ਕੌਮਾਂਤਰੀ ਸਰਹੱਦ ਨੇੜੇ ਮੈਵਿੱਕ 3 ਕਲਾਸਿਕ ਡਰੋਨ ਬਰਾਮਦ
ਮਮਦੋਟ, 18 ਨਵੰਬਰ (ਗੁਰਪ੍ਰੀਤ ਸਿੰਘ ਸੰਧੂ) ਪੰਜਾਬ ਪੁਲਸ ਅਤੇ ਬੀ ਐੱਸ ਐੱਫ ਦੀ 155 ਬਟਾਲੀਅਨ ਵੱਲੋਂ ਇੱਕ ਸਾਂਝੇ ਅਪ੍ਰੇਸ਼ਨ ਦੌਰਾਨ ਪੁਲਸ ਥਾਣਾ ਮਮਦੋਟ ਅਧੀਨ ਆਉਂਦੇ ਪਿੰਡ ਚੱਕ ਭੰਗੇਵਾਲਾ (ਗੱਟੀ ਹਯਾਤ) ਅਧੀਨ ਆਓਂਦੇ ਖੇਤਰ ਵਿੱਚ ਭਾਰਤ-ਪਾਕਿ ਕੌਮਾਂਤਰੀ ਸਰਹਦ ਨੇੜਿਉਂ ਇੱਕ ਡਰੋਨ ਬਰਾਮਦ ਕੀਤਾ ਗਿਆ ਹੈ|
ਇਸ ਸਬੰਧੀ ਜਾਣਕਾਰੀ ਦੇਦੇ ਹੋਏ ਕਰਨ ਸ਼ਰਮਾ ਡੀ ਐੱਸ ਪੀ ਫਿਰੋਜ਼ਪੁਰ ਦਿਹਾਤੀ ਨੇ ਦੱਸਿਆ ਕਿ ਬੀਤੇ ਕੱਲ੍ਹ 17 ਨਵੰਬਰ ਨੂੰ ਗੁਪਤ ਸੂਚਨਾ ਮਿਲੀ ਕਿ ਪਿੰਡ ਗੱਟੀ ਹਯਾਤ ਦੇ ਖੇਤਰ ਵਿੱਚ ਫੈਂਸਿੰਗ ਦੇ ਨਜਦੀਕ ਇੱਕ ਡਰੋਨ ਗਿਰਿਆ ਹੋਇਆ ਹੈ| ਸੂਚਨਾ ਮਿਲਦਿਆਂ ਹੀ ਬੀ ਐੱਸ ਐੱਫ ਨੇ ਪੰਜਾਬ ਪੁਲਸ ਨੂੰ ਸੂਚਿਤ ਕੀਤਾ ਤੇ ਪੰਜਾਬ ਪੁਲਸ ਅਤੇ ਬੀ ਐੱਸ ਦੇ ਸਾਂਝੇ ਅਪ੍ਰੇਸ਼ਨ ਦੌਰਾਨ ਮੈਵਿੱਕ 3 ਕਲਾਸਿਕ ਡਰੋਨ ਜੋ ਕਿ 500 ਗ੍ਰਾਮ ਭਾਰ ਚੁੱਕਣ ਦੀ ਸਮਰੱਥਾ ਰੱਖਦਾ ਹੈ|
ਉਹਨਾਂ ਦੱਸਿਆ ਕਿ ਡਰੋਨ ਦੇ ਆਸ-ਪਾਸ ਦੇ ਖੇਤਰ ਵਿੱਚ ਸਰਚ ਕਰਨ ‘ਤੇ ਕੋਈ ਵੀ ਪਦਾਰਥ ਬਰਾਮਦ ਨਹੀ ਹੋਇਆ| ਪਰੰਤੂ ਫਿਰ ਵੀ ਇਸ ਸਬੰਧੀ ਫਰੇੰਸਿਕ ਮਾਹਿਰਾਂ ਵੱਲੋਂ ਜਾਂਚ ਕੀਤੀ ਜਾਵੇਗੀ| ਇਸ ਮੌਕੇ ਉਹਨਾਂ ਨਾਲ ਬੀਐੱਸਐੱਫ ਦੇ ਇੰਸਪੈਕਟਰ ਅਤੇ ਥਾਣਾ ਮੁਖੀ ਮਮਦੋਟ ਇੰਸਪੈਕਟਰ ਅਭਿਨਵ ਚੋਹਾਨ ਵੀ ਮੌਜੂਦ ਸਨ|
