਸਿਟੀ ਨੇੜੇ ਸ਼ਿਵਾਲਿਕ ਪੈਟਰੋਲ ਪੰਪ ‘ਤੇ ਬਾਈਕ ਸਵਾਰ ਬਦਮਾਸ਼ਾਂ ਨੇ ਰੇਂਜ ਰੋਵਰ ਕਾਰ ‘ਚੋਂ 22 ਲੱਖ ਰੁਪਏ ਚੋਰੀ ਕਰ ਲਏ।
ਕਾਰ ਦਾ ਡਰਾਈਵਰ ਕਾਰ ਨੂੰ ਪੰਕਚਰ ਲਗਵਾਉਣ ਲਈ ਪੈਟਰੋਲ ਪੰਪ ‘ਤੇ ਆਇਆ ਸੀ। ਉਸ ਦਾ ਧਿਆਨ ਪੰਕਚਰ ਲਗਵਾਉਣ ‘ਤੇ ਸੀ ਕਿ ਕਿਸੇ ਬਦਮਾਸ਼ ਨੇ ਕਾਰ ‘ਚੋਂ ਇਕ ਵੱਡਾ ਬੈਗ ਪਿੱਛਿਓਂ ਚੋਰੀ ਕਰ ਲਿਆ ਅਤੇ ਦੂਰੀ ‘ਤੇ ਖੜ੍ਹੇ ਬਾਈਕ ‘ਤੇ ਸਾਥੀ ਸਮੇਤ ਫਰਾਰ ਹੋ ਗਿਆ।
ਡਰਾਈਵਰ ਬਹਾਦਰ ਸਿੰਘ ਨੇ ਤੁਰੰਤ ਮਾਲਕ ਕਰਨ ਅਰੋੜਾ ਨੂੰ ਘਟਨਾ ਦੀ ਸੂਚਨਾ ਦਿੱਤੀ। ਕਰਨ ਨੇ ਤੁਰੰਤ ਪੁਲਿਸ ਨੂੰ ਸੂਚਨਾ ਦਿੱਤੀ। ਇਸ ਤੋਂ ਬਾਅਦ ਪੁਲਿਸ ਮਾਮਲੇ ਦੀ ਜਾਂਚ ਕਰ ਰਹੀ ਹੈ।
