ਲੁਧਿਆਣਾ ‘ਚ ਤਾਬੜਤੋੜ ਫਾਇਰਿੰਗ; ਬ੍ਰਾਹਮਣ ਦੇ ਢਿੱਡ ‘ਚ ਮਾਰੀਆਂ 4 ਗੋਲੀਆਂ, 2 ਬਾਹਾਂ ਤੇ ਲੱਤਾਂ ‘ਚ ਲੱਗੀਆਂ…
ਲੁਧਿਆਣਾ (ਵੀਓਪੀ ਬਿਊਰੋ) ਪੰਜਾਬ ਵਿੱਚ ਆਏ ਦਿਨ ਹੀ ਗੋਲੀਬਾਰੀਆਂ ਦੀਆਂ ਘਟਨਾਵਾਂ ਹੋਣੀਆਂ ਆਮ ਗੱਲ ਹੋ ਗਈ ਹੈ। ਗੱਲ ਕਰੀਏ ਮਹਾਨਗਰ ਲੁਧਿਆਣਾ ਦੀ ਤਾਂ ਇੱਥੇ ਤਾਂ ਅਪਰਾਧ ਦੀ ਗ੍ਰਾਫ ਇੰਨਾ ਜਿਆਦਾ ਵੱਧ ਗਿਆ ਹੈ ਕਿ ਲੁੱਟ-ਖੋਹ ਦੇ ਕੁੱਟਮਾਰ ਤੋਂ ਇਲਾਵਾ ਇੱਥੇ ਗੋਲ਼ੀਆਂ ਚੱਲਣੀਆਂ ਵੀ ਹੁਣ ਆਮ ਹੋ ਗਈਆਂ ਹਨ ਅਤੇ ਨਿੱਤ ਹੀ ਅਜਿਹੇ ਮਾਮਲੇ ਸਾਹਮਣੇ ਆਉਂਦੇ ਰਹਿੰਦੇ ਹਨ। ਇਸੇ ਤਰਹਾਂ ਹੀ ਹੁਣ ਪੰਜਾਬ ਦੇ ਲੁਧਿਆਣਾ ਦੇ ਸਮਰਾਲਾ ਕਸਬੇ ਦੇ ਪਿੰਡ ਬਲਿਓ ਵਿੱਚ ਦੇਰ ਸ਼ਾਮ ਕੁਝ ਬਦਮਾਸ਼ਾਂ ਨੇ ਇੱਕ ਵਿਅਕਤੀ ‘ਤੇ ਗੋਲੀਆਂ ਚਲਾ ਦਿੱਤੀਆਂ। ਸਮਰਾਲਾ ਵਾਸੀ ਨੇ ਆਪਣੇ ਦੋ ਸਾਥੀਆਂ ਨਾਲ ਮਿਲ ਕੇ ਸੋਮਵਾਰ ਸ਼ਾਮ ਕਸਬੇ ਦੇ ਸਥਾਨਕ ਬੱਸ ਸਟੈਂਡ ‘ਤੇ ਆਪਣੇ ਵਿਰੋਧੀ ਦੇ ਸਰੀਰ ‘ਤੇ ਘੱਟੋ-ਘੱਟ 6 ਗੋਲੀਆਂ ਮਾਰ ਦਿੱਤੀਆਂ।
ਥਾਣਾ ਸਮਰਾਲਾ ਦੇ ਐਸਐਚਓ ਸਬ-ਇੰਸਪੈਕਟਰ ਭਿੰਦਰ ਸਿੰਘ ਨੇ ਦੱਸਿਆ ਕਿ ਪੁਲੀਸ ਨੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ ਅਤੇ ਮੁਲਜ਼ਮਾਂ ਦੀ ਗ੍ਰਿਫ਼ਤਾਰੀ ਲਈ ਯਤਨ ਜਾਰੀ ਹਨ। ਇਸ ਦੌਰਾਨ ਮਿਲੀ ਜਾਣਕਾਰੀ ਮੁਤਾਬਕ ਜ਼ਖ਼ਮੀ ਵਿਅਕਤੀ ਦੀ ਪਛਾਣ ਦਿਨੇਸ਼ ਭਾਰਦਵਾਜ ਉਰਫ਼ ਬ੍ਰਾਹਮਣ ਵਜੋਂ ਹੋਈ ਹੈ। ਦਿਨੇਸ਼ ਨੂੰ ਜ਼ਖਮੀ ਹਾਲਤ ‘ਚ ਕ੍ਰਿਸਚੀਅਨ ਮੈਡੀਕਲ ਕਾਲਜ ਅਤੇ ਹਸਪਤਾਲ (CMCH) ਲਿਜਾਇਆ ਗਿਆ, ਜਿੱਥੇ ਉਸ ਦੀ ਹਾਲਤ ਨਾਜ਼ੁਕ ਦੱਸੀ ਜਾ ਰਹੀ ਹੈ। ਦੇਰ ਰਾਤ ਡਾਕਟਰਾਂ ਨੇ ਦੱਸਿਆ ਕਿ ਉਸ ਦੇ ਪੇਟ ਵਿਚ ਚਾਰ ਗੋਲੀਆਂ ਲੱਗੀਆਂ ਹਨ, ਜਦਕਿ ਦੋ ਗੋਲੀਆਂ ਉਸ ਦੀ ਲੱਤ ਅਤੇ ਹੱਥ ਵਿਚ ਲੱਗੀਆਂ ਹਨ। ਪੁਲੀਸ ਅਨੁਸਾਰ ਦਿਨੇਸ਼ ਦੀ ਸਮਰਾਲਾ ਦੀ ਰਹਿਣ ਵਾਲੀ ਸਿੰਮੀ ਨਾਲ ਰੰਜਿਸ਼ ਸੀ। ਉਹ ਕਈ ਵਾਰ ਝੜਪਾਂ ਵਿਚ ਵੀ ਉਲਝ ਚੁੱਕੇ ਸਨ ਅਤੇ ਉਨ੍ਹਾਂ ਖਿਲਾਫ ਮਾਮਲਾ ਵੀ ਦਰਜ ਕੀਤਾ ਗਿਆ ਸੀ।
