ਅਮੀਰ ਕੁੜੀ ਨੂੰ ਪਿਆਰ ਦੇ ਜਾਲ ‘ਚ ਫਸਾਇਆ, ਅਸ਼ਲੀਲ ਵੀਡੀਓ ਬਣਾ ਕੇ ਠੱਗੇ ਢਾਈ ਕਰੋੜ ਰੁਪਏ
ਦਿੱਲੀ (ਵੀਓਪੀ ਬਿਊਰੋ) ਬੈਂਗਲੁਰੂ ‘ਚ ਇਕ ਹੈਰਾਨ ਕਰਨ ਵਾਲਾ ਮਾਮਲਾ ਸਾਹਮਣੇ ਆਇਆ ਹੈ। ਇੱਥੇ ਇੱਕ ਨੌਜਵਾਨ ਨੇ ਵਿਆਹ ਦੇ ਬਹਾਨੇ ਇੱਕ ਲੜਕੀ ਨੂੰ ਆਪਣੇ ਪ੍ਰੇਮ ਜਾਲ ਵਿੱਚ ਫਸਾਇਆ ਅਤੇ ਫਿਰ ਉਸ ਨਾਲ ਕਰੋੜਾਂ ਰੁਪਏ ਦੀ ਠੱਗੀ ਮਾਰ ਲਈ। ਪੁਲਿਸ ਅਨੁਸਾਰ ਪੀੜਤਾ ਦੀ ਉਮਰ 20 ਸਾਲ ਹੈ ਅਤੇ ਮੁਲਜ਼ਮ ਮੋਹਨ ਕੁਮਾਰ ਉਸ ਦਾ ਪੁਰਾਣਾ ਦੋਸਤ ਹੈ। ਦੋਵੇਂ ਬੋਰਡਿੰਗ ਸਕੂਲ ਵਿੱਚ ਇਕੱਠੇ ਪੜ੍ਹਦੇ ਸਨ। ਬਾਅਦ ਵਿੱਚ ਦੋਸਤੀ ਪਿਆਰ ਵਿੱਚ ਬਦਲ ਗਈ ਅਤੇ ਮੋਹਨ ਨੇ ਲੜਕੀ ਨਾਲ ਵਿਆਹ ਕਰਨ ਦਾ ਵਾਅਦਾ ਕੀਤਾ।
ਮੋਹਨ ਨੇ ਉਸ ਨਾਲ ਘੁੰਮਦੇ ਹੋਏ ਲੜਕੀ ਦੀਆਂ ਕਈ ਨਿੱਜੀ ਵੀਡੀਓਜ਼ ਬਣਾਈਆਂ ਅਤੇ ਫਿਰ ਉਨ੍ਹਾਂ ਵੀਡੀਓਜ਼ ਦੇ ਆਧਾਰ ‘ਤੇ ਲੜਕੀ ਨੂੰ ਬਲੈਕਮੇਲ ਕਰਨਾ ਸ਼ੁਰੂ ਕਰ ਦਿੱਤਾ। ਉਸ ਨੇ ਧਮਕੀ ਦਿੱਤੀ ਕਿ ਜੇਕਰ ਪੈਸੇ ਨਾ ਦਿੱਤੇ ਤਾਂ ਉਹ ਇਹ ਵੀਡੀਓ ਸੋਸ਼ਲ ਮੀਡੀਆ ‘ਤੇ ਵਾਇਰਲ ਕਰ ਦੇਵੇਗਾ। ਡਰ ਦੇ ਮਾਰੇ ਲੜਕੀ ਨੇ ਮੋਹਨ ਨੂੰ ਕਈ ਵਾਰ ਪੈਸੇ ਦਿੱਤੇ। ਉਸ ਨੇ ਆਪਣੀ ਦਾਦੀ ਦੇ ਬੈਂਕ ਖਾਤੇ ਵਿੱਚੋਂ 1.25 ਕਰੋੜ ਰੁਪਏ ਕਢਵਾ ਕੇ ਮੋਹਨ ਨੂੰ ਦੇ ਦਿੱਤੇ। ਇਸ ਤੋਂ ਇਲਾਵਾ ਉਸ ਨੇ ਮੋਹਨ ਨੂੰ ਮਹਿੰਗੀਆਂ ਘੜੀਆਂ, ਗਹਿਣੇ ਅਤੇ ਇਕ ਲਗਜ਼ਰੀ ਕਾਰ ਵੀ ਦਿੱਤੀ।
ਜਦੋਂ ਲੜਕੀ ਨੇ ਮੋਹਨ ਨੂੰ ਕੁੱਲ 2.57 ਕਰੋੜ ਰੁਪਏ ਦਿੱਤੇ ਤਾਂ ਵੀ ਉਹ ਨਹੀਂ ਮੰਨਿਆ ਅਤੇ ਪੈਸੇ ਮੰਗਦਾ ਰਿਹਾ। ਅਖੀਰ ਪਰੇਸ਼ਾਨ ਹੋ ਕੇ ਲੜਕੀ ਨੇ ਪੁਲਿਸ ਕੋਲ ਸ਼ਿਕਾਇਤ ਦਰਜ ਕਰਵਾਈ। ਪੁਲਿਸ ਨੇ ਮੋਹਨ ਨੂੰ ਗ੍ਰਿਫ਼ਤਾਰ ਕਰਕੇ ਉਸ ਕੋਲੋਂ 80 ਲੱਖ ਰੁਪਏ ਬਰਾਮਦ ਕਰ ਲਏ ਹਨ। ਪੁਲਿਸ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਇਹ ਇੱਕ ਸੋਚੀ ਸਮਝੀ ਸਾਜ਼ਿਸ਼ ਸੀ ਅਤੇ ਮੁਲਜ਼ਮਾਂ ਨੇ ਲੜਕੀ ਨੂੰ ਪੂਰੀ ਤਰ੍ਹਾਂ ਆਪਣੇ ਜਾਲ ਵਿੱਚ ਫਸਾ ਲਿਆ ਸੀ।
