ਮੱਧ ਪ੍ਰਦੇਸ਼ ਤੋਂ ਇੱਕ ਹੈਰਾਨੀਜਨਕ ਮਾਮਲਾ ਸਾਹਮਣੇ ਆਇਆ ਹੈ। ਜਿੱਥੇ ਇਕ ਮਹਿਲਾ ਕਾਂਸਟੇਬਲ ਨੇ ਆਪਣੇ ਪ੍ਰੇਮੀ ਨਾਲ ਮਿਲ ਕੇ ਸਬ ਇੰਸਪੈਕਟਰ ਦਾ ਕਤਲ ਕਰ ਦਿੱਤਾ। ਮਹਿਲਾ ਕਾਂਸਟੇਬਲ ਨੇ ਆਪਣੇ ਪ੍ਰੇਮੀ ਨਾਲ ਮਿਲ ਕੇ ਐਸਆਈ ਦੀਪਾਂਕਰ ਗੌਤਮ ਨੂੰ ਕਾਰ ਥੱਲੇ ਦਰੜ ਦਿੱਤਾ। ਇਸ ਦੇ ਬਾਵਜੂਦ ਉਸ ਦਾ ਦਿਲ ਨਹੀਂ ਭਰਿਆ ਅਤੇ ਐਸਆਈ ਨੂੰ 30 ਮੀਟਰ ਤੱਕ ਘਸੀਟਦੀ ਰਹੀ।ਵਾਰਦਾਤ ਨੂੰ ਅੰਜਾਮ ਦੇਣ ਤੋਂ ਬਾਅਦ ਮਹਿਲਾ ਕਾਂਸਟੇਬਲ ਪੱਲਵੀ ਅਤੇ ਉਸ ਦਾ ਪ੍ਰੇਮੀ ਕਰਨ ਠਾਕੁਰ ਦਿਹਾਤ ਥਾਣੇ ਪਹੁੰਚੇ ਅਤੇ ਪੁਲਿਸ ਵਾਲਿਆਂ ਨੂੰ ਝੂਠੀ ਕਹਾਣੀ ਸੁਣਾਈ। ਉਨ੍ਹਾਂ ਦੱਸਿਆ ਕਿ ਉਨ੍ਹਾਂ ਦੀ ਕਾਰ ਦਾ ਐਕਸੀਡੈਂਟ ਹੋ ਗਿਆ ਹੈ। ਮਾਮਲਾ ਉਦੋਂ ਸਾਹਮਣੇ ਆਇਆ ਜਦੋਂ ਪੁਲਿਸ ਨੇ ਮਹਿਲਾ ਕਾਂਸਟੇਬਲ ਤੋਂ ਸਖ਼ਤੀ ਨਾਲ ਪੁੱਛਗਿੱਛ ਕੀਤੀ। ਕਤਲ ਪਿੱਛੇ ਪਿਆਰ ਅਤੇ ਧੋਖੇ ਦਾ ਮਾਮਲਾ ਸਾਹਮਣੇ ਆਇਆ ਹੈ।
ਇਹ ਘਟਨਾ ਮੰਗਲਵਾਰ ਯਾਨੀ 10 ਸਤੰਬਰ ਨੂੰ ਵਾਪਰੀ। ਮਹਿਲਾ ਕਾਂਸਟੇਬਲ ਪੱਲਵੀ ਦੀ ਕਾਰ ਨੇ ਬਾਈਕ ਸਵਾਰ ਐੱਸਆਈ ਦੀਪਾਂਕਰ ਗੌਤਮ ਨੂੰ ਟੱਕਰ ਮਾਰ ਦਿੱਤੀ। ਹਾਦਸੇ ‘ਚ ਦੀਪਾਂਕਰ ਗੰਭੀਰ ਰੂਪ ‘ਚ ਜ਼ਖਮੀ ਹੋ ਗਿਆ ਅਤੇ ਪੱਲਵੀ ਨੂੰ ਵੀ ਮਾਮੂਲੀ ਸੱਟਾਂ ਲੱਗੀਆਂ।ਜ਼ਖ਼ਮੀ ਐਸਆਈ ਨੂੰ ਬੇਵਰ ਸਿਵਲ ਹਸਪਤਾਲ ਲਿਜਾਇਆ ਗਿਆ ਪਰ ਡਾਕਟਰਾਂ ਨੇ ਉਸ ਨੂੰ ਉੱਚ ਕੇਂਦਰ ਰੈਫਰ ਕਰ ਦਿੱਤਾ। ਪਰ ਇਸ ਤੋਂ ਪਹਿਲਾਂ ਕਿ ਦੀਪਾਂਕਰ ਨੂੰ ਕਿਸੇ ਹੋਰ ਹਸਪਤਾਲ ਲਿਜਾਇਆ ਜਾਂਦਾ, ਰਸਤੇ ਵਿਚ ਹੀ ਉਸ ਦੀ ਮੌਤ ਹੋ ਗਈ।
ਦਰਅਸਲ ਮਹਿਲਾ ਕਾਂਸਟੇਬਲ ਅਤੇ ਉਸ ਦੇ ਦੋਸਤ ਕਰਨ ਵਿਚਾਲੇ ਅਫੇਅਰ ਚੱਲ ਰਿਹਾ ਸੀ। ਕੁਝ ਦਿਨ ਪਹਿਲਾਂ ਆਪਸੀ ਝਗੜੇ ਕਾਰਨ ਦੋਵੇਂ ਵੱਖ ਹੋ ਗਏ ਸਨ। ਇਸ ਦੌਰਾਨ ਐਸਆਈ ਦੀਪਾਂਕਰ ਦੀ ਪੱਲਵੀ ਨਾਲ ਦੋਸਤੀ ਹੋ ਗਈ। ਪਰ ਜਦੋਂ ਕਰਨ ਨੂੰ ਇਸ ਗੱਲ ਦੀ ਜਾਣਕਾਰੀ ਮਿਲੀ ਤਾਂ ਉਹ ਫਿਰ ਤੋਂ ਪੱਲਵੀ ਕੋਲ ਪਹੁੰਚ ਗਿਆ ਅਤੇ ਦੋਵੇਂ ਆਪਣੀ ਪੁਰਾਣੀ ਰੰਜਿਸ਼ ਭੁਲਾ ਕੇ ਫਿਰ ਤੋਂ ਇਕ ਹੋ ਗਏ।ਇਸ ਦੌਰਾਨ ਪੱਲਵੀ ਅਤੇ ਕਰਨ ਨੇ ਵੱਡਾ ਫੈਸਲਾ ਲਿਆ। ਇਹ ਫੈਸਲਾ ਦੀਪਾਂਕਰ ਨੂੰ ਰਸਤੇ ਤੋਂ ਹਟਾਉਣ ਦਾ ਸੀ।ਇਸ ਦੇ ਮੱਦੇਨਜ਼ਰ ਫੈਸਲਾ ਕੀਤਾ ਗਿਆ ਕਿ ਕਾਰ ਨਾਲ ਹਾਦਸਾ ਕਰਵਾ ਕੇ ਦੀਪਾਂਕਰ ਨੂੰ ਮਾਰ ਦੇਣਾ ਹੀ ਬਿਹਤਰ ਹੋਵੇਗਾ।ਇਸ ਤਰ੍ਹਾਂ ਉਸ ਦੀ ਮੌਤ ਇਕ ਦੁਰਘਟਨਾ ਜਾਪੇਗੀ ਅਤੇ ਕਿਸੇ ਨੂੰ ਉਨ੍ਹਾਂ ‘ਤੇ ਸ਼ੱਕ ਨਹੀਂ ਹੋਵੇਗਾ। ਇਸ ਯੋਜਨਾ ਤਹਿਤ ਮੰਗਲਵਾਰ ਨੂੰ ਪੱਲਵੀ ਨੇ ਦੀਪਾਂਕਰ ਨੂੰ ਆਪਣੇ ਕੋਲ ਬੁਲਾਇਆ ਅਤੇ ਕਾਰ ਨਾਲ ਟੱਕਰ ਮਾਰ ਕੇ ਉਸ ਦੀ ਹੱਤਿਆ ਕਰ ਦਿੱਤੀ। ਇਸ ਮਾਮਲੇ ਵਿੱਚ ਐਸਪੀ ਆਦਿਤਿਆ ਮਿਸ਼ਰਾ ਨੇ ਐਸਡੀਓਪੀ ਦਫ਼ਤਰ ਵਿੱਚ ਦੇਰ ਰਾਤ ਤੱਕ ਮਹਿਲਾ ਕਾਂਸਟੇਬਲ ਤੋਂ ਪੁੱਛਗਿੱਛ ਕੀਤੀ।
ਪੁਲਿਸ ਦੀ ਸਖ਼ਤੀ ਨੂੰ ਵੇਖਦਿਆਂ ਉਸ ਨੇ ਦੋਸ਼ ਕਬੂਲ ਕਰ ਲਿਆ। ਉਸ ਨੇ ਕਿਹਾ ਕਿ ਦੀਪਾਂਕਰ ਸਾਡੇ ਪਿਆਰ ਵਿਚਕਾਰ ਆ ਰਿਹਾ ਸੀ, ਇਸ ਲਈ ਸਾਨੂੰ ਉਸ ਨੂੰ ਖਤਮ ਕਰਨਾ ਪਿਆ। ਫਿਲਹਾਲ ਕਤਲ ਦੀਆਂ ਧਾਰਾਵਾਂ ਤਹਿਤ ਮਾਮਲਾ ਦਰਜ ਕਰਕੇ ਅਗਲੇਰੀ ਕਾਰਵਾਈ ਕੀਤੀ ਜਾ ਰਹੀ ਹੈ।
