PM ਮੋਦੀ ਚੜ੍ਹਾਉਣਗੇ ਦਰਗਾਹ ‘ਤੇ ਚਾਦਰ, ਹਿੰਦੂ ਸੈਨਾ ਨੇ ਕੀਤਾ ਵਿਰੋਧ
ਨਵੀਂ ਦਿੱਲੀ (ਵੀਓਪੀ ਬਿਊਰੋ) Pm modi, ajmer sharif, hindu ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ 11ਵੀਂ ਵਾਰ ਅਜਮੇਰ ਸ਼ਰੀਫ ਦਰਗਾਹ ‘ਤੇ ਚਾਦਰ ਚੜ੍ਹਾਉਣਗੇ। ਕੇਂਦਰੀ ਮੰਤਰੀ ਕਿਰਨ ਰਿਜਿਜੂ 4 ਜਨਵਰੀ ਨੂੰ ਖਵਾਜਾ ਮੋਇਨੂਦੀਨ ਚਿਸ਼ਤੀ ਦੀ ਦਰਗਾਹ ‘ਤੇ ਚਾਦਰ ਚੜ੍ਹਾਉਣਗੇ। ਇਸ ਦੌਰਾਨ ਹਿੰਦੂ ਸੈਨਾ ਨੇ ਪ੍ਰਧਾਨ ਮੰਤਰੀ ਦੀ ਤਰਫ਼ੋਂ ਅਜਮੇਰ ਸ਼ਰੀਫ਼ ਵਿੱਚ ਚਾਦਰ ਚੜ੍ਹਾਉਣ ਦਾ ਵਿਰੋਧ ਕੀਤਾ ਹੈ। ਉਨ੍ਹਾਂ ਦਾ ਦਾਅਵਾ ਹੈ ਕਿ ਇਹ ਦਰਗਾਹ ਅਸਲ ਵਿੱਚ ਸੰਕਟ ਮੋਚਨ ਮਹਾਦੇਵ ਮੰਦਰ ਹੈ। ਸੰਸਥਾ ਦੇ ਪ੍ਰਧਾਨ ਵਿਸ਼ਨੂੰ ਗੁਪਤਾ ਨੇ ਪ੍ਰਧਾਨ ਮੰਤਰੀ ਦਫ਼ਤਰ ਦੇ ਪ੍ਰਮੁੱਖ ਸਕੱਤਰ ਨੂੰ ਪੱਤਰ ਲਿਖ ਕੇ ਮੰਗ ਕੀਤੀ ਹੈ ਕਿ ਦਰਗਾਹ ‘ਚ ਪ੍ਰਧਾਨ ਮੰਤਰੀ ਦੀ ਤਰਫ਼ੋਂ ਚਾਦਰ ਚੜ੍ਹਾਉਣ ਦੇ ਪ੍ਰੋਗਰਾਮ ਨੂੰ ਉਦੋਂ ਤੱਕ ਮੁਲਤਵੀ ਕੀਤਾ ਜਾਵੇ, ਜਦੋਂ ਤੱਕ ਦਰਗਾਹ-ਮੰਦਿਰ ਦਾ ਮਾਮਲਾ ਅਦਾਲਤ ‘ਚ ਚੱਲ ਰਿਹਾ ਹੈ।
ਅਜਮੇਰ ਸ਼ਰੀਫ ‘ਚ 28 ਦਸੰਬਰ ਤੋਂ ਖਵਾਜਾ ਮੋਇਨੂਦੀਨ ਚਿਸ਼ਤੀ ਦਾ ਸਾਲਾਨਾ ਉਰਸ ਸ਼ੁਰੂ ਹੋ ਗਿਆ ਹੈ। ਪਿਛਲੀ ਵਾਰ ਵੀ ਪ੍ਰਧਾਨ ਮੰਤਰੀ ਮੋਦੀ ਨੇ ਦਰਗਾਹ ‘ਤੇ ਚਾਦਰ ਚੜ੍ਹਾਈ ਸੀ, ਜਿਸ ਦਾ ਰੰਗ ਭਗਵਾ ਸੀ। ਉਦੋਂ ਭਾਜਪਾ ਘੱਟ ਗਿਣਤੀ ਮੋਰਚਾ ਦੇ ਰਾਜਸਥਾਨ ਪ੍ਰਦੇਸ਼ ਪ੍ਰਧਾਨ ਜਮਾਲ ਸਿੱਦੀਕੀ ਨੇ ਪ੍ਰਧਾਨ ਮੰਤਰੀ ਦੀ ਤਰਫੋਂ ਦਰਗਾਹ ‘ਤੇ ਚਾਦਰ ਚੜ੍ਹਾਈ ਸੀ। ਇਸ ਤੋਂ ਪਹਿਲਾਂ ਤਤਕਾਲੀ ਘੱਟ ਗਿਣਤੀ ਮਾਮਲਿਆਂ ਦੇ ਮੰਤਰੀ ਮੁਖਤਾਰ ਅੱਬਾਸ ਨਕਵੀ ਪ੍ਰਧਾਨ ਮੰਤਰੀ ਮੋਦੀ ਦੀ ਤਰਫੋਂ ਚਾਦਰ ਚੜ੍ਹਾਉਣ ਜਾਂਦੇ ਸਨ।
ਇਸ ਵਾਰ ਕੇਂਦਰੀ ਘੱਟ ਗਿਣਤੀ ਮਾਮਲਿਆਂ ਬਾਰੇ ਮੰਤਰੀ ਕਿਰਨ ਰਿਜਿਜੂ ਪੀਐੱਮ ਦੀ ਤਰਫ਼ੋਂ ਚਾਦਰ ਲੈ ਕੇ ਅਜਮੇਰ ਸ਼ਰੀਫ਼ ਜਾਣਗੇ। ਉਹ ਦਰਗਾਹ ਦੀ ਵੈੱਬਸਾਈਟ ਅਤੇ ਗਰੀਬ ਨਵਾਜ਼ ਐਪ ਵੀ ਲਾਂਚ ਕਰਨਗੇ।
ਅਜਮੇਰ ਸ਼ਰੀਫ ‘ਚ ਪ੍ਰਧਾਨ ਮੰਤਰੀ ਮੋਦੀ ਵੱਲੋਂ ‘ਚਾਦਰ’ ਚੜ੍ਹਾਉਣ ਦਾ ਹਿੰਦੂ ਸੈਨਾ ਨੇ ਵਿਰੋਧ ਕੀਤਾ ਹੈ। ਹਿੰਦੂ ਸੈਨਾ ਦੇ ਰਾਸ਼ਟਰੀ ਪ੍ਰਧਾਨ ਵਿਸ਼ਨੂੰ ਗੁਪਤਾ ਨੇ ਪੀਐਮਓ ਨੂੰ ਪੱਤਰ ਲਿਖ ਕੇ ਅਪੀਲ ਕੀਤੀ ਹੈ ਕਿ ਪ੍ਰਧਾਨ ਮੰਤਰੀ ਅਜਿਹਾ ਨਾ ਕਰਨ। ਪ੍ਰਧਾਨ ਸਕੱਤਰ ਨੂੰ ਲਿਖੇ ਪੱਤਰ ਵਿੱਚ ਗੁਪਤਾ ਨੇ ਕਿਹਾ ਹੈ ਕਿ ਉਹ ਸੰਕਟ ਮੋਚਨ ਮਹਾਦੇਵ ਮੰਦਰ ਬਨਾਮ ਅਜਮੇਰ ਦਰਗਾਹ ਖਵਾਜਾ ਸਾਹਿਬ ਕੇਸ ਵਿੱਚ ਪਟੀਸ਼ਨਰ ਹਨ ਅਤੇ ਇਹ ਕੇਸ ਅਜਮੇਰ ਪੱਛਮੀ ਜ਼ਿਲ੍ਹਾ ਅਦਾਲਤ ਵਿੱਚ ਵਿਚਾਰ ਅਧੀਨ ਹੈ।
