ਭਾਰਤੀ ਭਗੌੜੇ ਦੀ ਭਾਲ ‘ਚ ਅਮਰੀਕਾ, ਜੋ ਲੱਭੇਗਾ ਉਸ ਨੂੰ ਮਿਲਣਗੇ ਸਵਾ 2 ਕਰੋੜ ਰੁਪਏ, ਵੱਡਾ ਕਾਂਡ ਕਰ ਕੇ ਹੋ ਗਿਆ ਸੀ ਫਰਾਰ
ਨਵੀਂ ਦਿੱਲੀ (ਵੀਓਪੀ ਬਿਊਰੋ) ਅਮਰੀਕਾ ਦੀ ਜਾਂਚ ਏਜੰਸੀ FBI ਨੇ ਇੱਕ ਭਾਰਤੀ ‘ਤੇ 2 ਕਰੋੜ ਰੁਪਏ ਤੋਂ ਵੱਧ ਦਾ ਇਨਾਮ ਰੱਖਿਆ ਹੈ। ਅਹਿਮਦਾਬਾਦ ਦੇ ਵੀਰਮਗਾਮ ਦਾ ਰਹਿਣ ਵਾਲਾ ਇਹ ਭਾਰਤੀ ਭਦਰੇਸ਼ਕੁਮਾਰ ਚੇਤਨਭਾਈ ਪਟੇਲ ਹੈ, ਜੋ ਅਮਰੀਕਾ ਦੇ ਦਸ ਮੋਸਟ ਵਾਂਟੇਡ ਭਗੌੜਿਆਂ ਦੀ ਸੂਚੀ ਵਿੱਚ ਸ਼ਾਮਲ ਹੈ। ਐਫਬੀਆਈ ਨੇ ਪਟੇਲ ਦੀ ਗ੍ਰਿਫ਼ਤਾਰੀ ਲਈ $250,000 (ਲਗਪਗ ਸਵਾ 2 ਕਰੋੜ ਰੁਪਏ) ਤੱਕ ਦੇ ਇਨਾਮ ਦਾ ਐਲਾਨ ਕੀਤਾ ਹੈ। ਭਦਰੇਸ਼ ਕੁਮਾਰ ਸਾਲ 2017 ਤੋਂ ਅਮਰੀਕਾ ਦੀ ਇਸ ਭਗੌੜੀ ਸੂਚੀ ਵਿੱਚ ਸ਼ਾਮਲ ਹੈ।
ਗੁਜਰਾਤ ਦੇ ਰਹਿਣ ਵਾਲੇ ਭਦਰੇਸ਼ਕੁਮਾਰ ਚੇਤਨਭਾਈ ਪਟੇਲ ਨੂੰ ਅਮਰੀਕਾ ਦਾ ਖੌਫਨਾਕ ਅਪਰਾਧੀ ਮੰਨਿਆ ਜਾਂਦਾ ਹੈ। ਉਹ ਅਮਰੀਕਾ ਦੀ ਮੋਸਟ ਵਾਂਟੇਡ ਸੂਚੀ ਵਿੱਚ ਵੀ ਸ਼ਾਮਲ ਹੈ। ਪਟੇਲ 12 ਅਪ੍ਰੈਲ, 2015 ਨੂੰ ਹੈਨੋਵਰ, ਮੈਰੀਲੈਂਡ ਵਿੱਚ ਇੱਕ ਡੋਨਟ ਦੀ ਦੁਕਾਨ ‘ਤੇ ਕੰਮ ਕਰਦੇ ਸਮੇਂ ਆਪਣੀ ਪਤਨੀ ਦੀ ਚਾਕੂ ਮਾਰ ਕੇ ਹੱਤਿਆ ਕਰਨ ਤੋਂ ਬਾਅਦ ਭਗੌੜਾ ਹੈ। ਹੁਣ ਐਫਬੀਆਈ ਨੇ ਪਟੇਲ ਨੂੰ ਫੜਨ ਲਈ ਇਨਾਮ ਦਾ ਐਲਾਨ ਵੀ ਕੀਤਾ ਹੈ।
ਇੱਕ ਸਥਾਨਕ ਅਧਿਕਾਰੀ ਨੇ ਦੱਸਿਆ ਕਿ ਭਾਰਤ ਤੋਂ ਅਮਰੀਕਾ ਆ ਕੇ ਵਸੇ ਭਦਰੇਸ਼ਕੁਮਾਰ ਨੇ ਦੁਕਾਨ ਵਿੱਚ ਹੀ ਆਪਣੀ ਪਤਨੀ ਪਲਕ ਦਾ ਕਤਲ ਕਰ ਦਿੱਤਾ ਸੀ। ਭਦਰੇਸ਼ ਨੇ ਆਪਣੀ ਪਤਨੀ ‘ਤੇ ਪਿੱਛੇ ਤੋਂ ਚਾਕੂ ਨਾਲ ਕਈ ਵਾਰ ਕੀਤੇ। ਉਸ ਸਮੇਂ ਭਦਰੇਸ਼ ਦੀ ਉਮਰ 24 ਸਾਲ ਅਤੇ ਪਤਨੀ 21 ਸਾਲ ਦੀ ਸੀ। ਪਤਨੀ ਪਲਕ ਪਟੇਲ ਆਪਣਾ ਵੀਜ਼ਾ ਖਤਮ ਹੋਣ ਤੋਂ ਬਾਅਦ ਭਾਰਤ ਪਰਤਣਾ ਚਾਹੁੰਦੀ ਸੀ ਪਰ ਪਤੀ ਨੇ ਇਸ ਦਾ ਵਿਰੋਧ ਕੀਤਾ ਅਤੇ ਤਕਰਾਰ ਵਧਣ ‘ਤੇ ਉਸ ਨੇ ਉਸ ਦਾ ਕਤਲ ਕਰ ਦਿੱਤਾ।
