ਅੰਮ੍ਰਿਤਪਾਲ ਸਿੰਘ ਖਿਲਾਫ ਜਲੰਧਰ ‘ਚ ਇਕ ਹੋਰ ਮਾਮਲਾ ਦਰਜ, ਸ਼ਿਕਾਇਤਕਰਤਾ ਨੇ ਕਿਹਾ- ਪਿਸਤੌਲ ਦਿਖਾ ਕੇ ਡਰਾਇਆ ਤੇ ਸਤਲੁਜ ਪਾਰ ਕਰਵਾਉਣ ਲਈ ਕਿਹਾ
ਬਿਲਗਾ (ਵੀਓਪੀ ਬਿਊਰੋ) ਵਾਰਿਸ ਪੰਜਾਬ ਦੇ ਮੁਖੀ ਅੰਮ੍ਰਿਤਪਾਲ ਸਿੰਘ ਖਿਲਾਫ਼ ਪੁਲਿਸ ਦੀ ਕਾਰਵਾਈ ਤੋਂ ਬਾਅਦ ਵੀ ਉਹ ਲਗਾਤਾਰ ਫਰਾਰ ਚੱਲ ਰਿਹਾ ਹੈ। ਹੁਣ ਇਕ ਤਾਜ਼ਾ ਮਾਮਲਾ ਸਾਹਮਣੇ ਆਇਆ ਹੈ ਕਿ ਜਲੰਧਰ ਦਿਹਾਤੀ ਦੇ ਥਾਣਾ ਬਿਲਗਾ ਵਿਖੇ ਇਕ ਸ਼ਿਕਾਇਤਕਰਤਾ ਨੇ ਬਿਆਨ ਦਿੱਤੇ ਹਨ ਕਿ ਅੰਮ੍ਰਿਤਪਾਲ ਸਿੰਘ ਨੇ ਉਸ ਦੇ ਘਰ ਆ ਕੇ ਉਨ੍ਹਾਂ ਨੂੰ ਪਿਸਤੌਲ ਦੇ ਦਮ ‘ਤੇ ਧਮਕਾਇਆ ਹੈ ਅਤੇ ਸਤਲੁਜ ਦਰਿਆ ਪਾਰ ਕਰਵਾਉਣ ਵਿੱਚ ਮਦਦ ਕਰਨ ਲਈ ਕਿਹਾ ਸੀ। ਉਨ੍ਹਾਂ ਮੁਤਾਬਕ ਇਹ ਸਾਰੀ ਘਟਨਾ 18-3-2023 ਦੀ ਹੈ। ਥਾਣਾ ਬਿਲਗਾ ਵਿਖੇ ਅੰਮ੍ਰਿਤਪਾਲ ਸਿੰਘ ਅਤੇ ਉਸਦੇ ਅਣਪਛਾਤੇ ਸਾਥੀ ਖਿਲਾਫ ਆਈਪੀਸੀ ਦੀਆਂ ਧਾਰਾਵਾਂ 386, 342, 506, 34 ਅਤੇ ਅਸਲਾ ਐਕਟ 25 ਅਤੇ 27 ਤਹਿਤ ਮਾਮਲਾ ਦਰਜ ਕਰ ਲਿਆ ਗਿਆ ਹੈ।
ਥਾਣਾ ਬਿਲਗਾ ਵਿੱਚ ਗੁਰਮੀਤ ਕੌਰ ਪਤਨੀ ਸੁਖਵਿੰਦਰ ਸਿੰਘ ਵਾਸੀ ਮਹਿਸਮਪੁਰ, ਗੁਰਦੁਆਰਾ ਸਿੰਘ ਸਭਾ ਪਿੰਡ ਸ਼ੇਖੂਪੁਰ ਨੇ ਬਿਆਨ ਦਿੱਤਾ ਹੈ ਕਿ ਮੇਰਾ ਪਤੀ ਗੁਰਦੁਆਰਾ ਸਾਹਿਬ ਦਾ ਗ੍ਰੰਥੀ ਹੈ ਅਤੇ 18-3-2023 ਨੂੰ ਮੇਰਾ ਪਤੀ ਕਿਸੇ ਕੰਮ-ਧੰਦੇ ਲਈ ਬਾਹਰ ਗਿਆ ਹੋਇਆ ਸੀ। ਉਦੋਂ ਸ਼ਾਮ ਕਰੀਬ 6 ਵਜੇ ਦਾ ਸਮਾਂ ਹੋਵੇਗਾ ਜਦੋਂ ਪਲੈਟੀਨਾ ਬਾਈਕ ਸਵਾਰ ਦੋ ਨੌਜਵਾਨ ਅੰਦਰ ਆਏ ਅਤੇ ਉਨ੍ਹਾਂ ਦੇ ਮੂੰਹ ਢਕੇ ਹੋਏ ਸਨ। ਉਨ੍ਹਾਂ ਸਾਨੂੰ ਧਮਕੀਆਂ ਦੇ ਕੇ ਜ਼ਬਰਦਸਤੀ ਕਮਰੇ ਵਿੱਚ ਬੰਦ ਕਰ ਦਿੱਤਾ, ਜਦੋਂ ਉਨ੍ਹਾਂ ਨੇ ਮੂੰਹ ਵਿੱਚੋਂ ਕਪੜਾ ਕੱਢਿਆ ਤਾਂ ਮੇਰੇ ਲੜਕੇ ਨੇ ਦੱਸਿਆ ਕਿ ਉਨ੍ਹਾਂ ਵਿੱਚੋਂ ਇੱਕ ਵਾਰਿਸ ਪੰਜਾਬ ਦਾ ਮੁਖੀ ਅੰਮ੍ਰਿਤਪਾਲ ਸਿੰਘ ਹੈ।
ਇਸ ਦੌਰਾਨਵਉਨ੍ਹਾਂ ਨੇ ਜੋ ਜੈਕਟਾਂ ਪਹਿਨੀਆਂ ਸਨ, ਉਨ੍ਹਾਂ ਨੂੰ ਇਕ ਦੂਜੇ ਨਾਲ ਬਦਲਿਆ। ਫਿਰ ਅੰਮ੍ਰਿਤਪਾਲ ਦੇ ਸਾਥੀ ਨੇ ਮੇਰੇ ਲੜਕੇ ਦੇ ਸਿਰ ‘ਤੇ ਪਿਸਤੌਲ ਰੱਖ ਕੇ ਉਸ ਨੂੰ ਕਿਹਾ ਕਿ ਉਹ ਸਾਨੂੰ ਆਪਣਾ ਮੋਟਰਸਾਈਕਲ, ਇੱਕ ਆਟੇ ਦਾ ਗੋਲਾ, ਇੱਕ ਐਨਕਾਂ ਅਤੇ ਇੱਕ ਪਰਨਾ (ਦਸਤਾਰ) ਦੇਵੇ। ਮੇਰੇ ਪੁੱਤਰ ਨੇ ਕਾਲਾ ਪਰਨਾ ਅਤੇ ਐਨਕਾਂ ਦਿੱਤੀਆਂ। ਪਰਨਾ ਪਾਉਣ ਤੋਂ ਬਾਅਦ ਅੰਮ੍ਰਿਤਪਾਲ ਸਿੰਘ ਨੇ ਲੜਕੇ ਨੂੰ ਧਮਕੀ ਦਿੱਤੀ ਕਿ ਜੇਕਰ ਤੂੰ ਸਾਨੂੰ ਸਤਲੁਜ ਦਰਿਆ ਪਾਰ ਕਰਨ ਤੋਂ ਇਨਕਾਰ ਕਰ ਦਿੱਤਾ ਤਾਂ ਉਹ ਤੇਰੇ ਸਾਰੇ ਪਰਿਵਾਰ ਨੂੰ ਮਾਰ ਦੇਵੇਗਾ। ਡਰ ਦੇ ਮਾਰੇ ਮੇਰਾ ਲੜਕਾ ਮੇਰੀ ਭਰਜਾਈ ਦੇ ਲੜਕੇ ਨੂੰ ਨਾਲ ਲੈ ਗਿਆ, ਅੰਮ੍ਰਿਤਪਾਲ ਨੇ ਆਪਣੀ ਪਲੈਟੀਨਾ ਬਾਈਕ ਮੇਰੇ ਲੜਕੇ ਨੂੰ ਦੇ ਦਿੱਤੀ। ਰਸਤੇ ਵਿੱਚ ਅੰਮ੍ਰਿਤਪਾਲ ਨੇ ਦਾਰਾਪੁਰ ਨਹਿਰ ’ਤੇ ਬਾਈਕ ਖੜ੍ਹੀ ਕਰ ਲਈ। ਮੇਰਾ ਪੁੱਤਰ ਪਿੰਡ ਵਿੱਚੋਂ ਲੰਘ ਕੇ ਸਤਲੁਜ ਦਰਿਆ ਪਾਰ ਕਰ ਗਿਆ ਸੀ ਅਤੇ ਡਰ ਕਾਰਨ ਅਸੀਂ ਪੁਲਿਸ ਨੂੰ ਨਹੀਂ ਦੱਸ ਸਕੇ। ਇਸ ਤੋਂ ਬਾਅਦ ਉਨ੍ਹਾਂ ਨੇ ਹੁਣ ਪੁਲਿਸ ਨੂੰ ਸ਼ਿਕਾਇਤ ਦਰਜ ਕਰਵਾਈ ਹੈ।
