ਮੁਹਾਲੀ ਦੀਆਂ ਸੜਕਾਂ ‘ਤੇ ਮਸਟੈਂਗ ਉੱਪਰ ਕੀਤੀ ਆਤਿਸ਼ਬਾਜ਼ੀ, ਨੇੜਿਓ ਲੰਘਦੇ ਰਾਹਗੀਰ ਦਾ ਸੜ ਗਿਆ ਪ੍ਰਾਈਵੇਟ ਪਾਰਟ
ਮੁਹਾਲੀ (ਵੀਓਪੀ ਬਿਊਰੋ) 2 ਦਸੰਬਰ ਨੂੰ ਪੰਜਾਬ ਦੇ ਮੁਹਾਲੀ ‘ਚ ਪੁਲਸ ਨੂੰ ਇਕ ਵੀਡੀਓ ਮਿਲੀ ਸੀ, ਜਿਸ ‘ਚ ਇਕ ਚੱਲਦੀ ਲਗਜ਼ਰੀ ਮਸਟੈਂਗ ਕਾਰ ‘ਤੇ ਸਕਾਈ ਸ਼ਾਟ ਪਟਾਕੇ ਪਾਏ ਜਾ ਰਹੇ ਸਨ ਅਤੇ ਇਸ ਨੂੰ ਸੋਸ਼ਲ ਮੀਡੀਆ ‘ਤੇ ਫੈਲਾਉਣ ਲਈ ਇਕ ਰੀਲ ਬਣਾਈ ਜਾ ਰਹੀ ਸੀ। ਇਸ ਮਾਮਲੇ ਵਿੱਚ ਪੁਲੀਸ ਨੇ ਪਹਿਲਾਂ ਇੱਕ ਅਣਪਛਾਤੇ ਵਿਅਕਤੀ ਖ਼ਿਲਾਫ਼ ਜ਼ਮਾਨਤੀ ਧਾਰਾ (ਹਵਾਈ ਫਾਇਰਿੰਗ ਅਤੇ ਲੋਕਾਂ ਦੀ ਆਵਾਜਾਈ ਵਿੱਚ ਰੁਕਾਵਟ ਪੈਦਾ ਕਰਨ) ਦੇ ਦੋਸ਼ ਹੇਠ ਕੇਸ ਦਰਜ ਕੀਤਾ ਸੀ। ਹੁਣ ਪੁਲਸ ਨੇ ਮਸਟੈਂਗ ਕਾਰ ਚਾਲਕ ਨੂੰ ਗ੍ਰਿਫਤਾਰ ਕਰ ਲਿਆ ਹੈ।
ਮੁਲਜ਼ਮ ਦੀ ਪਛਾਣ ਸੈਕਟਰ 70 ਦੀ ਪੌਸ਼ ਸੁਸਾਇਟੀ ਹੋਮਲੈਂਡ ਦੇ ਟਾਵਰ ਨੰਬਰ 4 ਦੇ ਫਲੈਟ ਨੰਬਰ 81 ਦੇ ਵਸਨੀਕ ਰਵੀਤ ਕਪੂਰ ਵਜੋਂ ਹੋਈ ਹੈ। ਹੁਣ ਇਸ ਮਾਮਲੇ ‘ਚ ਨਵਾਂ ਮੋੜ ਆਇਆ ਹੈ। ਮੁਲਜ਼ਮ ਰਵੀਤ ਖ਼ਿਲਾਫ਼ ਪੁਲੀਸ ਨੂੰ ਇੱਕ ਵਿਅਕਤੀ ਨੇ ਸ਼ਿਕਾਇਤ ਦਿੱਤੀ ਹੈ ਕਿ ਜਦੋਂ ਮੁਲਜ਼ਮ ਸਕਾਈ ਸ਼ਾਟ ਵਾਲੀ ਮਸਟੈਂਗ ਕਾਰ ਚਲਾ ਰਿਹਾ ਸੀ ਤਾਂ ਉਹ ਉਸ ਦੇ ਪਿੱਛੇ ਸਕੂਟਰ ’ਤੇ ਆ ਰਿਹਾ ਸੀ।
ਅਸਮਾਨੀ ਗੋਲੀ ਉਸ ‘ਤੇ ਡਿੱਗਣ ਕਾਰਨ ਉਸ ਦੇ ਕੱਪੜਿਆਂ ਨੂੰ ਅੱਗ ਲੱਗ ਗਈ, ਜਿਸ ਕਾਰਨ ਉਸ ਦਾ ਗੁਪਤ ਅੰਗ ਸੜ ਗਿਆ। ਪੁਲਸ ਨੇ ਜ਼ਖਮੀ ਵਿਅਕਤੀ ਦੀ ਪਛਾਣ ਨਹੀਂ ਦੱਸੀ ਹੈ ਪਰ ਹੁਣ ਦੋਸ਼ੀ ਰਵੀਤ ਖਿਲਾਫ ਗੈਰ-ਜ਼ਮਾਨਤੀ ਧਾਰਾ 308 ਦੇ ਤਹਿਤ ਕਿਸੇ ਦੀ ਮੌਤ ਦਾ ਕਾਰਨ ਬਣਨ ਦਾ ਮਾਮਲਾ ਦਰਜ ਕਰ ਲਿਆ ਗਿਆ ਹੈ। ਉਸ ਨੂੰ ਮੰਗਲਵਾਰ ਨੂੰ ਮੁਹਾਲੀ ਅਦਾਲਤ ਵਿੱਚ ਪੇਸ਼ ਕੀਤਾ ਗਿਆ, ਜਿੱਥੇ ਅਦਾਲਤ ਨੇ ਉਸ ਨੂੰ ਦੋ ਦਿਨ ਦੇ ਪੁਲੀਸ ਰਿਮਾਂਡ ’ਤੇ ਭੇਜ ਦਿੱਤਾ ਹੈ।
ਰਵੀਤ ਕਪੂਰ ਦਾ ਮੁਹਾਲੀ ਵਿੱਚ ਇਮੀਗ੍ਰੇਸ਼ਨ ਦਾ ਕੰਮ ਹੈ ਅਤੇ ਉਸਦੇ ਪਿਤਾ ਦਾ ਚੰਡੀਗੜ੍ਹ ਦੇ ਸੈਕਟਰ-19 ਵਿੱਚ ਕੱਪੜਿਆਂ ਦਾ ਸ਼ੋਅਰੂਮ ਹੈ। ਰਵੀਤ ਕਪੂਰ ਨੇ ਪੁਲਸ ਪੁੱਛਗਿੱਛ ਦੌਰਾਨ ਦੱਸਿਆ ਕਿ ਉਸ ਨੇ ਇਹ ਵੀਡੀਓ ਆਪਣੀ ਵਿਆਹ ਦੀ ਵਰ੍ਹੇਗੰਢ ਲਈ ਆਪਣੀ ਪਤਨੀ ਨੂੰ ਪ੍ਰਭਾਵਿਤ ਕਰਨ ਲਈ ਬਣਾਈ ਸੀ। ਉਸ ਨੇ ਸੈਕਟਰ-69 ਤੋਂ ਏਅਰਪੋਰਟ ਵੱਲ ਜਾਂਦੇ ਸਮੇਂ ਇਹ ਵੀਡੀਓ ਬਣਾਈ ਸੀ। ਇਸ ਦੇ ਲਈ ਉਸ ਨੇ 22 ਨਵੰਬਰ ਨੂੰ ਇਕ ਆਟੋ ਚਾਲਕ ਨੂੰ ਕੁਝ ਪੈਸੇ ਦਿੱਤੇ ਅਤੇ ਫਿਰ ਵੀਡੀਓ ਬਣਾਈ। ਪੁਲਿਸ ਨੇ ਗ੍ਰਿਫ਼ਤਾਰੀ ਤੋਂ ਪਹਿਲਾਂ ਇਹ ਵੀਡੀਓ ਆਪਣੇ ਮੋਬਾਈਲ ਤੋਂ ਡਿਲੀਟ ਕਰ ਦਿੱਤਾ ਸੀ।
ਹਰਸਿਮਰਨ ਬੱਲ, ਡੀਐਸਪੀ ਨੇ ਦੱਸਿਆ ਮੁਲਜ਼ਮ ਰਵੀਤ ਨੇ ਆਪਣੀ ਮਸਟੈਂਗ ਕਾਰ ਦਿੱਲੀ ਦੇ ਕਿਸੇ ਵਿਅਕਤੀ ਨੂੰ ਵੇਚ ਦਿੱਤੀ ਹੈ। ਫੇਜ਼-8 ਥਾਣੇ ਦੀ ਪੁਲੀਸ ਟੀਮ ਗੱਡੀ ਨੂੰ ਬਰਾਮਦ ਕਰਨ ਲਈ ਦਿੱਲੀ ਰਵਾਨਾ ਹੋ ਗਈ ਹੈ। ਆਟੋ ਚਾਲਕ ਦੀ ਵੀ ਭਾਲ ਕੀਤੀ ਜਾ ਰਹੀ ਹੈ। ਜਲਦੀ ਹੀ ਉਸਨੂੰ ਫੜ ਲਿਆ ਜਾਵੇਗਾ ਅਤੇ ਉਸਦੇ ਖਿਲਾਫ ਵੀ ਮਾਮਲਾ ਦਰਜ ਕੀਤਾ ਜਾਵੇਗਾ।
