ਵੀਡੀਓ ਕਾਲ ਰਾਹੀਂ ਡਾਕਟਰ ਨੇ ਸਫਾਈ ਕਰਨ ਵਾਲੀ ਔਰਤ ਕੋਲੋਂ ਕਰਵਾਈ ਡਲਿਵਰੀ, ਗ਼ਲਤ ਨਾੜੀ ਕੱਟਣ ਕਾਰਨ ਬੱਚੇ ਦੀ ਮੌ+ਤ
ਵੀਓਪੀ ਬਿਊਰੋ, ਪਟਨਾ : ਬਿਹਾਰ ਦੀ ਰਾਜਧਾਨੀ ਪਟਨਾ ਤੋਂ ਹੈਰਾਨ ਕਰਨ ਵਾਲੀ ਖਬਰ ਸਾਹਮਣੇ ਆਈ ਹੈ। ਦਾਨਾਪੁਰ ਥਾਣਾ ਖੇਤਰ ਦੇ ਗੋਲਾ ਸਥਿਤ ਇੱਕ ਨਿੱਜੀ ਨਰਸਿੰਗ ਹੋਮ ਦੀ ਲਾਪਰਵਾਹੀ ਕਾਰਨ ਜਨਮ ਤੋਂ ਬਾਅਦ ਬੱਚੇ ਦੀ ਮੌ+ਤ ਹੋ ਗਈ। ਡਾਕਟਰ ਅਤੇ ਸਵੀਪਰ ਦੀ ਲਾਪਰਵਾਹੀ ਕਾਰਨ ਬੱਚੇ ਨੂੰ ਜਨਮ ਤੋਂ ਬਾਅਦ ਹੀ ਆਪਣੀ ਜਾਨ ਗਵਾਉਣੀ ਪਈ। ਪਰਿਵਾਰਕ ਮੈਂਬਰਾਂ ਅਨੁਸਾਰ ਨਰਸਿੰਗ ਹੋਮ ਦੇ ਡਾਕਟਰ ਨੇ ਸਵੀਪਰ ਦੀ ਮਦਦ ਨਾਲ ਘਰ ਬੈਠੇ ਹੀ ਵੀਡੀਓ ਕਾਲ ਰਾਹੀਂ ਡਿਲੀਵਰੀ ਕਰਵਾਈ ਸੀ।
ਜਾਣਕਾਰੀ ਮੁਤਾਬਕ ਨਵਜੰਮੇ ਬੱਚੇ ਦੀ ਨਾਭੀ ਕੱਟਣ ਵਿਚ ਅਣਗਹਿਲੀ ਕਾਰਨ ਮੌਤ ਹੋ ਗਈ। ਇਸ ਤੋਂ ਬਾਅਦ ਪਰਿਵਾਰਕ ਮੈਂਬਰਾਂ ਨੇ ਨਰਸਿੰਗ ਹੋਮ ‘ਚ ਹੰਗਾਮਾ ਕਰ ਦਿੱਤਾ ਅਤੇ ਪੁਲਿਸ ਨੂੰ ਬੁਲਾਉਂਦੇ ਹੋਏ ਕਿਹਾ ਕਿ ਮੌਤ ਅਣਗਹਿਲੀ ਕਾਰਨ ਹੋਈ ਹੈ। ਪੁਲਿਸ ਨੇ ਮੌਕੇ ਉਤੇ ਪਹੁੰਚ ਕੇ ਨਰਸਿੰਗ ਹੋਮ ਦੇ 3 ਨਰਸਿੰਗ ਸਟਾਫ ਨੂੰ ਗ੍ਰਿਫਤਾਰ ਕਰ ਲਿਆ। ਦੱਸਿਆ ਜਾਂਦਾ ਹੈ ਕਿ ਤਰਕਰੀਆ ਬਾਜ਼ਾਰ ਦੇ ਰਹਿਣ ਵਾਲੇ ਰਵੀਸ਼ੰਕਰ ਦੀ ਪਤਨੀ ਜੂਲੀ ਕੁਮਾਰੀ ਦਾਨਾਪੁਰ ਥਾਣਾ ਖੇਤਰ ਦੇ ਗੋਲਾ ਸਥਿਤ ਹਰਸ਼ਿਤ ਪਾਲੀ ਨਰਸਿੰਗ ਹੋਮ ਵਿਚ ਦਾਖਲ ਸੀ। ਜੂਲੀ ਗਰਭਵਤੀ ਸੀ, ਉਸ ਨੂੰ ਲੇਬਰ ਦਰਦ ਕਾਰਨ ਵੀਰਵਾਰ ਨੂੰ ਹਰਸ਼ਿਤ ਪੋਲੀ ਕਲੀਨਿਕ ਵਿਚ ਭਰਤੀ ਕਰਵਾਇਆ ਗਿਆ ਸੀ।
ਨਰਸਿੰਗ ਹੋਮ ਦੀ ਡਾਕਟਰ ਕੰਚਨ ਲਤਾ ਨੇ ਮੋਟੀ ਰਕਮ ਲੈ ਕੇ ਉਸ ਨੂੰ ਆਪਣੇ ਨਰਸਿੰਗ ਹੋਮ ਵਿੱਚ ਦਾਖ਼ਲ ਕਰਵਾਇਆ ਸੀ। ਦਾਖ਼ਲੇ ਤੋਂ ਤੁਰੰਤ ਬਾਅਦ, ਕੰਚਨ ਲਤਾ, ਜੂਲੀ ਨੂੰ ਨਰਸਿੰਗ ਹੋਮ ਵਿੱਚ ਕੰਮ ਕਰਦੀ ਸਫ਼ਾਈ ਔਰਤ ਦੀ ਦੇਖਭਾਲ ਵਿੱਚ ਛੱਡ ਕੇ ਕਿਤੇ ਚਲੀ ਗਈ। ਡਾਕਟਰ ਦੇ ਜਾਣ ਤੋਂ ਤੁਰੰਤ ਬਾਅਦ ਔਰਤ ਨੂੰ ਜਣੇਪੇ ਦੀ ਤੇਜ਼ ਦਰਦ ਹੋਣ ਲੱਗੀ ਅਤੇ ਉਸ ਨੇ ਨਾਰਮਲ ਡਲਿਵਰੀ ਰਾਹੀਂ ਨਵਜੰਮੇ ਬੱਚੇ ਨੂੰ ਜਨਮ ਦਿੱਤਾ। ਦੱਸਿਆ ਜਾਂਦਾ ਹੈ ਕਿ ਜਿਸ ਸਮੇਂ ਨਵਜੰਮੇ ਬੱਚੇ ਦਾ ਜਨਮ ਹੋ ਰਿਹਾ ਸੀ, ਉਸ ਸਮੇਂ ਹਸਪਤਾਲ ਵਿੱਚ ਸਫ਼ਾਈ ਕਰਨ ਵਾਲੀ ਮਹਿਲਾ ਸਮੇਤ ਨਰਸਿੰਗ ਹੋਮ ਦਾ ਸਟਾਫ਼ ਮੌਜੂਦ ਸੀ। ਉਨ੍ਹਾਂ ਤੁਰੰਤ ਇਸ ਦੀ ਸੂਚਨਾ ਕਲੀਨਿਕ ਦੀ ਡਾਕਟਰ ਕੰਚਨ ਲਤਾ ਨੂੰ ਦਿੱਤੀ।
ਸੂਚਨਾ ਮਿਲਦੇ ਹੀ ਡਾ: ਕੰਚਨ ਲਤਾ ਨੇ ਸਫ਼ਾਈ ਸੇਵਕ ਸੁਨੀਤਾ ਅਤੇ ਸਟਾਫ਼ ਨੂੰ ਵੀਡੀਓ ਕਾਲ ਰਾਹੀਂ ਦੱਸਣਾ ਸ਼ੁਰੂ ਕਰ ਦਿੱਤਾ ਕਿ ਬੱਚਾ ਕਿਵੇਂ ਪੈਦਾ ਹੋਵੇਗਾ ਅਤੇ ਬੱਚੇ ਦੀ ਨਾਭੀਨਾੜ ਕਿਵੇਂ ਕੱਟਣੀ ਹੈ ਪਰ ਸਹੀ ਜਾਣਕਾਰੀ ਅਤੇ ਤਜਰਬੇ ਦੀ ਘਾਟ ਕਾਰਨ ਸਟਾਫ ਅਤੇ ਦਾਈ ਸੁਨੀਤਾ ਨੇ ਨਵਜੰਮੇ ਬੱਚੇ ਦੀ ਗਲਤ ਨਾੜ ਕੱਟ ਦਿੱਤੀ। ਨਾੜ ਕੱਟਣ ਦੇ ਕੁਝ ਮਿੰਟਾਂ ਵਿੱਚ ਹੀ ਬੱਚੇ ਦੀ ਮੌਤ ਹੋ ਗਈ। ਇੱਥੇ ਕਲੀਨਿਕ ਦਾ ਸਟਾਫ਼ ਬੱਚੇ ਦੀ ਮੌਤ ਦੀ ਖ਼ਬਰ ਛੁਪਾਉਣ ਦੀ ਕੋਸ਼ਿਸ਼ ਕਰਦਾ ਰਿਹਾ ਪਰ ਪੂਰੇ ਹਸਪਤਾਲ ਵਿੱਚ ਰੌਲਾ ਪੈ ਗਿਆ।
ਪੁਲਿਸ ਨੇ ਮੌਕੇ ‘ਤੇ ਪਹੁੰਚ ਕੇ ਹਸਪਤਾਲ ਦੇ ਕਰਮਚਾਰੀ ਰਵਿੰਦਰ ਕੁਮਾਰ, ਸੁਨੀਤਾ ਅਤੇ ਗੀਤਾ ਨੂੰ ਗ੍ਰਿਫਤਾਰ ਕਰ ਲਿਆ ਅਤੇ ਆਪਣੇ ਨਾਲ ਲੈ ਗਈ।
