ਪੁਰਾਣੇ-ਫਟੇ ਕੱਪੜਿਆਂ ‘ਚ ਆਏ ਕਿਸਾਨ ਨੂੰ ਮੈਟਰੋ ‘ਚ ਚੜਨ ਤੋਂ ਰੋਕਿਆ, ਗੱਲ ਪਹੁੰਚ ਗਈ ਉੱਪਰ ਤੱਕ, ਸਕਿਊਰਿਟੀ ਸੁਪਰਵਾਈਜ਼ਰ ਸਸਪੈਂਡ
ਬੈਂਗਲੁਰੂ (ਵੀਓਪੀ ਬਿਊਰੋ): ਬੈਂਗਲੁਰੂ ਮੈਟਰੋ ਰੇਲ ਕਾਰਪੋਰੇਸ਼ਨ ਵੱਲੋਂ ਇੱਕ ਮਾਮਲਾ ਸਾਹਮਣੇ ਆਇਆ ਹੈ। ਇੱਥੇ BMRCL ਕਰਮਚਾਰੀਆਂ ਨੇ ਇੱਕ ਕਿਸਾਨ ਨੂੰ ਟਰੇਨ ‘ਚ ਚੜ੍ਹਨ ਤੋਂ ਰੋਕਿਆ, ਕਾਰਨ ਸਿਰਫ ਇਹ ਸੀ ਕਿ ਕਿਸਾਨ ਨੇ ਫਟੇ ਕੱਪੜੇ ਪਾਏ ਹੋਏ ਸਨ। ਉਸ ਦੀ ਇਹ ਹਰਕਤ ਕੈਮਰੇ ‘ਚ ਕੈਦ ਹੋ ਗਈ, ਜਿਸ ਤੋਂ ਬਾਅਦ ਸੁਰੱਖਿਆ ਸੁਪਰਵਾਈਜ਼ਰ ਨੂੰ ਬਰਖਾਸਤ ਕਰ ਦਿੱਤਾ ਗਿਆ। ਮੈਟਰੋ ਟਰੇਨ ‘ਚ ਚੜ੍ਹਨ ਦੀ ਕੋਸ਼ਿਸ਼ ਕਰ ਰਹੇ ਕਿਸਾਨ ਨੇ ਫਟੇ ਕੱਪੜੇ ਪਾਏ ਹੋਏ ਸਨ ਅਤੇ ਸਿਰ ‘ਤੇ ਬੈਗ ਸੀ।
ਬੀਐਮਆਰਸੀਐਲ ਦੇ ਐਮਡੀ ਐਮ ਮਹੇਸ਼ਵਰ ਰਾਓ ਨੇ ਬਰਖਾਸਤਗੀ ਦੇ ਹੁਕਮ ਜਾਰੀ ਕੀਤੇ ਅਤੇ ਜਾਂਚ ਦਾ ਭਰੋਸਾ ਵੀ ਦਿੱਤਾ। BMRCL ਨੇ ਸੋਸ਼ਲ ਮੀਡੀਆ ‘ਤੇ ਕਿਹਾ, “ਨੰਮਾ ਮੈਟਰੋ ਇੱਕ ਜਨਤਕ ਆਵਾਜਾਈ ਹੈ। ਰਾਜਾਜੀਨਗਰ ਵਿੱਚ ਵਾਪਰੀ ਘਟਨਾ ਦੀ ਜਾਂਚ ਕੀਤੀ ਜਾ ਰਹੀ ਹੈ। ਸੁਰੱਖਿਆ ਸੁਪਰਵਾਈਜ਼ਰ ਨੂੰ ਬਰਖਾਸਤ ਕਰ ਦਿੱਤਾ ਗਿਆ ਹੈ। BMRCL ਯਾਤਰੀਆਂ ਨੂੰ ਹੋਈ ਅਸੁਵਿਧਾ ਲਈ ਅਫਸੋਸ ਪ੍ਰਗਟ ਕਰਦਾ ਹੈ।”
ਕਾਰਤਿਕ ਸੀ. ਏਰਾਨੀ ਨਾਂ ਦੇ ਯਾਤਰੀ ਨੇ ਅਧਿਕਾਰੀਆਂ ਨੂੰ ਸਵਾਲ ਕੀਤਾ ਸੀ ਜਦੋਂ ਕਿਸਾਨ ਨੂੰ ਟਿਕਟ ਖਰੀਦਣ ਤੋਂ ਬਾਅਦ ਵੀ ਟਰੇਨ ‘ਚ ਨਹੀਂ ਚੜ੍ਹਨ ਦਿੱਤਾ ਗਿਆ। ਇਸ ਗੱਲ ਨੂੰ ਲੈ ਕੇ ਸੁਰੱਖਿਆ ਸੁਪਰਵਾਈਜ਼ਰ ਨਾਲ ਉਨ੍ਹਾਂ ਦੀ ਤਿੱਖੀ ਬਹਿਸ ਹੋਈ। ਪਰ ਸੁਰੱਖਿਆ ਨੇ ਜਵਾਬ ਦਿੱਤਾ ਕਿ ਜੇਕਰ ਕਿਸਾਨ ਨੂੰ ਅੰਦਰ ਜਾਣ ਦਿੱਤਾ ਗਿਆ ਤਾਂ ਹੋਰ ਯਾਤਰੀ ਪ੍ਰੇਸ਼ਾਨ ਹੋਣਗੇ।
