ਪਾਪੂਆ ਨਿਊ ਗਿਨੀ ਵਿੱਚ ਨਸਲਕੁਸ਼ੀ ਦਾ ਇੱਕ ਵੱਡਾ ਮਾਮਲਾ ਸਾਹਮਣੇ ਆਇਆ ਹੈ। ਇੱਥੇ ਦੋ ਕਬੀਲਿਆਂ ਵਿਚਾਲੇ ਹੋਈ ਹਿੰਸਾ ਵਿੱਚ 16 ਬੱਚਿਆਂ ਸਮੇਤ 26 ਲੋਕਾਂ ਦੀ ਬੇਰਹਿਮੀ ਨਾਲ ਹੱਤਿਆ ਕਰ ਦਿੱਤੀ ਗਈ ਹੈ। ਮਰਨ ਵਾਲਿਆਂ ਦੀ ਗਿਣਤੀ ਵਧਣ ਦੀ ਸੰਭਾਵਨਾ ਹੈ ਕਿਉਂਕਿ ਕਾਤਲਾਂ ਨੇ ਆਪਣੇ ਕਈ ਸ਼ਿਕਾਰ ਮਗਰਮੱਛਾਂ ਦੇ ਹਵਾਲੇ ਕਰ ਦਿੱਤੇ ਹਨ।ਉਨ੍ਹਾਂ ਦਾ ਅਜੇ ਤੱਕ ਕੋਈ ਪਤਾ ਨਹੀਂ ਲੱਗ ਸਕਿਆ ਹੈ। ‘ਦਿ ਸਨ’ ਦੀ ਰਿਪੋਰਟ ਦੇ ਅਨੁਸਾਰ, ਹਥਿਆਰਬੰਦ ਲੜਾਕਿਆਂ ਨੇ ਕੁਝ ਪੀੜਤਾਂ ਦੇ ਗਲੇ ਵੱਢ ਦਿੱਤੇ ਅਤੇ ਬਾਕੀਆਂ ਨੂੰ ਕੁਹਾੜੀ ਨਾਲ ਮਾਰ ਦਿੱਤਾ।
ਦੋ ਕਬੀਲਿਆਂ ਵਿਚਾਲੇ ਲੜਾਈ ਦਾ ਇਹ ਮਾਮਲਾ ਪਾਪੁਆ ਨਿਊ ਗਿਨੀ ਦੇ ਅੰਦਰੂਨੀ ਇਲਾਕੇ ਪੂਰਬੀ ਸੇਪਿਕ ਸੂਬੇ ‘ਚ ਵਾਪਰਿਆ। ਇਸ ਵਿੱਚ 16 ਬੱਚਿਆਂ ਸਮੇਤ 26 ਮੌਤਾਂ ਦੀ ਪੁਸ਼ਟੀ ਹੋਈ ਹੈ। 200 ਤੋਂ ਵੱਧ ਲੋਕਾਂ ਨੂੰ ਆਪਣੀਆਂ ਜਾਨਾਂ ਬਚਾਉਣ ਲਈ ਘਰ ਛੱਡ ਕੇ ਭੱਜਣਾ ਪਿਆ ਕਿਉਂਕਿ ਕਾਤਲਾਂ ਨੇ ਤਿੰਨ ਪਿੰਡਾਂ ਨੂੰ ਅੱਗ ਲਾ ਦਿੱਤੀ ਸੀ। ਚਾਕੂਆਂ, ਕੁਹਾੜੀਆਂ ਅਤੇ ਹਥਿਆਰਾਂ ਨਾਲ ਲੈਸ ਹਮਲਾਵਰਾਂ ਨੇ 16 ਤੋਂ 18 ਜੁਲਾਈ ਦਰਮਿਆਨ ਇਸ ਘਟਨਾ ਨੂੰ ਅੰਜਾਮ ਦਿੱਤਾ। ਹਮਲਾਵਰਾਂ ‘ਚ 30 ਦੇ ਕਰੀਬ ਨੌਜਵਾਨ ਸ਼ਾਮਲ ਸਨ, ਜੋ ਘਟਨਾ ਤੋਂ ਬਾਅਦ ਫਰਾਰ ਹਨ।
ਘਟਨਾ ਦੇ ਇਕ ਹਫਤੇ ਬਾਅਦ ਜਦੋਂ ਨੈਸ਼ਨਲ ਪੁਲਿਸ ਮੌਕੇ ‘ਤੇ ਪਹੁੰਚੀ ਤਾਂ ਹੀ ਜਾਂਚ ਸ਼ੁਰੂ ਹੋਈ। ਸਥਾਨਕ ਮੀਡੀਆ ਮੁਤਾਬਕ ਪੁਲਿਸ ਨੇ ਮੁੱਖ ਹਮਲਾਵਰਾਂ ਦੀ ਪਛਾਣ ਕਰ ਲਈ ਹੈ। ਅੰਗੋਰਾਮ ਪੁਲਿਸ ਇੰਸਪੈਕਟਰ ਪੀਟਰ ਮੰਡੀ ਨੇ ਕਿਹਾ ਕਿ ਹਮਲਾਵਰਾਂ ਨੇ ਆਪਣੀ ਪਛਾਣ ‘ਆਈ ਡੋਂਟ ਕੇਅਰ’ ਵਜੋਂ ਕੀਤੀ, ਗਾਰਡੀਅਨ ਨੇ ਰਿਪੋਰਟ ਦਿੱਤੀ।ਘਟਨਾ ਦੇ ਚਸ਼ਮਦੀਦਾਂ ਨੇ ਦੱਸਿਆ ਕਿ ਉਨ੍ਹਾਂ ਨੇ ਪੀੜਤਾਂ ਦੀਆਂ ਚੀਕਾਂ ਸੁਣੀਆਂ, ਉਨ੍ਹਾਂ ‘ਚੋਂ ਕਈਆਂ ਨੂੰ ਆਪਣੀਆਂ ਅੱਖਾਂ ਨਾਲ ਕਤਲ ਹੁੰਦੇ ਦੇਖਿਆ ਪਰ ਆਪਣੀ ਜਾਨ ਬਚਾਉਣ ਲਈ ਡੰਗੋਰੀ ‘ਤੇ ਸਵਾਰ ਹੋ ਕੇ ਭੱਜ ਗਏ। ਇਕ ਔਰਤ ਨੇ ਦੱਸਿਆ ਕਿ ਉਹ ਬਲਾਤਕਾਰੀ ਪੀੜਤ ਔਰਤਾਂ ਦੀਆਂ ਦਰਦਨਾਕ ਚੀਕਾਂ, ਬੱਚਿਆਂ ਦੇ ਰੋਣ ਦੀਆਂ ਆਵਾਜ਼ਾਂ ਸੁਣ ਰਹੀ ਸੀ ਪਰ ਹਮਲਾਵਰ ਉਸ ਨੂੰ ਦੇਖ ਨਹੀਂ ਸਕੇ ਜਿਸ ਕਾਰਨ ਉਹ ਬਚ ਗਈ।
ਪਾਪੂਆ ਨਿਊ ਗਿਨੀ ਵਿੱਚ ਕਬੀਲਿਆਂ ਦਰਮਿਆਨ ਹਿੰਸਾ ਦਾ ਇੱਕ ਲੰਮਾ ਇਤਿਹਾਸ ਹੈ। ਇਹ ਪਿਛਲੇ ਸਾਲਾਂ ਵਿੱਚ ਲਗਾਤਾਰ ਵਧ ਰਿਹਾ ਹੈ। ਨਾਜਾਇਜ਼ ਤੌਰ ‘ਤੇ ਲਿਆਂਦੇ ਹਥਿਆਰਾਂ ਅਤੇ ਭਾੜੇ ਦੇ ਸ਼ੂਟਰਾਂ ਨੇ ਇਸ ‘ਚ ਵੱਡੀ ਭੂਮਿਕਾ ਨਿਭਾਈ ਹੈ। ਹਿੰਸਾ ਹਰ ਸਾਲ ਬਦਤਰ ਹੁੰਦੀ ਜਾ ਰਹੀ ਹੈ। ਫਰਵਰੀ 2024 ਵਿੱਚ, ਦੋ ਕਬੀਲਿਆਂ ਦਰਮਿਆਨ ਲੜਾਈ ਵਿੱਚ 64 ਲੋਕ ਮਾਰੇ ਗਏ ਸਨ।ਕਬੀਲਿਆਂ ਦੀ ਵਧਦੀ ਆਬਾਦੀ ਨੇ ਆਪਸੀ ਮੁਕਾਬਲੇ ਨੂੰ ਜਨਮ ਦਿੱਤਾ ਹੈ। ਪਾਪੂਆ ਨਿਊ ਗਿਨੀ ਦੀ ਆਬਾਦੀ 1980 ਤੋਂ ਦੁੱਗਣੀ ਹੋ ਗਈ ਹੈ। ਆਬਾਦੀ ਦਾ ਅਧਿਕਾਰਤ ਅੰਕੜਾ 1 ਕਰੋੜ ਹੈ। ਹਾਲਾਂਕਿ, ਸੰਯੁਕਤ ਰਾਸ਼ਟਰ ਦੇ ਅਨੁਸਾਰ, ਪਾਪੂਆ ਨਿਊ ਗਿਨੀ ਦੀ ਆਬਾਦੀ 17 ਮਿਲੀਅਨ ਹੈ।
