(ਵੀਓਪੀ ਬਿਊਰੋ) ਉੱਤਰ ਪ੍ਰਦੇਸ਼ ਦੇ ਬਰੇਲੀ ਤੋਂ ਇਕ ਦਿਲ ਦਹਿਲਾ ਦੇਣ ਵਾਲੀ ਘਟਨਾ ਸਾਹਮਣੇ ਆਈ ਹੈ। ਇੱਥੇ ਇਕ ਨਵ-ਵਿਆਹੁਤਾ ਨਹਾਉਣ ਲਈ ਬਾਥਰੂਮ ਗਈ ਸੀ ਪਰ ਲਾਸ਼ ਬਣ ਕੇ ਬਾਹਰ ਨਿਕਲੀ। ਦਰਅਸਲ, ਇਸ ਮਹਿਲਾ ਦੀ ਗੀਜ਼ਰ ਫਟਣ ਕਾਰਨ ਮੌਤ ਹੋ ਗਈ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਮਹਿਲਾ ਨਹਾਉਣ ਲਈ ਬਾਥਰੂਮ ਗਈ ਸੀ ਪਰ ਗੀਜ਼ਰ ਫਟਣ ਕਾਰਨ ਉਸ ਦੀ ਜਾਨ ਚਲੀ ਗਈ। ਮ੍ਰਿਤਕਾ ਦਾ ਨਾਂ ਦਾਮਿਨੀ ਅਤੇ ਉਸ ਦੇ ਪਤੀ ਦਾ ਨਾਂ ਦੀਪਕ ਯਾਦਵ ਦੱਸਿਆ ਜਾ ਰਿਹਾ ਹੈ।
ਬਰੇਲੀ ਦੇ ਭੋਜੀਪੁਰਾ ਥਾਣਾ ਖੇਤਰ ਦੇ ਪੀਪਲਸਾਨਾ ਚੌਧਰੀ ਪਿੰਡ ਦੇ ਰਹਿਣ ਵਾਲੇ ਦੀਪਕ ਅਤੇ ਬੁਲੰਦਸ਼ਹਿਰ ਦੀ ਰਹਿਣ ਵਾਲੀ ਦਾਮਿਨੀ ਦਾ ਵਿਆਹ 22 ਨਵੰਬਰ ਨੂੰ ਹੋਇਆ ਸੀ। ਉਸ ਦੇ ਪਤੀ ਦੀਪਕ ਅਨੁਸਾਰ ਦਾਮਿਨੀ ਰੋਜ਼ਾਨਾ ਦੀ ਤਰ੍ਹਾਂ ਨਹਾਉਣ ਲਈ ਬਾਥਰੂਮ ਗਈ ਸੀ ਪਰ ਜਦੋਂ ਉਹ ਕਾਫੀ ਦੇਰ ਤੱਕ ਬਾਹਰ ਨਹੀਂ ਆਈ ਅਤੇ ਨਾ ਹੀ ਉਸ ਨੂੰ ਬੁਲਾਉਣ ‘ਤੇ ਉਸ ਨੇ ਕੋਈ ਜਵਾਬ ਦਿੱਤਾ ਤਾਂ ਬਾਥਰੂਮ ਦਾ ਦਰਵਾਜ਼ਾ ਤੋੜਨਾ ਪਿਆ।
ਇਸ ਤੋਂ ਬਾਅਦ ਪਰਿਵਾਰ ਨੇ ਦੇਖਿਆ ਕਿ ਦਾਮਿਨੀ ਫਰਸ਼ ‘ਤੇ ਬੇਹੋਸ਼ ਪਈ ਸੀ ਅਤੇ ਗੀਜ਼ਰ ਬਲਾਸਟ ਹੋ ਗਿਆ ਸੀ। ਅਜਿਹੇ ‘ਚ ਦਾਮਿਨੀ ਨੂੰ ਤੁਰੰਤ ਹਸਪਤਾਲ ਲਿਜਾਇਆ ਗਿਆ, ਜਿੱਥੇ ਜਾਂਚ ਤੋਂ ਬਾਅਦ ਡਾਕਟਰਾਂ ਨੇ ਉਸ ਨੂੰ ਮ੍ਰਿਤਕ ਐਲਾਨ ਦਿੱਤਾ। ਫਿਲਹਾਲ ਲਾਸ਼ ਪੁਲਿਸ ਦੇ ਕਬਜ਼ੇ ‘ਚ ਹੈ ਅਤੇ ਪੋਸਟਮਾਰਟਮ ਲਈ ਭੇਜ ਦਿੱਤੀ ਗਈ ਹੈ।
ਅੱਜਕਲ੍ਹ ਜ਼ਿਆਦਾਤਰ ਲੋਕ ਗੀਜ਼ਰ ਦੀ ਵਰਤੋਂ ਕਰਦੇ ਹਨ ਅਤੇ ਇਹ ਉਨ੍ਹਾਂ ਦੇ ਬਾਥਰੂਮ ‘ਚ ਹੁੰਦਾ ਹੈ। ਹਾਲਾਂਕਿ, ਜੇਕਰ ਜਗ੍ਹਾ ਘੱਟ ਹੈ ਅਤੇ ਗੀਜ਼ਰ ਦੇ ਸਵਿੱਚ ਬੋਰਡ ‘ਤੇ ਪਾਣੀ ਡਿੱਗਣ ਦਾ ਡਰ ਹੈ, ਤਾਂ ਤੁਹਾਨੂੰ ਨਹਾਉਣ ਤੋਂ ਪਹਿਲਾਂ ਗੀਜ਼ਰ ਦੇ ਬਟਨ ਨੂੰ ਬੰਦ ਕਰਨ ਦਾ ਖਾਸ ਧਿਆਨ ਰੱਖਣਾ ਚਾਹੀਦਾ ਹੈ।
ਗੀਜ਼ਰ ਦੀ ਵਰਤੋਂ ਕਰਦੇ ਸਮੇਂ ਧਿਆਨ ਰੱਖੋ ਕਿ ਇਸ ਤੋਂ ਕੋਈ ਆਵਾਜ਼ ਨਾ ਆ ਰਹੀ ਹੋਵੇ ਜੋ ਅਜੀਬ ਲੱਗੇ। ਇੱਕ ਵੱਖਰੀ ਕਿਸਮ ਦੀ ਆਵਾਜ਼ ਵੀ ਗੀਜ਼ਰ ਵਿੱਚ ਖਰਾਬੀ ਜਾਂ ਨੁਕਸ ਦਾ ਸੰਕੇਤ ਹੋ ਸਕਦੀ ਹੈ। ਇਸ ਨਾਲ ਗੀਜ਼ਰ ਵੀ ਫਟ ਸਕਦਾ ਹੈ। ਇਸ ਲਈ, ਜਦੋਂ ਵੀ ਤੁਹਾਨੂੰ ਗੀਜ਼ਰ ਵਿੱਚ ਕੋਈ ਨੁਕਸ ਮਹਿਸੂਸ ਹੁੰਦਾ ਹੈ ਜਾਂ ਆਵਾਜ਼ ਵਿੱਚ ਕੋਈ ਗੜਬੜ ਹੁੰਦੀ ਹੈ, ਤਾਂ ਤੁਰੰਤ ਇਲੈਕਟ੍ਰੀਸ਼ੀਅਨ ਤੋਂ ਇਸ ਦੀ ਜਾਂਚ ਕਰਵਾਓ।
