ਕੋਹਲੀ ਨਾਲ ਜੁੜੀ ਇੱਕ ਹੋਰ ‘ਵਿਰਾਟ’ ਉਪਲੱਬਧੀ, ਬਣਿਆ ‘ਕ੍ਰਿਕਟਰ ਆਫ ਦਾ ਈਅਰ’
ਦੁਬਈ (ਵੀਓਪੀ ਬਿਊਰੋ) : ਭਾਰਤੀ ਬੱਲੇਬਾਜ਼ ਵਿਰਾਟ ਕੋਹਲੀ ਨੂੰ ‘ਆਈਸੀਸੀ ਪੁਰਸ਼ ਵਨਡੇ ਕ੍ਰਿਕਟਰ ਆਫ ਦਿ ਈਅਰ-2023’ ਦਾ ਖਿਤਾਬ ਮਿਲਿਆ ਹੈ। ਸਾਲ 2023 ਉਸ ਲਈ ਸ਼ਾਨਦਾਰ ਸਾਲ ਰਿਹਾ, ਜਿੱਥੇ ਉਸ ਨੇ ਬੱਲੇ ਨਾਲ ਦੌੜਾਂ ਬਣਾਈਆਂ। ਸਾਲ 2023 ਵਿੱਚ ਵਿਰਾਟ ਕੋਹਲੀ ਦੀ ਕ੍ਰਿਕਟ ਗਾਥਾ ਦਾ ਸਿਖਰ ਬਿਨਾਂ ਸ਼ੱਕ ਆਈਸੀਸੀ ਪੁਰਸ਼ ਕ੍ਰਿਕਟ ਵਿਸ਼ਵ ਕੱਪ ਵਿੱਚ ਉਸ ਦਾ ਪਲੇਅਰ ਆਫ ਦਿ ਟੂਰਨਾਮੈਂਟ ਪ੍ਰਦਰਸ਼ਨ ਸੀ।
ਕੋਹਲੀ ਨੇ ਨਾ ਸਿਰਫ ਭਾਰਤ ਨੂੰ ਫਾਈਨਲ ਤੱਕ ਪਹੁੰਚਾਇਆ ਬਲਕਿ ਕ੍ਰਿਕਟ ਇਤਿਹਾਸ ਵਿੱਚ ਆਪਣਾ ਨਾਮ ਵੀ ਲਿਖਿਆ। ਇਸ ਦੌਰਾਨ ਵਿਰਾਟ ਨੇ 6 ਸੈਂਕੜੇ ਵੀ ਲਗਾਏ, ਜਿਨ੍ਹਾਂ ‘ਚੋਂ 3 ਸੈਂਕੜੇ ਵਿਸ਼ਵ ਕੱਪ 2023 ਦੌਰਾਨ ਹੀ ਲੱਗੇ। ਵਿਸ਼ਵ ਕੱਪ ਵਿੱਚ ਕੋਹਲੀ ਨੇ 11 ਪਾਰੀਆਂ ਵਿੱਚ 95 ਦੀ ਔਸਤ ਨਾਲ 765 ਦੌੜਾਂ ਬਣਾਈਆਂ, ਜੋ ਕਿ ਇੱਕ ਟੂਰਨਾਮੈਂਟ ਵਿੱਚ ਸਭ ਤੋਂ ਵੱਧ ਦੌੜਾਂ ਬਣਾਉਣ ਦਾ ਨਵਾਂ ਰਿਕਾਰਡ ਹੈ। ਕੋਹਲੀ ਦਾ ਯੋਗਦਾਨ ਉਸਦੇ ਦ੍ਰਿੜ ਇਰਾਦੇ ਦਾ ਪ੍ਰਤੀਕ ਬਣ ਗਿਆ ਕਿਉਂਕਿ ਉਸਨੇ ਸੈਮੀਫਾਈਨਲ ਦੌਰਾਨ ਵਨਡੇ ਫਾਰਮੈਟ ਵਿੱਚ ਆਪਣਾ ਰਿਕਾਰਡ 50ਵਾਂ ਸੈਂਕੜਾ ਪੂਰਾ ਕੀਤਾ।
ਭਾਰਤੀ ਬੱਲੇਬਾਜ਼ ਨੇ 72.47 ਦੀ ਔਸਤ ਨਾਲ 1,377 ਦੌੜਾਂ ਬਣਾ ਕੇ ਸਾਲ ਦਾ ਅੰਤ ਕੀਤਾ, ਜੋ ਉਸ ਦੀ ਨਿਰੰਤਰਤਾ ਅਤੇ ਦਬਾਅ ਵਿੱਚ ਵਧੀਆ ਪ੍ਰਦਰਸ਼ਨ ਕਰਨ ਦੀ ਸਮਰੱਥਾ ਦਾ ਪ੍ਰਤੀਬਿੰਬ ਹੈ। 24 ਪਾਰੀਆਂ ਵਿੱਚ 6 ਸੈਂਕੜੇ ਅਤੇ 8 ਅਰਧ ਸੈਂਕੜੇ ਨੇ ਕੋਹਲੀ ਦੇ ਰੁਤਬੇ ਨੂੰ ਰਨ ਸਕੋਰਿੰਗ ਮਸ਼ੀਨ ਵਜੋਂ ਮਜ਼ਬੂਤ ਕਰ ਦਿੱਤਾ।
