ਪਿਰਾਮਿਡ ਕਾਲਜ ਵਿਖੇ ਸਿਹਤ ਸੰਬੰਧੀ ਸਮੱਸਿਆਵਾਂ ਤੇ ਹੋਇਆ ਖ਼ਾਸ ਸੈਮੀਨਾਰ
ਵੀਓਪੀ ਬਿਊਰੋ – ਪਿਰਾਮਿਡ ਕਾਲਜ, ਫਗਵਾੜਾ ਦੇ ਚਾਈਲਡ ਕੇਅਰ ਗਿਵਰ ਵਿਭਾਗ ਨੇ ਫੋਰਟਿਸ ਹਸਪਤਾਲ, ਲੁਧਿਆਣਾ ਦੇ ਓਬਸਟੇਟਰਿਕਸ ਅਤੇ ਗਾਇਨੀਕੋਲੋਜੀ ਦੇ ਨਾਲ ਜੁੜੇ ਰੋਗਾਂ ਦੇ ਮਾਹਿਰ ਡਾ. ਗੁਰਸਿਮਰਨ ਕੌਰ ਦੇ ਸਹਿਯੋਗ ਨਾਲ ਨੌਜਵਾਨ ਲੜਕੀਆਂ ਨੂੰ ਸਿਹਤ ਸਬੰਧੀ ਸਮੱਸਿਆਵਾਂ ਤੋਂ ਜਾਣੂ ਕਰਵਾਉਣ ਅਤੇ ਉਨ੍ਹਾਂ ਦੇ ਰੋਕਥਾਮ ਉੱਤੇ ਵਿਸ਼ੇਸ਼ ਸੈਮੀਨਾਰ ਦਾ ਆਯੋਜਨ ਕੀਤਾ। ਇਸ ਸੈਸ਼ਨ ਵਿੱਚ ਪੀਸੀਬੀਟੀ ਦੀਆਂ ਲਗਭਗ 250 ਵਿਦਿਆਰਥਣਾਂ ਨੇ ਭਾਗ ਲਿਆ।
ਡਾ: ਗੁਰਸਿਮਰਨ ਨੇ ਪੀ.ਸੀ.ਓ.ਡੀ ਦੇ ਬਾਰੇ ਬੋਲਦਿਆਂ ਦੱਸਿਆ ਕਿ ਇਹ ਬਹੁਤ ਹੀ ਆਮ ਬਿਮਾਰੀ ਹੈ, ਜੋ ਪੰਜ ਵਿੱਚੋਂ ਇੱਕ ਔਰਤ ਨੂੰ ਪ੍ਰਭਾਵਿਤ ਕਰਦੀ ਹੈ। ਉਹਨਾਂ ਇਹ ਵੀ ਸਾਂਝਾ ਕੀਤਾ ਕਿ ਫੀਨੋਟਾਈਪ ਵਿਆਪਕ ਤੌਰ ‘ਤੇ ਜੀਵਨ ਦੇ ਪੜਾਅ, ਜੀਨੋਟਾਈਪ, ਅਤੇ ਵਾਤਾਵਰਣਕ ਕਾਰਕਾਂ ਸਮੇਤ ਜੀਵਨਸ਼ੈਲੀ ਅਤੇ ਸਰੀਰ ਦੇ ਭਾਰ ਦੇ ਆਧਾਰ ‘ਤੇ ਵੱਖ-ਵੱਖ ਹੁੰਦੀ ਹੈ।
ਉਨ੍ਹਾਂ ਵਿਦਿਆਰਥੀਆਂ ਨੂੰ ਦੱਸਿਆ ਕਿ ਅੱਜ ਕੱਲ੍ਹ ਗੁਲਾਬੀ ਲੂਣ ਨਾਲ ਨਮਕ ਦੀ ਥਾਂ ਲੈਣ ਦਾ ਰਿਵਾਜ਼ ਚੱਲ ਰਿਹਾ ਹੈ ਜੋ ਕਿ ਬਹੁਤ ਖ਼ਤਰਨਾਕ ਹੈ ਕਿਉਂਕਿ ਇਸ ਨਾਲ ਆਇਓਡੀਨ ਦੀ ਕਮੀ ਹੋ ਜਾਂਦੀ ਹੈ ਜਿਸ ਨਾਲ ਥਾਇਰਾਈਡ ਨਾਲ ਸਬੰਧਿਤ ਬੀਮਾਰੀਆਂ ਹੋ ਜਾਂਦੀਆਂ ਹਨ, ਜੋ ਅੱਜ ਕੱਲ੍ਹ ਔਰਤਾਂ ਵਿੱਚ ਆਮ ਗੱਲ ਹੈ। ਇਸ ਤੋਂ ਬਚਨ ਲਈ ਉਨ੍ਹਾਂ ਨੇ ਆਇਓ ਡੀਨ ਭਰਪੂਰ ਚਿੱਟਾ ਨਮਕ ਖਾਣ ਦੀ ਸਲਾਹ ਦਿੱਤੀ।
ਸੈਮੀਨਾਰ ਦੇ ਦੌਰਾਨ ਡਾ: ਗੁਰਸਿਮਰਨ ਨੇ ਵਿਦਿਆਰਥਣਾਂ ਦੇ ਨਿਜੀ ਸਵਾਲਾਂ ਦੇ ਜਵਾਬ ਦਿੱਤੇ ਅਤੇ ਉਹਨਾਂ ਨੂੰ ਗਿਆਨ ਅਤੇ ਮਾਰਗਦਰਸ਼ਨ ਪ੍ਰਦਾਨ ਕੀਤਾ। ਇਹ ਸੈਸ਼ਨ ਲੜਕੀਆਂ ਲਈ ਬਹੁਤ ਹੀ ਕੀਮਤੀ ਸਾਬਿਤ ਹੋਇਆ। ਇਸ ਤੋਂ ਇਲਾਵਾ, ਸ਼੍ਰੀਮਤੀ ਰੁਚਿਕਾ ਅਤੇ ਸ਼੍ਰੀਮਤੀ ਰਿਚਾ (ਚਾਇਲਡ ਕੇਅਰਗਿਵਰ ਡਿਪਾਰਟਮੈਂਟ, ਪੀਸੀਬੀਟੀ) ਨੇ ਦੱਸਿਆ ਕਿ ਸਿਹਤ ਸੰਭਾਲ ਤੇਜ਼ੀ ਨਾਲ ਬਦਲ ਰਹੀ ਹੈ ਅਤੇ ਕੁਝ ਬਿਮਾਰੀਆਂ ਬਾਰੇ ਮੌਜੂਦਾ ਗਿਆਨ ਨੂੰ ਅਪਡੇਟ ਕਰਨ ਲਈ ਹੈਲਥਕੇਅਰ ‘ਤੇ ਸੈਸ਼ਨ ਪ੍ਰਦਾਨ ਕਰਨੇ ਬਹੁਤ ਜ਼ਰੂਰੀ ਹਨ। ਡਾ: ਵਿਵੇਕ ਮਿੱਲਤ ਨੇ ਇਸ ਜਾਣਕਾਰੀ ਭਰਪੂਰ ਸੈਸ਼ਨ ਲਈ ਮਹਿਮਾਨ ਨੂੰ ਮਮੈਂਟੋ ਦੇ ਕੇ ਸਨਮਾਨਿਤ ਕੀਤਾ |
