OMG-2 ਫਿਲਮ ਦਾ ਵਿਰੋਧ ਸ਼ੁਰੂ, ਅਦਾਕਾਰ ਅਕਸ਼ੇ ਕੁਮਾਰ ਨੂੰ ਥੱਪੜ ਮਾਰਨ ਵਾਲੇ ਨੂੰ 10 ਲੱਖ ਰੁਪਏ ਦੇਣ ਦਾ ਰਾਸ਼ਟਰੀ ਹਿੰਦੂ ਪ੍ਰੀਸ਼ਦ ਆਗਰਾ ਇਕਾਈ ਨੇ ਕੀਤਾ ਐਲ਼ਾਨ
ਵੀਓਪੀ ਬਿਊਰੋ, ਨਵੀਂ ਦਿੱਲੀ : ਇੱਕ ਪਾਸੇ ਅਕਸ਼ੇ ਕੁਮਾਰ ਦੀ ਨਵੀਂ ਫਿਲਮ OMG-2 ਸੁਰਖੀਆਂ ਬਟੋਰ ਰਹੀ ਹੈ, ਦੂਜੇ ਪਾਸੇ ਇਸ ਫਿਲਮ ਦਾ ਵਿਰੋਧ ਵੀ ਸ਼ੁਰੂ ਹੋ ਗਿਆ ਹੈ। ਆਗਰਾ ਵਿੱਚ ਬਜਰੰਗ ਦਲ ਦੇ ਵਰਕਰਾਂ ਅਤੇ ਮਹਾਕਾਲ ਮੰਦਰ ਦੇ ਪੁਜਾਰੀਆਂ ਨੇ ਓਐਮਜੀ-2 ਨੂੰ ਲੈ ਕੇ ਜ਼ੋਰਦਾਰ ਪ੍ਰਦਰਸ਼ਨ ਕੀਤਾ ਅਤੇ ਅਦਾਕਾਰ ਅਕਸ਼ੈ ਕੁਮਾਰ ਦਾ ਪੁਤਲਾ ਵੀ ਫੂਕਿਆ। ਰਾਸ਼ਟਰੀ ਹਿੰਦੂ ਪ੍ਰੀਸ਼ਦ ਆਗਰਾ ਇਕਾਈ ਨੇ ਐਲਾਨ ਕੀਤਾ ਕਿ ਜੋ ਵੀ ਅਦਾਕਾਰ ਨੂੰ ਥੱਪੜ ਮਾਰੇਗਾ ਤੇ ਉਸ ‘ਤੇ ਥੁੱਕੇਗਾ, ਇਹ ਸੰਸਥਾ 10 ਲੱਖ ਰੁਪਏ ਦਾ ਇਨਾਮ ਦੇਵੇਗੀ। ਦਰਅਸਲ ਇਹ ਫਿਲਮ ਸੈਕਸ ਐਜੂਕੇਸ਼ਨ ‘ਤੇ ਆਧਾਰਿਤ ਹੈ, ਜਿਸ ‘ਚ ਅਕਸ਼ੈ ਕੁਮਾਰ ਸ਼ੰਕਰ ਭਗਵਾਨ ਦੀ ਭੂਮਿਕਾ ‘ਚ ਹਨ। ਜਿਵੇਂ ਹੀ ਅਕਸ਼ੇ ਕੁਮਾਰ ਸਟਾਰਰ ਫਿਲਮ ‘ਓਐਮਜੀ 2’ ਸ਼ੁੱਕਰਵਾਰ, 11 ਅਗਸਤ ਨੂੰ ਰਿਲੀਜ਼ ਹੋਈ, ਹਿੰਦੂ ਸੰਗਠਨਾਂ ਨੇ ਕੁਝ “ਅਸ਼ਲੀਲ ਦ੍ਰਿਸ਼ਾਂ” ‘ਤੇ ਨਾਰਾਜ਼ਗੀ ਜ਼ਾਹਰ ਕੀਤੀ ਅਤੇ ਫਿਲਮ ਨਿਰਮਾਤਾਵਾਂ ‘ਤੇ “ਹਿੰਦੂ-ਵਿਰੋਧੀ” ਹੋਣ ਦਾ ਦੋਸ਼ ਲਗਾਇਆ।
ਰਾਸ਼ਟਰੀ ਹਿੰਦੂ ਪ੍ਰੀਸ਼ਦ ਭਾਰਤ ਨੇ ਵੀਰਵਾਰ ਨੂੰ ਤਾਜ ਨਗਰੀ, ਆਗਰਾ ਦੇ ਫੂਲ ਸਈਅਦ ਸਕੁਏਅਰ ‘ਤੇ ਫਿਲਮ ਦੇ ਖਿਲਾਫ ਪ੍ਰਦਰਸ਼ਨ ਕਰਦੇ ਹੋਏ ਦਾਅਵਾ ਕੀਤਾ ਕਿ ਫਿਲਮ “ਬੋਲੇ ਨਾਥ (ਭਗਵਾਨ ਸ਼ਿਵ) ਦੀ ਤਸਵੀਰ ਨੂੰ ਬਦਨਾਮ ਕਰ ਕੇ ਹਿੰਦੂ ਭਾਵਨਾਵਾਂ ਨੂੰ ਠੇਸ ਪਹੁੰਚਾਉਂਦੀ ਹੈ।” ਜੈ ਸ਼੍ਰੀ ਰਾਮ ਦੇ ਨਾਅਰੇ ਦੇ ਵਿਚਕਾਰ, ਪ੍ਰਦਰਸ਼ਨਕਾਰੀਆਂ ਨੇ ਅਭਿਨੇਤਾ ਦੇ ਪੋਸਟਰ ਨੂੰ ਕਾਲਾ ਕੀਤਾ ਅਤੇ ਫਿਰ ਉਨ੍ਹਾਂ ਦਾ ਪੁਤਲਾ ਫੂਕਿਆ। ਫਿਲਮ ‘ਚ ਦਿਖਾਏ ਗਏ ਕੁਝ ਦ੍ਰਿਸ਼ਾਂ ਬਾਰੇ ਉਨ੍ਹਾਂ ਕਿਹਾ, ‘ਇਸ ‘ਚ ਜਿਸ ਤਰ੍ਹਾਂ ਭੋਲੇ ਬਾਬਾ ਨੂੰ ਦਿਖਾਇਆ ਗਿਆ ਹੈ, ਉਸ ਦਾ ਅਪਮਾਨ ਕੀਤਾ ਗਿਆ ਹੈ, ਉਨ੍ਹਾਂ ਨੂੰ ਗੰਦੇ ਪਾਣੀ ਨਾਲ ਨਹਾਇਆ ਗਿਆ ਹੈ।’ ਹਾਲਾਂਕਿ ਪਰਾਸ਼ਰ ਨੇ ਸੈਂਸਰ ਬੋਰਡ ਦਾ ਵੀ ਧੰਨਵਾਦ ਕੀਤਾ ਹੈ ਕਿਉਂਕਿ ਇਸ ਤੋਂ ਪਹਿਲਾਂ ਫਿਲਮ ਦੇ ਕੁਝ ਸੀਨਜ਼ ‘ਚ ਸ਼ਿਵ ਨੂੰ ਸੈਕਸ ਸੀਨਜ਼ ਨਾਲ ਸ਼ਰਾਬੀ ਦਿਖਾਇਆ ਗਿਆ ਸੀ। ਜਿਸ ਨੂੰ ਸਾਡੇ ਵਿਰੋਧ ਤੋਂ ਬਾਅਦ ਫਿਲਮ ਤੋਂ ਹਟਾ ਦਿੱਤਾ ਗਿਆ ਹੈ।
ਰਾਸ਼ਟਰੀ ਹਿੰਦੂ ਪ੍ਰੀਸ਼ਦ ਆਗਰਾ ਇਕਾਈ ਦੇ ਮੁਖੀ ਗੋਵਿੰਦ ਪਰਾਸ਼ਰ ਨੇ ਫਿਲਮ ਦੇ ਅਦਾਕਾਰ ਅਕਸ਼ੈ ਕੁਮਾਰ ਦੇ ਮੂੰਹ ‘ਤੇ ਥੱਪੜ ਮਾਰਨ ਜਾਂ ਥੁੱਕਣ ਵਾਲੇ ਨੂੰ 10 ਲੱਖ ਰੁਪਏ ਦਾ ਇਨਾਮ ਦੇਣ ਦਾ ਐਲਾਨ ਕੀਤਾ ਹੈ। ਪਰਾਸ਼ਰ ਨੇ ਸੈਂਸਰ ਬੋਰਡ ਅਤੇ ਕੇਂਦਰ ਸਰਕਾਰ ਤੋਂ ਫਿਲਮ ‘ਤੇ ਪਾਬੰਦੀ ਲਗਾਉਣ ਦੀ ਮੰਗ ਕੀਤੀ ਹੈ।
