ਤਾਂਤਰਿਕ ਸ਼ਕਤੀਆਂ ਹਾਸਲ ਕਰਨ ਲਈ ਮਾਂ ਨੇ ਕੀਤਾ ਦਿਲ ਕੰਬਾਊ ਕਾਰਾ, ਦੋ ਮਾਸੂਮਾਂ ਦਾ ਦਿੱਤੀ ਬਲੀ
ਵੀਓਪੀ ਬਿਊਰੋ, ਨੈਸ਼ਨਲ- ਹਾਈਟੈਕ ਤਕਨਾਲੋਜੀ ਦੇ ਇਸ ਜ਼ਮਾਨੇ ਵਿਚ ਵੀ ਕੁਝ ਲੋਕ ਵਹਿਮਾਂ ਭਰਮਾਂ ਵਿਚ ਪੈ ਕੇ ਕੁਝ ਅਜਿਹੀ ਦਿਲ ਕੰਬਾਊ ਕਰਤੂਤ ਕਰ ਜਾਂਦੇ ਹਨ ਕਿ ਇਨਸਾਨੀਤ ਨੂੰ ਸ਼ਰਮਸਾਰ ਹੋਣਾ ਪੈਂਦਾ ਹੈ। ਅਜਿਹਾ ਹੀ ਇਕ ਮਾਮਲਾ ਮੇਰਠ ਵਿਚ ਸਾਹਮਣੇ ਆਇਆ ਹੈ।
ਮੇਰਠ ਰਹਿੰਦੀ ਇਕ ਮਾਂ ਨੇ ਤਾਂਤਰਿਕ ਸ਼ਕਤੀਆਂ ਹਾਸਲ ਕਰਨ ਲਈ ਦੋ ਮਾਸੂਮਾਂ ਦੀ ਬਲੀ ਦੇ ਦਿੱਤੀ। ਇੱਕ ਮਾਂ ਨੇ ਆਪਣੇ 10 ਸਾਲ ਦੇ ਪੁੱਤ ਅਤੇ 6 ਸਾਲ ਦੀ ਧੀ ਦਾ ਕਤਲ ਕਰ ਦਿੱਤਾ। ਉਸ ਨੂੰ ਇਹ ਭੁਲੇਖਾ ਸੀ ਕਿ ਉਹ ਆਪਣੇ ਬੱਚਿਆਂ ਦੀ ਬਲੀ ਦੇ ਕੇ ਭਵਿੱਖ ਦੀਆਂ ਘਟਨਾਵਾਂ ਨੂੰ ਜਾਣਨ ਦੀ ਸ਼ਕਤੀ ਹਾਸਲ ਕਰ ਲਵੇਗੀ। ਮੇਰਠ ਪੁਲਿਸ ਨੇ ਇਸ ਮਾਮਲੇ ‘ਚ ਔਰਤ ਅਤੇ ਉਸ ਦੇ ਪ੍ਰੇਮੀ ਅਤੇ ਗੁਆਂਢੀਆਂ ਸਮੇਤ 6 ਲੋਕਾਂ ਨੂੰ ਗ੍ਰਿਫਤਾਰ ਕੀਤਾ ਹੈ।
ਮੁਲਜ਼ਮ ਔਰਤ ਨਿਸ਼ਾ ਦਾ ਵਿਆਹ 20 ਸਾਲ ਪਹਿਲਾਂ ਸ਼ਾਹਿਦ ਨਾਲ ਹੋਇਆ ਸੀ। ਸ਼ਾਹਿਦ ਜੁੱਤੀਆਂ ਦੀ ਦੁਕਾਨ ‘ਤੇ ਕੰਮ ਕਰਦਾ ਹੈ। ਨਿਸ਼ਾ ਦੇ ਸਾਬਕਾ ਕੌਂਸਲਰ ਸਾਊਦ ਫੈਜ਼ੀ ਨਾਲ ਵੀ ਨਾਜਾਇਜ਼ ਸਬੰਧ ਸਨ। ਨਿਸ਼ਾ ਨੇ ਪ੍ਰੇਮੀ ਅਤੇ ਹੋਰਾਂ ਨਾਲ ਮਿਲ ਕੇ ਪੁੱਤ ਮੇਰਬ (10 ਸਾਲ) ਅਤੇ ਧੀ ਕੋਨੇਨ (6 ਸਾਲ) ਦਾ ਕਤਲ ਕਰ ਦਿੱਤਾ।
ਉਨ੍ਹਾਂ ਨੇ ਦੋਹਾਂ ਬੱਚਿਆਂ ਦੇ ਹੱਥ-ਪੈਰ ਬੰਨ੍ਹ ਕੇ ਉਨ੍ਹਾਂ ਨੂੰ ਜ਼ਹਿਰ ਦਾ ਟੀਕਾ ਲਗਾ ਦਿੱਤਾ। ਧੀ ਦੀ ਮੌਤ ਹੋ ਗਈ, ਜਦੋਂ ਕਿ ਗੁਆਂਢੀਆਂ ਨੇ ਪੁੱਤਰ ਨੂੰ ਮਾਰਨ ਲਈ ਉਸ ਦੇ ਹੱਥ-ਪੈਰ ਬੰਨ੍ਹ ਦਿੱਤੇ ਅਤੇ ਪ੍ਰੇਮੀ ਸਾਊਦ ਫੈਜ਼ੀ ਨੇ ਉਸ ਦਾ ਗਲਾ ਘੁੱਟ ਦਿੱਤਾ। ਦੋਵਾਂ ਦੀ ਮੌਤ ਤੋਂ ਬਾਅਦ ਲਾਸ਼ਾਂ ਨੂੰ 2 ਕਿਲੋਮੀਟਰ ਦੂਰ ਇੱਕ ਨਾਲੇ ਵਿੱਚ ਸੁੱਟ ਦਿੱਤਾ ਗਿਆ। ਪੁਲਿਸ ਨੇ ਮੁਲਜ਼ਮਾਂ ਨੂੰ ਗ੍ਰਿਫ਼ਤਾਰ ਕਰ ਕੇ ਅਗਲੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ।
