ਮੁਹੰਮਦ ਸ਼ਮੀ ਦੇ ਵਿਸ਼ਵ ਕੱਪ ‘ਚ ਸ਼ਾਨਦਾਰ ਪ੍ਰਦਰਸ਼ਨ ਲਈ ਯੂ.ਪੀ. ਸਰਕਾਰ ਕਰੇਗੀ ਸਨਮਾਨ, ਕੀਤਾ ਵੱਡਾ ਐਲਾਨ
ਵੀਓਪੀ ਬਿਊਰੋ – ਯੂਪੀ ਸਰਕਾਰ ਕ੍ਰਿਕਟ ਵਿਸ਼ਵ ਕੱਪ ‘ਚ ਸ਼ਾਨਦਾਰ ਪ੍ਰਦਰਸ਼ਨ ਕਰਨ ਵਾਲੇ ਖਾਸ ਕਰ ਕੇ ਸੈਮੀਫਾਈਨਲ ਵਿੱਚ ਸ਼ਾਨਦਾਰ ਪ੍ਰਦਰਸ਼ਨ ਲਈ ਭਾਰਤੀ ਗੇਂਦਬਾਜ਼ ਮੁਹੰਮਦ ਸ਼ਮੀ ਦਾ ਸਨਮਾਨ ਕਰੇਗੀ। ਯੂਪੀ ਸਰਕਾਰ ਅਮਰੋਹਾ ਵਿੱਚ ਸ਼ਮੀ ਦੇ ਪਿੰਡ ਵਿੱਚ ਇੱਕ ਮਿੰਨੀ ਸਟੇਡੀਅਮ ਅਤੇ ਓਪਨ ਜਿਮ ਬਣਾਏਗੀ।
ਅਮਰੋਹਾ ਦੇ ਜ਼ਿਲ੍ਹਾ ਅਧਿਕਾਰੀ ਰਾਜੇਸ਼ ਤਿਆਗੀ ਨੇ ਸ਼ੁੱਕਰਵਾਰ ਨੂੰ ਇਹ ਐਲਾਨ ਕੀਤਾ। ਸ਼ਮੀ ਨੇ ਮੁੰਬਈ ‘ਚ ਹੋਏ ਸੈਮੀਫਾਈਨਲ ‘ਚ ਨਿਊਜ਼ੀਲੈਂਡ ਦੇ 7 ਖਿਡਾਰੀਆਂ ਨੂੰ ਪੈਵੇਲੀਅਨ ਵਾਪਸ ਭੇਜਿਆ ਸੀ।
ਸ਼ਮੀ ਨੇ ਪਿਛਲੇ ਬੁੱਧਵਾਰ ਮੁੰਬਈ ‘ਚ ਸੈਮੀਫਾਈਨਲ ਮੈਚ ‘ਚ 7 ਵਿਕਟਾਂ ਲੈ ਕੇ ਭਾਰਤੀ ਟੀਮ ਦਾ ਫਾਈਨਲ ‘ਚ ਪਹੁੰਚਣ ਦਾ ਰਾਹ ਮਜ਼ਬੂਤ ਕੀਤਾ ਸੀ। ਜਿੱਥੇ ਪੂਰੇ ਦੇਸ਼ ਨੂੰ ਉਸ ਦੀ ਇਸ ਉਪਲਬਧੀ ‘ਤੇ ਮਾਣ ਹੈ, ਉੱਥੇ ਹੀ ਉਸ ਦੇ ਗ੍ਰਹਿ ਸ਼ਹਿਰ ਅਮਰੋਹਾ ‘ਚ ਜਸ਼ਨ ਦਾ ਮਾਹੌਲ ਹੈ ਅਤੇ ਹੁਣ ਸੂਬਾ ਸਰਕਾਰ ਦੇ ਇਸ ਐਲਾਨ ਨਾਲ ਸ਼ਮੀ ਦੇ ਪਿੰਡ ਵਾਸੀ ਅਤੇ ਪਰਿਵਾਰ ਖੁਸ਼ ਹਨ।
ਮੁਹੰਮਦ ਸ਼ਮੀ ਅਮਰੋਹਾ ਦੇ ਸਾਹਸਪੁਰ ਅਲੀਨਗਰ ਦਾ ਰਹਿਣ ਵਾਲਾ ਹੈ। ਇਸ ਪਿੰਡ ਵਿੱਚ ਮਿੰਨੀ ਸਟੇਡੀਅਮ ਬਣਾਉਣ ਦੀ ਗੱਲ ਚੱਲ ਰਹੀ ਹੈ। ਇਸ ਸਬੰਧੀ ਸੀ.ਡੀ.ਪੀ.ਓ ਅਸ਼ਵਨੀ ਕੁਮਾਰ ਮਿਸ਼ਰਾ ਸਮੇਤ ਬਲਾਕ ਅਧਿਕਾਰੀਆਂ ਨੇ ਪਿੰਡ ਦਾ ਦੌਰਾ ਕਰਕੇ ਜ਼ਮੀਨ ਦੀ ਨਿਸ਼ਾਨਦੇਹੀ ਕੀਤੀ ਹੈ। ਅਮਰੋਹਾ ਡੀਐਮ ਤਿਆਗੀ ਨੇ ਕੱਲ੍ਹ ਇਸ ਦੀ ਪੁਸ਼ਟੀ ਕੀਤੀ।
