ਗੈਂਗਸਟਰ ਸਮਝ ਪੰਜਾਬ ਪੁਲਿਸ ਨੇ ਥਾਰ ‘ਤੇ ਕਰ’ਤੀ ਫਾਇਰਿੰਗ, ਅੰਦਰ ਦੇਖਿਆ ਤਾਂ ਰਹਿ ਗਏ ਸਭ ਹੈਰਾਨ
ਵੀਓਪੀ ਬਿਊਰੋ – ਨਵਾਂਸ਼ਹਿਰ ‘ਚ ਪੁਲਿਸ ਦੀ ਗੱਡੀ ਨੂੰ ਥਾਰ ਨੇ ਟੱਕਰ ਮਾਰ ਦਿੱਤੀ, ਥਾਰ ਦੇ ਸ਼ੀਸ਼ੇ ਕਾਲੇ ਕੀਤੇ ਹੋਏ ਸਨ। ਪੁਲਿਸ ਨੂੰ ਸ਼ੱਕ ਸੀ ਕਿ ਗੱਡੀ ਵਿੱਚ ਗੈਂਗਸਟਰ ਸਨ। ਪੁਲਿਸ ਨੇ ਗੋਲੀ ਚਲਾ ਕੇ ਗੱਡੀ ਨੂੰ ਰੋਕ ਲਿਆ। ਇਸ ਤੋਂ ਬਾਅਦ ਜਦੋਂ ਕਾਰ ਦਾ ਸ਼ੀਸ਼ਾ ਤੋੜਿਆ ਗਿਆ ਤਾਂ ਅੰਦਰ ਦੇਖ ਕੇ ਪੁਲਿਸ ਵੀ ਹੈਰਾਨ ਰਹਿ ਗਈ। ਦਰਅਸਲ ਕਾਰ ‘ਚ ਇਕ ਨਾਬਾਲਗ ਜੋੜਾ ਬੈਠਾ ਸੀ ਜੋ ਕਾਫੀ ਘਬਰਾਇਆ ਹੋਇਆ ਸੀ। ਸੂਤਰਾਂ ਮੁਤਾਬਕ ਨਾਬਾਲਗ ਇਕ ਸਿਆਸੀ ਆਗੂ ਦਾ ਪੁੱਤਰ ਹੈ।
ਦਰਅਸਲ ਬਹਿਰਾਮ ਪੁਲਿਸ ਨੂੰ ਸੂਚਨਾ ਮਿਲੀ ਸੀ ਕਿ ਥਾਣਾ ਬਹਿਰਾਮ ਅਧੀਨ ਪੈਂਦੇ ਮੇਹਲੀ (ਫਗਵਾੜਾ ਬਾਈਪਾਸ) ਨੇੜੇ ਇਕ ਥਾਰ ਖੜ੍ਹੀ ਹੈ, ਜਿਸ ਦੀਆਂ ਖਿੜਕੀਆਂ ਕਾਲੀਆਂ ਸਨ। ਸੂਚਨਾ ਤੋਂ ਬਾਅਦ ਪੁਲਿਸ ਟੀਮ ਥਾਰ ਦੀ ਜਾਂਚ ਕਰਨ ਪਹੁੰਚੀ। ਪੁਲਿਸ ਟੀਮ ਨੇ ਥਾਰ ਵਿੱਚ ਬੈਠੇ ਵਿਅਕਤੀ ਨੂੰ ਕਾਰ ਖੋਲ੍ਹਣ ਲਈ ਕਿਹਾ ਪਰ ਕਾਰ ਚਾਲਕ ਨੇ ਕਾਰ ਖੋਲ੍ਹਣ ਦੀ ਬਜਾਏ ਪੁਲਿਸ ਦੀ ਕਾਰ ਨੂੰ ਟੱਕਰ ਮਾਰ ਦਿੱਤੀ ਅਤੇ ਭਜਾਉਣ ਦੀ ਕੋਸ਼ਿਸ਼ ਕੀਤੀ।
ਟੱਕਰ ਤੋਂ ਬਾਅਦ ਪੁਲਿਸ ਮੁਲਾਜ਼ਮਾਂ ਨੇ ਥਾਰ ਦੇ ਟਾਇਰ ‘ਤੇ ਗੋਲੀ ਚਲਾ ਕੇ ਕਾਰ ਨੂੰ ਰੋਕਣ ਦੀ ਕੋਸ਼ਿਸ਼ ਕੀਤੀ ਪਰ ਇਸ ਦੇ ਬਾਵਜੂਦ ਕਾਰ ਚਾਲਕ ਕਾਰ ਭਜਾ ਕੇ ਲੈ ਗਿਆ | ਕੁਝ ਦੂਰੀ ‘ਤੇ ਪੁਲਿਸ ਨਾਕੇ ਨੂੰ ਤੋੜਨ ਦੀ ਵੀ ਕੋਸ਼ਿਸ਼ ਕੀਤੀ। ਉਥੇ ਵੀ ਪੁਲਿਸ ਨੇ ਫਿਰ ਗੋਲੀਬਾਰੀ ਕੀਤੀ ਅਤੇ ਕਿਸੇ ਤਰ੍ਹਾਂ ਥਾਰ ਨੂੰ ਰੋਕ ਲਿਆ।
ਬਹੁਤ ਦੇਰ ਤੱਕ ਥਾਰ ਵਿੱਚੋਂ ਕੋਈ ਬਾਹਰ ਨਹੀਂ ਆਇਆ। ਇਸ ਤੋਂ ਬਾਅਦ ਪੁਲਿਸ ਨੇ ਥਾਰ ਦੇ ਸ਼ੀਸ਼ੇ ਤੋੜ ਕੇ ਗੱਡੀ ਖੋਲ੍ਹ ਦਿੱਤੀ। ਕਾਰ ਖੋਲ੍ਹਣ ‘ਤੇ ਪਤਾ ਲੱਗਾ ਕਿ ਉਸ ‘ਚ ਇਕ ਨੌਜਵਾਨ ਅਤੇ ਇਕ ਲੜਕੀ ਬੈਠੇ ਸਨ ਜੋ ਕਾਫੀ ਘਬਰਾਏ ਹੋਏ ਸਨ। ਐਸਐਚਓ ਇੰਸਪੈਕਟਰ ਰਾਧੇ ਕਿਸ਼ਨ ਨੇ ਦੱਸਿਆ ਕਿ ਥਾਰ ਵਿੱਚ ਬੈਠੇ ਲੜਕਾ-ਲੜਕੀ ਨਾਬਾਲਗ ਹਨ ਅਤੇ ਪੁਲਿਸ ਵੱਲੋਂ ਕਾਰਵਾਈ ਸ਼ੁਰੂ ਕਰ ਦਿੱਤੀ ਗਈ ਹੈ।
