ਚੌਧਰੀ ਸੰਤੋਖ ਸਿੰਘ ਨੇ ਕਈ ਵਾਰ ਐਲਾਨ ਕੀਤਾ ਕਿ 10 ਲੱਖ ਦੀ ਗ੍ਰਾਂਟ ਦੇਵਾਂਗਾ ਪਰ ਅੱਜ ਤਕ ਨਹੀਂ ਮਿਲੇ, ਹੁਣ ਵੋਟ ਦੀ ਆਸ ਨਾ ਰੱਖਣ – ਮੁਸਲਿਮ ਭਾਈਚਾਰੇ ਦਾ ਵਿਰੋਧ
ਜਲੰਧਰ (ਵੀਓਪੀ ਬਿਊਰੋ) ਜਲੰਧਰ ਲੋਕ ਸਭਾ ਹਲਕੇ ਦੀ ਉਪ ਚੋਣ ਨੂੰ ਲੈ ਕੇ ਸਿਆਸੀ ਪਾਰਟੀਆਂ ਦੇ ਨਾਲ-ਨਾਲ ਵੱਖ-ਵੱਖ ਭਾਈਚਾਰੇੇ ਦੇ ਲੋਕ ਵੀ ਸਰਗਰਮ ਹੋ ਗਏ ਹਨ। ਮੁਸਲਿਮ ਭਾਈਚਾਰੇ ਨੇ ਸਪੱਸ਼ਟ ਕਰ ਦਿੱਤਾ ਹੈ ਕਿ ਇਸ ਵਾਰ ਜ਼ਿਮਨੀ ਚੋਣਾਂ ਵਿੱਚ ਉਨ੍ਹਾਂ ਦੀ ਵਰਤੋਂ ਨਹੀਂ ਕੀਤੀ ਜਾ ਸਕੇਗੀ। ਉਹ ਉਨ੍ਹਾਂ ਨੂੰ ਹੀ ਸਮਰਥਨ ਦੇਣਗੇ ਜੋ ਉਨ੍ਹਾਂ ਲਈ ਕੰਮ ਕਰਨਗੇ। ਪੰਜਾਬ ਦੇ ਮੁਸਲਿਮ ਸੰਗਠਨ ਦੇ ਆਗੂਆਂ ਨੇ ਕਿਹਾ ਕਿ ਇਸ ਵਾਰ ਉਨ੍ਹਾਂ ਨੂੰ ਵੋਟ ਬੈਂਕ ਵਜੋਂ ਨਹੀਂ ਵਰਤਿਆ ਜਾ ਸਕੇਗਾ।
ਮੁਸਲਿਮ ਸੰਗਠਨ ਪੰਜਾਬ ਦੇ ਸੂਬਾ ਪ੍ਰਧਾਨ ਨਈਮ ਖਾਨ ਨੇ ਆਪਣਾ ਦੁੱਖ ਬਿਆਨ ਕਰਦੇ ਹੋਏ ਕਿਹਾ ਕਿ ਸੰਸਦ ਮੈਂਬਰ ਸੰਤੋਖ ਚੌਧਰੀ ਨੇ ਗੁਲਾਬ ਦੇਵੀ ਵਿੱਚ ਮੁਸਲਮਾਨਾਂ ਦੀ ਜਗ੍ਹਾ ਲਈ ਕਈ ਵਾਰ ਆਪਣੇ ਐਮਪੀ ਫੰਡ ਵਿੱਚੋਂ 10 ਲੱਖ ਦੇਣ ਦਾ ਐਲਾਨ ਕੀਤਾ ਸੀ ਪਰ ਇੱਕ ਵਾਰ ਵੀ ਨਹੀਂ ਮਿਲਿਆ। ਉਨ੍ਹਾਂ ਕਿਹਾ ਕਿ ਮੁਸਲਿਮ ਭਾਈਚਾਰੇ ਦੀ ਦੁਰਦਸ਼ਾ ਬਾਰੇ ਸਾਲ 2006 ਵਿੱਚ ਜਸਟਿਸ ਸੱਚਰ ਦੀ ਰਿਪੋਰਟ ਆਈ ਸੀ। ਪਰ ਇਸ ‘ਤੇ ਕਿਸੇ ਨੇ ਕੁਝ ਨਹੀਂ ਕੀਤਾ।
ਮੁਸਲਿਮ ਭਾਈਚਾਰੇ ਦੇ ਆਗੂਆਂ ਨੇ ਕਿਹਾ ਕਿ ਪੰਜਾਬ ਦੇ ਹਰ ਪਿੰਡ ਅਤੇ ਸ਼ਹਿਰ ਵਿੱਚ ਵਕਫ਼ ਬੋਰਡ ਦੀਆਂ ਜਾਇਦਾਦਾਂ ਹਨ। ਉਨ੍ਹਾਂ ਕਿਹਾ ਕਿ ਪੰਜਾਬ ਵਿੱਚ 75,500 ਤੋਂ ਵੱਧ ਜਾਇਦਾਦਾਂ ਹਨ, ਪਰ ਇਨ੍ਹਾਂ ਵਿੱਚੋਂ 26,000 ਉੱਤੇ ਧਨਾਢ ਲੋਕਾਂ, ਸਿਆਸਤਦਾਨਾਂ ਅਤੇ ਅਧਿਕਾਰੀਆਂ ਦੇ ਕਬਜ਼ੇ ਹਨ। ਉਨ੍ਹਾਂ ਨੂੰ ਬਚਾਉਣ ਲਈ ਅੱਜ ਤੱਕ ਕੋਈ ਉਪਰਾਲਾ ਨਹੀਂ ਕੀਤਾ ਗਿਆ।
ਮੁਸਲਿਮ ਭਾਈਚਾਰੇ ਨੇ ਦੱਸਿਆ ਕਿ ਜਲੰਧਰ ਦੀ ਇਮਾਮ ਨਾਸਿਰ ਮਸਜਿਦ ਕਰੀਬ 400 ਸਾਲ ਪੁਰਾਣੀ ਹੈ। ਭਾਰਤ ਦੇ ਪੁਰਾਤੱਤਵ ਵਿਭਾਗ ਨੇ ਵੀ ਇਸ ਦੀ ਪੁਸ਼ਟੀ ਕੀਤੀ ਹੈ। ਪਰ ਸਰਕਾਰਾਂ ਨੇ ਅਜੇ ਤੱਕ ਇਸ ਮਸਜਿਦ ਨੂੰ ਵਿਰਾਸਤੀ ਨਹੀਂ ਐਲਾਨਿਆ। ਉਨ੍ਹਾਂ ਮਸਜਿਦ ਦਾ ਇਤਿਹਾਸ ਦੱਸਦਿਆਂ ਕਿਹਾ ਕਿ ਬਾਬਾ ਸ਼ੇਖ ਫਰੀਦ ਨੇ ਵੀ ਇੱਥੇ ਚਾਲੀ ਦਿਨ ਇਬਾਦਤ ਕੀਤੀ ਸੀ।
ਅੱਜ ਇਸ ਪਵਿੱਤਰ ਅਸਥਾਨ ‘ਤੇ ਜਿੱਥੇ ਦੁਨੀਆ ਭਰ ਤੋਂ ਲੋਕ ਆਉਂਦੇ ਹਨ, ਉਥੇ ਮੀਨਾਰ ਅਤੇ ਅੰਦਰਲੀਆਂ ਦੀਵਾਰਾਂ ਖੰਡਰ ਹੋ ਰਹੀਆਂ ਹਨ। ਸਰਕਾਰ ਇਸ ਦੀ ਸਾਂਭ-ਸੰਭਾਲ ਲਈ ਕੁਝ ਨਹੀਂ ਕਰ ਰਹੀ। ਉਨ੍ਹਾਂ ਕਿਹਾ ਕਿ ਸੰਸਦ ਮੈਂਬਰ ਵੱਲੋਂ ਐਲਾਨਿਆ ਪੈਸਾ ਕਿਸੇ ਧਾਰਮਿਕ ਅਸਥਾਨ ਨੂੰ ਨਹੀਂ ਦਿੱਤਾ ਜਾ ਸਕਦਾ ਸਗੋਂ ਵਿਕਾਸ ਕਾਰਜਾਂ ਲਈ ਵਰਤਿਆ ਜਾ ਸਕਦਾ ਹੈ। ਉਨ੍ਹਾਂ ਵੱਲੋਂ ਉਥੇ ਲੰਗਰ ਹਾਲ ਆਦਿ ਬਣਾਇਆ ਜਾ ਸਕਦਾ ਹੈ।
ਇਸ ਮੌਕੇ ਤੇ ਸੂਬਾ ਪ੍ਰਧਾਨ ਨਈਮ ਖਾਨ ਦੇ ਨਾਲ ਜਨਰਲ ਸਕੱਤਰ ਅਮਜਦ ਖਾਨ, ਕੈਸ਼ਿਅਰ ਜੱਬਾਰ ਖਾਨ, ਚੇਅਰਮੈਨ ਸਈਅਦ ਅਲੀ, ਸ਼ਕੀਲ ਖਾਨ, ਹਾਫਿਜ ਸਲੀਮ, ਹਾਫਿਜ ਅਸ਼ਫਾਕ, ਯੂਥ ਪ੍ਰਧਾਨ ਮੁਹੰਮਦ ਸਿਕੰਦਰ, ਸਰਫਰਾਜ ਖਾਨ, ਤਸਲੀਮ ਅਹਿਮਦ, ਵਸੀਮ ਅਕਰਮ, ਮੋਬੀਨ ਅਹਿਮਦ ਮੌਜੂਦ ਸਨ।
