ਸਹੁਰੇ ਦੇ 300 ਕਰੋੜ ਰੁਪਏ ਹੜੱਪਣ ਲਈ ਨੂੰਹ ਨੇ ਲਾਈ ਸਕੀਮ, 1 ਕਰੋੜ ਖਰਚ ਕੇ ਕਰਵਾ’ਤਾ ਕ+ਤ+ਲ, ਨਨਾਣ ਨੂੰ ਹਿੱਸਾ ਦੇਣ ਤੋਂ ਸੀ ਨਰਾਜ਼
ਵੀਓਪੀ ਬਿਊਰੋ- ਮਹਾਰਾਸ਼ਟਰ ਦੇ ਨਾਗਪੁਰ ‘ਚ ਇਕ ਹੈਰਾਨ ਕਰਨ ਵਾਲੀ ਘਟਨਾ ਸਾਹਮਣੇ ਆਈ ਹੈ। ਕਲਾਸ ਵਨ ਅਫਸਰ ਨੂੰਹ ਨੇ ਜਾਇਦਾਦ ਲਈ ਆਪਣੇ 82 ਸਾਲਾ ਸਹੁਰੇ ਦਾ ਕਤਲ ਕਰ ਦਿੱਤਾ ਹੈ। ਪਿਛਲੇ ਮਹੀਨੇ ਨਾਗਪੁਰ ਵਿੱਚ 82 ਸਾਲਾ ਪੁਰਸ਼ੋਤਮ ਪੁਟੇਵਾਰ ਦੀ ਕਾਰ ਦੀ ਟੱਕਰ ਨਾਲ ਮੌਤ ਹੋ ਗਈ ਸੀ। ਪੁਲਿਸ ਨੇ ਜਦੋਂ ਮਾਮਲੇ ਦੀ ਡੂੰਘਾਈ ਨਾਲ ਜਾਂਚ ਕੀਤੀ ਤਾਂ ਨੂੰਹ ਦੀ ਸਾਜ਼ਿਸ਼ ਦਾ ਖੁਲਾਸਾ ਹੋਇਆ।
ਮੁੱਖ ਸਾਜ਼ਿਸ਼ਕਰਤਾ ਨੂੰਹ ਨੇ ਇਸ ਕਤਲ ਦੀ ਇੰਨੀ ਮਜ਼ਬੂਤ ਯੋਜਨਾ ਬਣਾਈ ਸੀ ਕਿ ਹਰ ਕੋਈ ਬਜ਼ੁਰਗ ਦੀ ਮੌਤ ਨੂੰ ਹਿੱਟ ਐਂਡ ਰਨ ਦਾ ਮਾਮਲਾ ਸਮਝ ਰਿਹਾ ਸੀ ਪਰ ਜਾਂਚ ਦੌਰਾਨ ਸਾਰੇ ਭੇਤ ਖੁੱਲ੍ਹ ਗਏ। ਪੁਲਿਸ ਅਨੁਸਾਰ ਪੁਰਸ਼ੋਤਮ ਪੁਤੇਵਾਰ ਦਾ ਕਤਲ ਉਸਦੀ ਨੂੰਹ ਅਰਚਨਾ ਪੁਤੇਵਾਰ ਨੇ 300 ਕਰੋੜ ਰੁਪਏ ਦੀ ਪਰਿਵਾਰਕ ਜਾਇਦਾਦ ਨੂੰ ਲੈ ਕੇ ਕੀਤਾ ਸੀ।
ਟਾਊਨ ਪਲਾਨਿੰਗ ਵਿਭਾਗ ਦੀ ਅਸਿਸਟੈਂਟ ਡਾਇਰੈਕਟਰ ਅਰਚਨਾ ਪੁਤੇਵਾਰ ਨੂੰ ਪੁਲਿਸ ਨੇ ਪਿਛਲੇ ਹਫਤੇ ਗ੍ਰਿਫਤਾਰ ਕੀਤਾ ਸੀ। ਮ੍ਰਿਤਕ ਬਜ਼ੁਰਗ ਦਾ ਪੁੱਤਰ ਅਤੇ ਅਰਚਨਾ ਦਾ ਪਤੀ ਮਨੀਸ਼ ਪੁਤੇਵਾਰ ਪੇਸ਼ੇ ਤੋਂ ਡਾਕਟਰ ਹੈ। ਪੁਲਿਸ ਅਧਿਕਾਰੀ ਨੇ ਦੱਸਿਆ ਕਿ ਅਰਚਨਾ ਨੇ ਆਪਣੇ ਸਹੁਰੇ ਦੇ ਕਤਲ ਨੂੰ ਹਾਦਸੇ ਦਾ ਰੂਪ ਦੇਣ ਲਈ 1 ਕਰੋੜ ਰੁਪਏ ਖਰਚ ਕੀਤੇ। ਆਪਣੇ ਸਹੁਰੇ ਨੂੰ ਮਾਰਨ ਲਈ ਮੁਲਜ਼ਮ ਨੂੰ ਪੁਰਾਣੀ ਕਾਰ ਖਰੀਦਣ ਲਈ ਪੈਸੇ ਦਿੱਤੇ। ਕਾਤਲਾਂ ਦੇ ਖਾਤਿਆਂ ਵਿੱਚ ਵੀ ਲੱਖਾਂ ਰੁਪਏ ਭੇਜ ਦਿੱਤੇ।
ਅਧਿਕਾਰੀ ਨੇ ਦੱਸਿਆ ਕਿ 53 ਸਾਲਾ ਨੂੰਹ ਨੇ ਕਥਿਤ ਤੌਰ ‘ਤੇ ਆਪਣੇ ਪਤੀ ਦੇ ਡਰਾਈਵਰ ਬਾਗੜੇ ਅਤੇ ਦੋ ਹੋਰ ਦੋਸ਼ੀਆਂ – ਨੀਰਜ ਨਿਮਜੇ ਅਤੇ ਸਚਿਨ ਧਾਰਮਿਕ – ਨਾਲ ਮਿਲ ਕੇ ਕਤਲ ਦੀ ਸਾਜ਼ਿਸ਼ ਰਚੀ ਸੀ। ਪੁਲਿਸ ਨੇ ਸਾਰਿਆਂ ਦੇ ਖਿਲਾਫ ਕਤਲ ਅਤੇ ਹੋਰ ਆਈਪੀਸੀ ਧਾਰਾਵਾਂ ਅਤੇ ਮੋਟਰ ਵਹੀਕਲ ਐਕਟ ਦੇ ਤਹਿਤ ਮਾਮਲਾ ਦਰਜ ਕਰ ਲਿਆ ਹੈ। ਦੋ ਕਾਰਾਂ, ਸੋਨੇ ਦੇ ਗਹਿਣੇ ਅਤੇ ਮੋਬਾਈਲ ਫ਼ੋਨ ਵੀ ਜ਼ਬਤ ਕੀਤੇ ਗਏ ਹਨ।
ਪੁਲਿਸ ਜਾਂਚ ‘ਚ ਸਾਹਮਣੇ ਆਇਆ ਹੈ ਕਿ ਘਟਨਾ ਵਾਲੇ ਦਿਨ 22 ਮਈ ਨੂੰ ਪੁਰਸ਼ੋਤਮ ਪੁਤੇਵਾਰ ਆਪਣੀ ਪਤਨੀ ਸ਼ਕੁੰਤਲਾ ਨੂੰ ਮਿਲਣ ਹਸਪਤਾਲ ਗਿਆ ਸੀ। ਉਸ ਦੀ ਪਤਨੀ ਦਾ ਕੁਝ ਦਿਨ ਪਹਿਲਾਂ ਆਪਰੇਸ਼ਨ ਹੋਇਆ ਸੀ। ਹਸਪਤਾਲ ਤੋਂ ਵਾਪਸ ਆਉਂਦੇ ਸਮੇਂ ਨਾਗਪੁਰ ਦੇ ਮਾਨੇਵਾੜਾ ਚੌਕ ਨੇੜੇ ਇਕ ਕਾਰ ਨੇ ਉਸ ਨੂੰ ਕੁਚਲ ਦਿੱਤਾ। ਇਹ ਘਟਨਾ ਇੱਕ ਸੀਸੀਟੀਵੀ ਵਿੱਚ ਕੈਦ ਹੋ ਗਈ, ਜਿਸ ਵਿੱਚ ਪਿੱਛੇ ਤੋਂ ਆ ਰਹੀ ਕਾਰ ਪੁਰਸ਼ੋਤਮ ਨੂੰ ਜਾਣਬੁੱਝ ਕੇ ਟੱਕਰ ਮਾਰਦੀ ਨਜ਼ਰ ਆ ਰਹੀ ਹੈ।
ਨਾਗਪੁਰ ਦੇ ਪੁਲਿਸ ਕਮਿਸ਼ਨਰ ਰਵਿੰਦਰ ਸਿੰਘਲ ਨੇ ਕਿਹਾ ਕਿ ਕਤਲ ਦਾ ਕਾਰਨ ਜਾਇਦਾਦ ਵਿਵਾਦ ਸੀ। ਦਰਅਸਲ, ਪੁਰਸ਼ੋਤਮ ਆਪਣੀ ਕਰੋੜਾਂ ਦੀ ਜਾਇਦਾਦ ਦਾ ਕੁਝ ਹਿੱਸਾ ਆਪਣੀ ਬੇਟੀ ਨੂੰ ਵੀ ਦੇਣਾ ਚਾਹੁੰਦੇ ਸਨ। ਇਸ ਨੂੰ ਲੈ ਕੇ ਪਰਿਵਾਰ ‘ਚ ਕਈ ਦਿਨਾਂ ਤੋਂ ਵਿਵਾਦ ਚੱਲ ਰਿਹਾ ਸੀ। ਇਸ ਪੂਰੇ ਮਾਮਲੇ ‘ਚ ਨੂੰਹ ਸਮੇਤ 6 ਲੋਕਾਂ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ ਹੈ ਅਤੇ ਮਾਮਲੇ ਦੀ ਜਾਂਚ ਜਾਰੀ ਹੈ।
