ਮੰਦਿਰ ‘ਚ ਮੱਥਾ ਟੇਕ ਕੇ ਵਾਪਿਸ ਆ ਰਹੇ ਹਫਤਾ ਪਹਿਲਾਂ ਵਿਆਹੇ ਜੌੜੇ ਨੇ ਖੜ੍ਹੇ ਟਰੱਕ ‘ਚ ਮਾਰੀ ਕਾਰ, ਮਾਂ-ਪਿਓ ਤੇ ਭਰਾ ਸਮੇਤ ਪੰਜਾਂ ਦੀ ਮੌ.ਤ
ਵੀਓਪੀ ਬਿਊਰੋ – ਆਂਧਰਾ ਪ੍ਰਦੇਸ਼ ਦੇ ਨੰਦਿਆਲ ਜ਼ਿਲ੍ਹੇ ਵਿੱਚ ਬੁੱਧਵਾਰ ਨੂੰ ਇੱਕ ਨਵੇਂ ਵਿਆਹੇ ਜੋੜੇ ਸਮੇਤ ਇੱਕ ਪਰਿਵਾਰ ਦੇ ਪੰਜ ਮੈਂਬਰਾਂ ਦੀ ਮੌਤ ਹੋ ਗਈ ਜਦੋਂ ਉਨ੍ਹਾਂ ਦੀ ਕਾਰ ਇੱਕ ਖੜ੍ਹੇ ਟਰੱਕ ਨਾਲ ਟਕਰਾ ਗਈ। ਇਹ ਹਾਦਸਾ ਅੱਲਾਗੱਡਾ ਮੰਡਲ ਦੇ ਨਲਾਗਤਲਾ ਨੇੜੇ ਰਾਸ਼ਟਰੀ ਰਾਜਮਾਰਗ ‘ਤੇ ਵਾਪਰਿਆ।
ਪੁਲਿਸ ਨੇ ਦੱਸਿਆ ਕਿ ਇਹ ਹਾਦਸਾ ਸਵੇਰੇ 5.15 ਵਜੇ ਦੇ ਕਰੀਬ ਉਸ ਸਮੇਂ ਵਾਪਰਿਆ ਜਦੋਂ ਕਾਰ ਚਲਾ ਰਹੇ ਵਿਅਕਤੀ ਨੇ ਸੜਕ ਕਿਨਾਰੇ ਖੜ੍ਹੇ ਟਰੱਕ ਵੱਲ ਧਿਆਨ ਨਹੀਂ ਦਿੱਤਾ। ਕਾਰ ‘ਚ ਸਵਾਰ ਸਾਰੇ ਪੰਜ ਲੋਕਾਂ ਦੀ ਮੌਕੇ ‘ਤੇ ਹੀ ਮੌਤ ਹੋ ਗਈ। ਹੈਦਰਾਬਾਦ ਦਾ ਰਹਿਣ ਵਾਲਾ ਇਹ ਪਰਿਵਾਰ ਤਿਰੁਮਾਲਾ ਮੰਦਿਰ ਦੇ ਦਰਸ਼ਨ ਕਰਕੇ ਤਿਰੂਪਤੀ ਤੋਂ ਘਰ ਪਰਤ ਰਿਹਾ ਸੀ।
ਇਸ ਹਾਦਸੇ ਵਿੱਚ ਬਾਲਕਿਰਨ ਅਤੇ ਕਾਵਿਆ ਦਾ ਇੱਕ ਹਫ਼ਤਾ ਪਹਿਲਾਂ ਹੀ ਵਿਆਹ ਹੋਇਆ ਸੀ। ਬਾਲਕਿਰਨ ਦੀ ਮਾਂ ਮੰਥਾਰੀ ਲਕਸ਼ਮੀ, ਪਿਤਾ ਮੰਥਾਰੀ ਰਵਿੰਦਰ ਅਤੇ ਛੋਟਾ ਭਰਾ ਉਦੈ ਵੀ ਮਾਰੇ ਗਏ ਸਨ। ਪਰਿਵਾਰ ਸਿਕੰਦਰਾਬਾਦ ਦੇ ਪੱਛਮੀ ਵੈਂਕਟਪੁਰ ਦਾ ਰਹਿਣ ਵਾਲਾ ਸੀ। ਬਾਲਕਿਰਨ ਨੇ 29 ਫਰਵਰੀ ਨੂੰ ਕਾਵਿਆ ਨਾਲ ਵਿਆਹ ਕੀਤਾ ਸੀ ਅਤੇ ਰਿਸੈਪਸ਼ਨ 3 ਮਾਰਚ ਨੂੰ ਸ਼ਹਿਰ ਦੇ ਸ਼ਮੀਰਪੇਟ ਵਿੱਚ ਆਯੋਜਿਤ ਕੀਤਾ ਗਿਆ ਸੀ।
