‘ਖੇਡ ਭਾਰਤੀ ਪੰਜਾਬ’ ਵੱਲੋਂ ‘ਪੰਜਾਬ ਕ੍ਰਿਕੇਟ ਐਸੋਸੀਏਸ਼ਨ’ ਦੀ ਅਗਵਾਈ ਚ’ ਬਰਲਟਨ ਪਾਰਕ ਵਿਖੇ ਕਰਵਾਏ ਜਾ ਰਹੇ ਪਹਿਲੇ ਟੀ-20 ਕ੍ਰਿਕੇਟ ਟੂਰਨਾਮੈਂਟ ‘ਸ਼ਾਨ-ਏ-ਪੰਜਾਬ ਕੱਪ’ ਦੇ ਤੀਜੇ ਦਿਨ ਪੰਜਾਬ ਦੇ ਯੁਵਾ ਆਗੂ ਸ.ਗਗਨਦੀਪ ਸਿੰਘ (ਸੰਨੀ) ਕੈਂਥ ਅਤੇ ਸ.ਨਰਿੰਦਰਪਾਲ ਸਿੰਘ ਢਿੱਲੋਂ ਨੇ ਸ਼ਿਰਕਤ ਕੀਤੀ ਅਤੇ ਨੌਜਵਾਨਾਂ ਨੂੰ ਖੇਡਾਂ ਨਾਲ ਜੋੜਨ ਅਤੇ ਨਸ਼ਿਆਂ ਤੋਂ ਦੂਰ ਰੱਖਣ ਲਈ ‘ਖੇਡ ਭਾਰਤੀ ਪੰਜਾਬ’ ਵੱਲੋਂ ਚਲਾਈ ਜਾ ਰਹੀ ਮੁਹਿੰਮ ਦੀ ਸ਼ਲਾਘਾ ਕੀਤੀ ਅਤੇ ਪੰਜਾਬ ਨੂੰ ਮੁੜ ਰੰਗਲਾ ਪੰਜਾਬ ਬਣਾਉਣ ਲਈ ਨੌਜਵਾਨਾਂ ਨੂੰ ਖੇਡਾਂ ਨਾਲ ਜੁੜਨ ਦੀ ਅਪੀਲ ਕੀਤੀ।
ਇਸ ਮੌਕੇ ‘ਖੇਡ ਭਾਰਤੀ ਪੰਜਾਬ’ ਦੇ ਪ੍ਰਧਾਨ ਰਾਣਾ ਅਰਵਿੰਦ ਸਿੰਘ ਅਤੇ ਸੰਯੁਕਤ ਸਕੱਤਰ ਦੀਪਕ ਸ਼ਰਮਾ ਨੇ ਦੱਸਿਆ ਕਿ ਇਸ ਕ੍ਰਿਕੇਟ ਟੂਰਨਾਮੈਂਟ ਵਿੱਚ ਪੰਜਾਬ ਭਰ ਤੋਂ ਕੁੱਲ 16 ਟੀਮਾਂ ਭਾਗ ਲੈ ਰਹੀਆਂ ਹਨ, ਜਿਨ੍ਹਾਂ ਵਿੱਚੋਂ 7 ਵੱਖ-ਵੱਖ ‘ਡਿਸਟ੍ਰਿਕਟ ਕ੍ਰਿਕੇਟ ਐਸੋਸੀਏਸ਼ਨ’ ਦੀਆਂ ਟੀਮਾਂ ਅਤੇ 9 ਕ੍ਰਿਕੇਟ ਕਲੱਬਾਂ ਦੀਆਂ ਟੀਮਾਂ ਸ਼ਾਮਲ ਹਨ। ਇਸ ਕ੍ਰਿਕੇਟ ਟੂਰਨਾਮੈਂਟ ਦਾ ਮੁੱਖ ਉਦੇਸ਼ ‘ਖੇਡ ਭਾਰਤੀ ਪੰਜਾਬ’ ਵੱਲੋਂ ਚਲਾਈ ਜਾ ਰਹੀ ਮੁਹਿੰਮ ‘ਨਸ਼ਿਆਂ ਖ਼ਿਲਾਫ਼ ਖੜੇ ਸਾਰਾ ਪੰਜਾਬ, ਨਸ਼ਿਆਂ ਖ਼ਿਲਾਫ਼ ਖੇਡ ਭਾਰਤੀ ਪੰਜਾਬ’ ਨੂੰ ਹੁਲਾਰਾ ਦੇਣਾ ਹੈ, ਤਾਂ ਜੋ ਨੌਜਵਾਨਾਂ ਨੂੰ ਨਸ਼ਿਆਂ ਦੇ ਚੁੰਗਲ ਤੋਂ ਦੂਰ ਰੱਖਿਆ ਜਾ ਸਕੇ ਅਤੇ ਉਨ੍ਹਾਂ ਨੂੰ ਖੇਡਾਂ ਨਾਲ ਜੋੜਿਆ ਜਾ ਸਕੇ ਅਤੇ ਇਸ ਮੁਹਿੰਮ ਵਿੱਚ ‘ਖੇਡ ਭਾਰਤੀ ਪੰਜਾਬ’ ਨੂੰ ‘ਪੰਜਾਬ ਕ੍ਰਿਕੇਟ ਐਸੋਸੀਏਸ਼ਨ’, ‘ਜੇ.ਡੀ.ਸੀ.ਏ.’, ਅਤੇ ‘ਸਿੱਧੂ ਸਪੋਰਟਸ ਮੈਨੇਜਮੈਂਟ’ ਦਾ ਪੂਰਾ ਸਮਰਥਨ ਮਿਲ ਰਿਹਾ ਹੈ।
ਮੰਗਲਵਾਰ ਨੂੰ ਪਹਿਲਾ ਮੈਚ ‘ਕੇ.ਜੀ.ਐੱਫ਼. ਫਰੈਂਡਜ਼ ਕਲੱਬ ਫਤਿਹਗੜ੍ਹ’ ਅਤੇ ‘ਸੋਲ ਜਗੀਰ ਨਕੋਦਰ’ ਵਿਚਕਾਰ ਖੇਡਿਆ ਗਿਆ। ਜਿੱਥੇ ਪਹਿਲਾਂ ਬੱਲੇਬਾਜ਼ੀ ਕਰਦੇ ਹੋਏ ‘ਕੇ.ਜੀ.ਐੱਫ਼. ਫਰੈਂਡਜ਼ ਕਲੱਬ ਫਤਿਹਗੜ੍ਹ’ ਦੀ ਟੀਮ ਨੇ ਸਿਰਫ 2 ਵਿਕਟਾਂ ਗੁਵਾ ਕੇ 178 ਰਨ ਬਣਾਏ, ਜਦ ਕਿ ‘ਸੋਲ ਜਗੀਰ ਨਕੋਦਰ’ ਦੇ ਖਿਡਾਰੀਆਂ ਦੀ ਟੀਮ 52 ਰਨ ਬਣਾ ਕੇ ਹੀ ਆਲ ਆਊਟ ਹੋ ਗਈ। ‘ਕੇ.ਜੀ.ਐੱਫ਼. ਫਰੈਂਡਜ਼ ਕਲੱਬ ਫਤਿਹਗੜ੍ਹ’ ਦੀ ਟੀਮ ਨੇ 127 ਰਨ ਨਾਲ ਜਿੱਤ ਹਾਸਲ ਕੀਤੀ ਅਤੇ ਅਸ਼ੀਸ਼ ਸੁਹਾਗ ‘ਮੈਨ ਆਫ਼ ਦ ਮੈਚ’ ਰਹੇ।
ਦੂਜਾ ਮੈਚ ‘ਗੁਰਦਾਸਪੁਰ ਡਿਸਟ੍ਰਿਕਟ ਕ੍ਰਿਕੇਟ ਐਸੋਸੀਏਸ਼ਨ’ ਅਤੇ ‘ਵਰਮਾ XI ਲੁਧਿਆਣਾ’ ਵਿਚਕਾਰ ਖੇਡਿਆ ਗਿਆ। ਜਿੱਥੇ ਪਹਿਲਾਂ ਬੱਲੇਬਾਜ਼ੀ ਕਰਦੇ ਹੋਏ ‘ਗੁਰਦਾਸਪੁਰ ਡਿਸਟ੍ਰਿਕਟ ਕ੍ਰਿਕੇਟ ਐਸੋਸੀਏਸ਼ਨ’ ਦੀ ਟੀਮ ਨੇ 8 ਵਿਕਟਾਂ ਗੁਵਾ ਕੇ 116 ਰਣ ਬਣਾਏ, ਓਥੇ ‘ਵਰਮਾ XI ਲੁਧਿਆਣਾ’ ਦੇ ਖਿਡਾਰੀਆਂ ਦੀ ਟੀਮ ਨੇ 4 ਵਿਕਟਾਂ ਗੁਵਾ ਕੇ 119 ਰਨ ਬਣਾਏ। ‘ਵਰਮਾ XI ਲੁਧਿਆਣਾ’ ਦੀ ਟੀਮ ਨੇ 6 ਵਿਕਟਾਂ ਨਾਲ ਜਿੱਤ ਹਾਸਲ ਕੀਤੀ ਅਤੇ ਸ਼ਿਵਮ ਵਰਮਾ ‘ਮੈਨ ਆਫ਼ ਦ ਮੈਚ’ ਰਹੇ।
ਇਸ ਮੌਕੇ ‘ਪੀ.ਸੀ.ਏ.’ ਦੇ ਏਪੈਕਸ ਕੌਂਸਲ ਮੈਂਬਰ ਵਿਕਰਮ ਸਿੱਧੂ, ‘ਖੇਡ ਭਾਰਤੀ ਪੰਜਾਬ’ ਦੇ ਪਬਲਿਕ ਰਿਲੇਸ਼ਨ ਇੰਚਾਰਜ ਮੋਹਿਤ ਚੁੱਘ, ਮੀਡੀਆ ਮੈਨੇਜਮੈਂਟ ਇੰਚਾਰਜ ਸਾਹਿਲ ਚੋਪੜਾ, ਜ਼ਿਲ੍ਹਾ ਪ੍ਰਧਾਨ ਜਤਿਨ ਕਤਿਆਲ ਸਮੇਤ ਪੰਜਾਬ ਅਤੇ ਸ਼ਹਿਰ ਪ੍ਰਮੁੱਖ ਸ਼ਖਸੀਅਤਾਂ ਵਿਸ਼ੇਸ਼ ਤੌਰ ‘ਤੇ ਮੌਜੂਦ ਸਨ।
ਦੱਸ ਦੇਈਏ ਕਿ ਬੁੱਧਵਾਰ 26 ਫਰਵਰੀ ਨੂੰ ਪਹਿਲਾ ਮੈਚ ‘ਹੁਸ਼ਿਆਰਪੁਰ XI’ ਅਤੇ ‘ਨਿੰਬਸ ਕਲੱਬ ਬੁੱਟਰਾਂ’ ਵਿਚਕਾਰ ਖੇਡਿਆ ਜਾਵੇਗਾ ਅਤੇ ਦੁਪਹਿਰ ਨੂੰ ਦੂਜਾ ਮੈਚ ‘ਮਾਨਸਾ ਡਿਸਟ੍ਰਿਕਟ ਕ੍ਰਿਕੇਟ ਐਸੋਸੀਏਸ਼ਨ’ ਅਤੇ ‘ਲਾਇਟਨਿੰਗ ਲੈਜੇਂਡਜ਼ ਚੰਡੀਗੜ੍ਹ’ ਵਿਚਕਾਰ ਖੇਡਿਆ ਜਾਵੇਗਾ।
