ਭਰਾ ਦੀ ਆਈ ਆਪਣੇ ਸਿਰ ਲੈ ਲਈ ! ‘ਭਾਗ ਭਾਈ ਭਾਗ’ ਸੁਣ ਹਮਲਾਵਰਾਂ ਨੇ ਭਰਾ ਨੂੰ ਬਚਾਉਣ ਆਈਆਂ ਦੋ ਭੈਣਾਂ ਨੂੰ ਮਾਰ ਦਿੱਤੀਆਂ ਗੋਲੀਆਂ, ਮੌਤ
ਵੀਓਪੀ ਬਿਊਰੋ, ਨਵੀਂ ਦਿੱਲੀ-ਰਾਜਧਾਨੀ ਦਿੱਲੀ ਦੇ ਆਰਕੇ ਪੁਰਮ ਇਲਾਕੇ ਵਿੱਚ 2 ਔਰਤਾਂ ਨੇ ਆਪਣੇ ਭਰਾ ਦੀ ਆਈ ਆਪਣੇ ਸਿਰ ਲੈ ਲਈ। ਇਨ੍ਹਾਂ ਦੀ ਪਛਾਣ 30 ਸਾਲਾ ਪਿੰਕੀ ਅਤੇ 29 ਸਾਲਾ ਜੋਤੀ ਕੇ.ਕੇ ਵਜੋਂ ਹੋਈ ਹੈ।ਦੋਵਾਂ ਨੂੰ ਆਪਣੇ ਭਰਾ ਦੀ ਜਾਨ ਬਚਾਉਣੀ ਅਤੇ ਉਸ ਨੂੰ ‘ਭਾਗ ਭਾਈ ਭਾਗ’ ਕਹਿਣਾ ਮਹਿੰਗਾ ਪਿਆ। ਹਮਲਾਵਰਾਂ ਨੇ ਦੋਵਾਂ ਭੈਣਾਂ ਨੂੰ ਗੋਲੀ ਮਾਰ ਦਿੱਤੀ। ਜਿਨ੍ਹਾਂ ਦੀ ਹਸਪਤਾਲਾਂ ਵਿੱਚ ਮੌਤ ਹੋ ਗਈ।
ਮੌਕੇ ‘ਤੇ ਮੌਜੂਦ ਔਰਤਾਂ ਦੇ ਭਰਾ ਲਲਿਤ ਨੇ ਦੱਸਿਆ ਕਿ ਉਸ ਨੇ ਰਾਤ ਨੂੰ ਕਿਸੇ ਤੋਂ ਪੈਸੇ ਲੈਣੇ ਸਨ, ਉਹ ਕੰਮ ਨਿਪਟਾ ਕੇ ਘਰ ਆਇਆ ਸੀ।
ਕੁਝ ਦੇਰ ਬਾਅਦ ਕੁਝ ਲੋਕ ਉਸ ਦੀ ਮਾਸੀ ਦੇ ਘਰ ਪਹੁੰਚੇ ਤਾਂ ਉੱਥੇ ਉਨ੍ਹਾਂ ਨੇ ਹੰਗਾਮਾ ਕੀਤਾ ਅਤੇ ਦਰਵਾਜ਼ਾ ਤੋੜ ਕੇ ਘਰ ਅੰਦਰ ਦਾਖਲ ਹੋਣ ਦੀ ਕੋਸ਼ਿਸ਼ ਕੀਤੀ। ਉਥੋਂ ਜਦੋਂ ਲਲਿਤ ਨੂੰ ਫੋਨ ਆਇਆ ਤਾਂ ਉਸ ਨੇ ਪੀਸੀਆਰ ਨੂੰ ਕਾਲ ਕਰਨ ਲਈ ਕਿਹਾ। ਕੁਝ ਸਮੇਂ ਬਾਅਦ ਉਹ ਲੋਕ ਫਿਰ ਲਲਿਤ ਦੇ ਘਰ ਪਹੁੰਚੇ ਅਤੇ ਕਾਫੀ ਹੰਗਾਮਾ ਕੀਤਾ। ਦਰਵਾਜ਼ਾ ਤੋੜ ਕੇ ਅੰਦਰ ਦਾਖ਼ਲ ਹੋਣ ਦੀ ਕੋਸ਼ਿਸ਼ ਕੀਤੀ, ਜਦੋਂ ਉਹ ਸਫ਼ਲ ਨਾ ਹੋ ਸਕੇ ਤਾਂ ਵਾਪਸ ਚਲੇ ਗਏ।
ਇਸ ਦੌਰਾਨ ਰੌਲਾ ਸੁਣ ਕੇ ਕਾਲੋਨੀ ਦੇ ਲੋਕ ਇਕੱਠੇ ਹੋ ਗਏ। ਕਰੀਬ 20 ਮਿੰਟ ਬਾਅਦ ਤੜਕੇ ਸਾਢੇ ਤਿੰਨ ਵਜੇ ਵੱਡੀ ਗਿਣਤੀ ਲੋਕ ਫਿਰ ਲਲਿਤ ਦੇ ਘਰ ਪਹੁੰਚ ਗਏ ਅਤੇ ਲਲਿਤ ‘ਤੇ ਗੋਲੀਆਂ ਚਲਾ ਦਿੱਤੀਆਂ। ਉੱਥੇ ਮੌਜੂਦ ਲਲਿਤ ਦੀਆਂ ਦੋ ਭੈਣਾਂ ਬਚਾਅ ਲਈ ਅੱਗੇ ਆਈਆਂ ਅਤੇ ਲਲਿਤ ਨੂੰ ਕਿਹਾ, “ਭਾਗ ਭਾਈ ਭਾਗ”, ਲਲਿਤ ਦੇ ਸਰੀਰ ਨੂੰ ਛੂਹ ਕੇ ਇੱਕ ਗੋਲੀ ਨਿਕਲੀ।
ਪਰ ਲਲਿਤ ਭੱਜਣ ਵਿੱਚ ਕਾਮਯਾਬ ਹੋ ਗਿਆ ਅਤੇ ਗੁੱਸੇ ਵਿੱਚ ਆਏ ਹਮਲਾਵਰਾਂ ਨੇ ਲਲਿਤ ਦੀਆਂ ਦੋਵੇਂ ਭੈਣਾਂ ਨੂੰ ਗੋਲੀ ਮਾਰ ਦਿੱਤੀ ਅਤੇ ਮੌਕੇ ਤੋਂ ਫਰਾਰ ਹੋ ਗਏ।
ਗੋਲੀਬਾਰੀ ਦੀ ਇਸ ਘਟਨਾ ਦੀ ਵੀਡੀਓ ਵੀ ਸਾਹਮਣੇ ਆਈ ਹੈ।
ਲਲਿਤ ਨੇ ਦੱਸਿਆ ਕਿ ਉਸ ਦੇ ਘਰ ‘ਤੇ ਹਮਲਾ ਕਰਨ ਆਏ ਲੋਕਾਂ ‘ਚੋਂ ਇਕ ਨੇੜੇ ਹੀ ਇਕ ਕਲੱਬ ਚਲਾਉਂਦਾ ਹੈ। ਇਹ ਘਟਨਾ ਦੱਖਣੀ ਪੱਛਮੀ ਜ਼ਿਲ੍ਹੇ ਦੀ ਅੰਬੇਡਕਰ ਬਸਤੀ ਵਿੱਚ ਵਾਪਰੀ। ਮਾਮਲੇ ਦੀ ਪੁਸ਼ਟੀ ਕਰਦੇ ਹੋਏ ਡੀਸੀਪੀ ਦੱਖਣ-ਪੱਛਮੀ ਮਨੋਜ ਸ਼ੀ ਨੇ ਦੱਸਿਆ ਕਿ ਮਾਮਲੇ ਦੀ ਸੂਚਨਾ ਪੁਲਿਸ ਨੂੰ ਸਵੇਰੇ 4:40 ਵਜੇ ਦਿੱਤੀ ਗਈ ਸੀ।
ਫੋਨ ਕਰਨ ਵਾਲੇ ਨੇ ਪੁਲਿਸ ਨੂੰ ਦੱਸਿਆ ਸੀ ਕਿ ਕੁਝ ਅਣਪਛਾਤੇ ਲੋਕਾਂ ਨੇ ਗੋਲੀ ਚਲਾ ਦਿੱਤੀ ਹੈ। ਜਿਸ ਵਿੱਚ ਉਸ ਦੀਆਂ ਭੈਣਾਂ ਨੂੰ ਗੋਲੀ ਲੱਗੀ ਹੈ। ਸਥਾਨਕ ਪੁਲਿਸ ਅਤੇ ਪੀਸੀਆਰ ਟੀਮ ਮੌਕੇ ‘ਤੇ ਪਹੁੰਚ ਗਈ।
ਉੱਥੇ ਹੀ ਪਤਾ ਲੱਗਾ ਕਿ ਮ੍ਰਿਤਕ ਔਰਤਾਂ ਨੂੰ ਉਨ੍ਹਾਂ ਦੇ ਭਰਾ ਵਲੋਂ ਸਫਦਰਜੰਗ ਹਸਪਤਾਲ ਲਿਆਂਦਾ ਗਿਆ ਸੀ। ਸ਼ੁਰੂਆਤੀ ਜਾਂਚ ‘ਚ ਪੁਲਸ ਨੂੰ ਪਤਾ ਲੱਗਾ ਹੈ ਕਿ ਘਟਨਾ ਪੈਸਿਆਂ ਦੇ ਲੈਣ-ਦੇਣ ਅਤੇ ਸਮਝੌਤੇ ਨੂੰ ਲੈ ਕੇ ਹੋਈ ਹੈ। ਮੁਲਜ਼ਮਾਂ ਨੂੰ ਕਾਬੂ ਕਰਨ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ।
