ਗਰੀਬੀ ਤੋਂ ਤੰਗ ਆ ਕੇ 3 ਭੈਣਾਂ ਦੇ ਇਕਲੌਤੇ 26 ਸਾਲ ਦੇ ਭਰਾ ਨੇ ਲੈ ਲਿਆ ਫਾਹਾ, ਬੁੱਢੇ ਬਾਪ ਨੇ ਰੋ-ਰੋ ਸੁਣਾਇਆ ਦੁੱਖੜਾ
ਲੁਧਿਆਣਾ (ਵੀਓਪੀ ਬਿਊਰੋ) ਗਰੀਬੀ ਅਤੇ ਕਾਰੋਬਾਰ ਦੀ ਘਾਟ ਤੋਂ ਤੰਗ ਆ ਕੇ ਲੁਧਿਆਣਾ ਜ਼ਿਲ੍ਹੇ ਦੇ ਪਿੰਡ ਲੋਹਟਬੱਦੀ ਦੇ 26 ਸਾਲਾ ਨੌਜਵਾਨ ਸੁਲਤਾਨ ਮੁਹੰਮਦ ਨੇ ਦਰੱਖਤ ਨਾਲ ਫਾਹਾ ਲੈ ਕੇ ਖੁਦਕੁਸ਼ੀ ਕਰ ਲਈ। ਵੀਰਵਾਰ ਸਵੇਰੇ ਸੁਲਤਾਨ ਦੀ ਲਾਸ਼ ਪਿੰਡ ਦੇ ਬਾਹਰ ਦਾਣਾ ਮੰਡੀ ‘ਚ ਪਿੱਪਲ ਦੇ ਦਰੱਖਤ ਨਾਲ ਲਟਕਦੀ ਮਿਲੀ। ਰਾਹਗੀਰਾਂ ਨੇ ਲਾਸ਼ ਦੇਖ ਕੇ ਥਾਣਾ ਸਦਰ ਰਾਏਕੋਟ ਨੂੰ ਸੂਚਿਤ ਕੀਤਾ।
ਪੁਲਿਸ ਨੇ ਮੌਕੇ ‘ਤੇ ਪਹੁੰਚ ਕੇ ਜਾਂਚ ਕਰਨ ਤੋਂ ਬਾਅਦ ਲਾਸ਼ ਨੂੰ ਕਬਜ਼ੇ ‘ਚ ਲੈ ਕੇ ਪੋਸਟਮਾਰਟਮ ਲਈ ਭੇਜ ਦਿੱਤਾ ਹੈ। ਮ੍ਰਿਤਕ ਸੁਲਤਾਨ ਦੇ ਬਜ਼ੁਰਗ ਪਿਤਾ ਗੁਲਜ਼ਾਰ ਮੁਹੰਮਦ ਨੇ ਦੁਖੀ ਮਨ ਨਾਲ ਥਾਣਾ ਸਦਰ ਰਾਏਕੋਟ ਦੀ ਲੋਹਟਬੱਦੀ ਪੁਲਿਸ ਚੌਕੀ ਨੂੰ ਦੱਸਿਆ ਕਿ ਸੁਲਤਾਨ ਜੋ ਕਿ ਤਿੰਨ ਭੈਣਾਂ ਦਾ ਇਕਲੌਤਾ ਭਰਾ ਸੀ, ਅਣਵਿਆਹਿਆ ਸੀ। ਉਹ ਪਰਿਵਾਰ ਦੀ ਗਰੀਬੀ ਨੂੰ ਲੈ ਕੇ ਹਮੇਸ਼ਾ ਚਿੰਤਤ ਰਹਿੰਦਾ ਸੀ ਅਤੇ ਪਿੰਡ ਵਿੱਚ ਹੀ ਜੂਸ ਦਾ ਸਟਾਲ ਲਗਾਉਣਾ ਸ਼ੁਰੂ ਕਰ ਦਿੱਤਾ ਸੀ।
ਬੁੱਧਵਾਰ ਰਾਤ ਨਮਾਜ਼ ਅਦਾ ਕਰਨ ਤੋਂ ਬਾਅਦ ਉਸ ਨੇ ਆਪਣੀ ਮਾਂ ਤੋਂ ਖਾਣਾ ਮੰਗਿਆ ਪਰ ਖਾਣਾ ਨਹੀਂ ਖਾਧਾ। ਰਾਤ ਕਰੀਬ 10 ਵਜੇ ਘਰੋਂ ਨਿਕਲਿਆ। ਪਰਿਵਾਰ ਅਤੇ ਹੋਰ ਲੋਕ ਸਾਰੀ ਰਾਤ ਉਸ ਦੀ ਭਾਲ ਕਰਦੇ ਰਹੇ ਪਰ ਕੋਈ ਸੁਰਾਗ ਨਹੀਂ ਮਿਲਿਆ। ਸੁਲਤਾਨ ਦੀ ਲਾਸ਼ ਵੀਰਵਾਰ ਸਵੇਰੇ ਦਾਣਾ ਮੰਡੀ ‘ਚ ਪਿੱਪਲ ਦੇ ਦਰੱਖਤ ਨਾਲ ਲਟਕਦੀ ਮਿਲੀ। ਚੌਕੀ ਇੰਚਾਰਜ ਸੁਖਵਿੰਦਰ ਸਿੰਘ ਦਿਓਲ ਨੇ ਦੱਸਿਆ ਕਿ ਗੁਲਜ਼ਾਰ ਮੁਹੰਮਦ ਦੇ ਬਿਆਨਾਂ ’ਤੇ ਧਾਰਾ 174 ਤਹਿਤ ਕਾਰਵਾਈ ਕੀਤੀ ਗਈ ਹੈ। ਲਾਸ਼ ਦਾ ਪੋਸਟਮਾਰਟਮ ਕਰਵਾ ਕੇ ਵਾਰਸਾਂ ਨੂੰ ਸੌਂਪ ਦਿੱਤੀ ਗਈ ਹੈ।
