ਕੈਨੇਡਾ ਤੋਂ ਆਇਆ ਦੋਸਤਾਂ ਨਾਲ ਲਾ ਰਿਹਾ ਸੀ ਕਾਰ ਦੀ ਰੇਸ, ਟੱਕਰ ਮਾਰ ਕੇ ਸਾਈਕਲ ਸਵਾਰ ਦਾ ਸਿਰ ਕਰ’ਤਾ ਧੜ ਤੋਂ ਵੱਖ, ਬਿਨਾਂ ਸਿਰ ਤੋਂ ਹੀ ਕੀਤਾ ਸੰਸਕਾਰ
ਪਟਿਆਲਾ (ਵੀਓਪੀ ਬਿਊਰੋ) ਬੀਤੇ ਦਿਨੀਂ ਕੈਨੇਡਾ ਤੋਂ ਪੰਜਾਬ ਆਏ ਇਕ ਨੌਜਵਾਨ ਨੇ ਆਪਣੇ ਦੋਸਤਾਂ ਨਾਲ ਮਸਤੀ ਕਰਦੇ ਹੋਏ ਕਾਰਾਂ ਦੀ ਰੇਸ ਲਾਉਂਦੇ ਹੋਏ ਇਕ ਸਾਈਕਲ ਸਵਾਰ ਨੂੰ ਅਜਿਹੀ ਟੱਕਰ ਮਾਰੀ ਕਿ ਇਸ ਦਾ ਸਿਰ ਹੀ ਧੜ ਤੋਂ ਵੱਖ ਹੋ ਗਿਆ। ਇੰਨਾ ਹੀ ਨਹੀਂ ਹਾਦਸੇ ਤੋਂ ਬਾਅਦ ਮੁਲਜ਼ਮ ਫ਼ਰਾਰ ਹਨ ਅਤੇ ਪੁਲਿਸ ਮ੍ਰਿਤਕ ਦਾ ਸਿਰ ਵੀ ਬਰਾਮਦ ਨਹੀਂ ਕਰ ਸਕੀ ਅਤੇ ਇਸ ਦੌਰਾਨ ਟੱਕਰ ਵਿੱਚ ਮਾਰੇ ਗਏ ਨਵਦੀਪ ਕੁਮਾਰ (43) ਦਾ ਐਤਵਾਰ ਨੂੰ ਬਿਨਾਂ ਸਿਰ ਦੇ ਸਸਕਾਰ ਕਰ ਦਿੱਤਾ ਗਿਆ।
ਪੁਲਿਸ ਤੋਂ ਪ੍ਰਾਪਤ ਜਾਣਕਾਰੀ ਅਨੁਸਾਰ ਹਾਦਸੇ ਦਾ ਮੁੱਖ ਮੁਲਜ਼ਮ ਸੁਖਮਨ ਸਿੰਘ ਸਟੱਡੀ ਵੀਜ਼ੇ ’ਤੇ ਕੈਨੇਡਾ ਗਿਆ ਹੋਇਆ ਹੈ। ਇਨ੍ਹੀਂ ਦਿਨੀਂ ਉਹ ਆਪਣੇ ਘਰ ਆਇਆ ਹੋਇਆ ਸੀ। ਘਟਨਾ ਵਾਲੇ ਦਿਨ ਉਹ ਸਕਾਰਪੀਓ ‘ਚ ਆਪਣੇ ਦੋਸਤਾਂ ਨਾਲ ਮੌਜ-ਮਸਤੀ ਕਰਨ ਗਿਆ ਸੀ। ਥਾਣਾ ਇੰਚਾਰਜ ਤ੍ਰਿਪੜੀ ਪ੍ਰਦੀਪ ਸਿੰਘ ਬਾਜਵਾ ਨੇ ਦੱਸਿਆ ਕਿ ਸੁਖਮਨ ਸਿੰਘ ਦੇ ਘਰ ਦੀ ਤਲਾਸ਼ੀ ਲਈ ਗਈ ਹੈ, ਪਰ ਉਥੋਂ ਪਾਸਪੋਰਟ ਨਹੀਂ ਮਿਲਿਆ।
ਉਸ ਖਿਲਾਫ ਐੱਲ.ਓ.ਸੀ. ਸੁਖਮਨ ਦੇ ਪਿਤਾ ਸੇਵਾਮੁਕਤ ਅਧਿਆਪਕ ਜਸਪਾਲ ਸਿੰਘ ਤੋਂ ਪੁੱਛਗਿੱਛ ਕੀਤੀ ਗਈ ਹੈ। ਉਨ੍ਹਾਂ ਅਨੁਸਾਰ ਹਾਦਸੇ ਦੇ ਬਾਅਦ ਤੋਂ ਬੇਟਾ ਘਰ ਨਹੀਂ ਆਇਆ ਅਤੇ ਉਸ ਦਾ ਫ਼ੋਨ ਵੀ ਲਗਾਤਾਰ ਸਵਿੱਚ ਆਫ਼ ਆ ਰਿਹਾ ਹੈ। ਪੁਲੀਸ ਅਨੁਸਾਰ ਸੁਖਮਨ ਦੀ ਗ੍ਰਿਫ਼ਤਾਰੀ ਤੋਂ ਬਾਅਦ ਹੀ ਬਾਕੀ ਤਿੰਨ ਅਣਪਛਾਤੇ ਮੁਲਜ਼ਮਾਂ ਦੀ ਪਛਾਣ ਹੋ ਸਕੇਗੀ।
ਸਟੇਸ਼ਨ ਇੰਚਾਰਜ ਬਾਜਵਾ ਅਨੁਸਾਰ ਹਾਦਸੇ ਸਮੇਂ ਬੋਲੈਰੋ ਨਾਲ ਰੇਸ ਹੋਣ ਕਾਰਨ ਸਕਾਰਪੀਓ ਦੀ ਰਫ਼ਤਾਰ ਜ਼ਿਆਦਾ ਸੀ। ਇਸ ਦੌਰਾਨ ਸਕਾਰਪੀਓ ਨੇ ਸਾਈਕਲ ਸਵਾਰ ਨਵਦੀਪ ਕੁਮਾਰ ਨੂੰ ਪਿੱਛੇ ਤੋਂ ਟੱਕਰ ਮਾਰ ਦਿੱਤੀ। ਉਹ ਕਾਰ ਦੇ ਬੋਨਟ ‘ਤੇ ਜਾ ਡਿੱਗਿਆ ਅਤੇ ਅਗਲਾ ਸ਼ੀਸ਼ਾ ਤੋੜਦਿਆਂ ਉਸ ਦੀ ਗਰਦਨ ਬੁਰੀ ਤਰ੍ਹਾਂ ਨਾਲ ਫਸ ਗਈ ਅਤੇ ਧੜ ਸੜਕ ‘ਤੇ ਡਿੱਗ ਗਿਆ।
