ਜਲੰਧਰ ਦੇ 2 ਸਕੇ ਭਰਾਵਾਂ ਦਾ ਬੇਰਹਿਮੀ ਨਾਲ ਕਤਲ, ਪੈਸੇ ਦੇ ਲੈਣ-ਦੇਣ ਨੂੰ ਲੈ ਕੇ ਕੀਤੀ ਹੱਤਿਆ
ਨਾਲਾਗੜ੍ਹ (ਵੀਓਪੀ ਬਿਊਰੋ) ਨਾਲਾਗੜ੍ਹ ਵਿੱਚ ਅੱਜ ਦਿਨ ਦਿਹਾੜੇ ਦੋ ਭਰਾਵਾਂ ਦੇ ਕਤਲ ਦੀ ਖ਼ਬਰ ਨੇ ਸਨਸਨੀ ਮਚਾ ਦਿੱਤੀ। ਜਾਣਕਾਰੀ ਅਨੁਸਾਰ ਰਾਮਸ਼ਹਿਰ ਰੋਡ ‘ਤੇ ਪੀਰ ਦੀ ਦਰਗਾਹ ਨੇੜੇ ਪੰਜਾਬ ਦੇ ਦੋ ਸਕੇ ਭਰਾਵਾਂ ਦਾ ਮੋਟਰਸਾਈਕਲ ਸਵਾਰਾਂ ਨੇ ਤੇਜ਼ਧਾਰ ਹਥਿਆਰਾਂ ਨਾਲ ਕਤਲ ਕਰ ਦਿੱਤਾ ਅਤੇ ਫ਼ਰਾਰ ਹੋ ਗਏ | ਮ੍ਰਿਤਕਾਂ ਦੀ ਪਛਾਣ ਵਰੁਣ ਬਾਵਾ (25) ਅਤੇ ਕੁਨਾਲ (21) ਦੋਵੇਂ ਪੁੱਤਰ ਪ੍ਰਦੀਪ ਬਾਬਾ ਵਾਸੀ ਪਿੰਡ ਰਵੀਵਾ ਤਹਿਸੀਲ ਨਕੋਦਰ ਜ਼ਿਲ੍ਹਾ ਜਲੰਧਰ ਪੰਜਾਬ ਵਜੋਂ ਹੋਈ ਹੈ। ਵਰੁਣ ਕੰਮ ਦੇ ਸਿਲਸਿਲੇ ‘ਚ ਪਿਛਲੇ ਕਈ ਸਾਲਾਂ ਤੋਂ ਨਾਲਾਗੜ੍ਹ ‘ਚ ਰਹਿ ਰਿਹਾ ਸੀ, ਜਦਕਿ ਕੁਨਾਲ ਉਸ ਦੇ ਨਾਲ ਹੀ ਰਹਿ ਰਿਹਾ ਸੀ।
ਮ੍ਰਿਤਕ ਦੇ ਮਾਮਾ ਲਵਕੇਸ਼ ਨੇ ਦੱਸਿਆ ਕਿ ਉਸ ਦਾ ਨਕੋਦਰ ਵਾਸੀ ਗੌਰਵ ਗਿੱਲ ਨਾਲ ਪੈਸਿਆਂ ਦੇ ਲੈਣ-ਦੇਣ ਨੂੰ ਲੈ ਕੇ ਝਗੜਾ ਹੋਇਆ ਸੀ। ਉਹ ਉਨ੍ਹਾਂ ਨੂੰ ਵਾਰ-ਵਾਰ ਧਮਕੀਆਂ ਦੇ ਰਿਹਾ ਸੀ ਅਤੇ ਫੋਨ ਕਰ ਰਿਹਾ ਸੀ ਕਿ ਪੰਜਾਬ ਆ ਜਾਓ, ਅਸੀਂ ਤੁਹਾਡੇ ਹਿਸਾਬ-ਕਿਤਾਬ ਦਾ ਨਿਪਟਾਰਾ ਕਰਾਂਗੇ। ਅੱਜ ਸਵੇਰੇ ਵੀ ਫੋਨ ਆ ਰਹੇ ਸਨ। ਦੋਵਾਂ ਦੀ ਸ਼ਾਮ ਕਰੀਬ 6 ਵਜੇ ਨਾਲਾਗੜ੍ਹ ‘ਚ ਹੱਤਿਆ ਕਰ ਦਿੱਤੀ ਗਈ।
ਨਾਲਾਗੜ੍ਹ ਦੇ ਉਪ ਪੁਲੀਸ ਕਪਤਾਨ ਫਿਰੋਜ਼ ਖ਼ਾਨ ਨੇ ਦੱਸਿਆ ਕਿ ਪੁਲਿਸ ਨੂੰ ਸ਼ਾਮ 6 ਵਜੇ ਸੂਚਨਾ ਮਿਲੀ ਸੀ ਕਿ ਰਾਮਸ਼ਹਿਰ ਰੋਡ ’ਤੇ ਦੋ ਨੌਜਵਾਨ ਜ਼ਖ਼ਮੀ ਹਾਲਤ ਵਿੱਚ ਪਏ ਹਨ। ਪੁਲਿਸ ਨੇ ਤੁਰੰਤ ਮੌਕੇ ’ਤੇ ਪਹੁੰਚ ਕੇ ਦੋਵਾਂ ਨੌਜਵਾਨਾਂ ਨੂੰ ਨਾਲਾਗੜ੍ਹ ਹਸਪਤਾਲ ਲਿਆਂਦਾ। ਇੱਕ ਨੌਜਵਾਨ ਦੀ ਪਹਿਲਾਂ ਹੀ ਮੌਤ ਹੋ ਚੁੱਕੀ ਸੀ ਜਦਕਿ ਦੂਜੇ ਨੇ ਇਲਾਜ ਦੌਰਾਨ ਦਮ ਤੋੜ ਦਿੱਤਾ। ਉਨ੍ਹਾਂ ਕਿਹਾ ਕਿ ਜਲਦ ਹੀ ਕਾਤਲਾਂ ਨੂੰ ਕਾਬੂ ਕਰ ਲਿਆ ਜਾਵੇਗਾ।
