ਬੱਚਿਆਂ ਨੇ ਫੂਕਰੀ ਮਾਰਦਿਆਂ ਵਾਇਰਲ ਕੀਤੀ ਫੋਟੋ, ਥਾਣਾ ਇੰਚਾਰਜ ਪਿਤਾ ਨੂੰ ਹੋਣਾ ਪਿਆ ਲਾਈਨ ਹਾਜ਼ਰ, ਹੋਵੇਗੀ ਜਾਂਚ
ਵੀਓਪੀ ਬਿਊਰੋ, ਨੈਸ਼ਨਲ- ਬੱਚਿਆਂ ਨੇ ਫੂਕਰੀ ਮਾਰਦਿਆਂ ਸੋਸ਼ਲ ਮੀਡੀਆ ਉਤੇ ਫੋਟੋ ਕੀ ਅਪਲੋਡ ਕੀਤੀ ਕਿ ਉਨ੍ਹਾਂ ਦੇ ਪਿਤਾ ਜੋ ਥਾਣਾ ਇੰਚਾਰਜ ਹਨ, ਨੂੰ ਲਾਈਨ ਹਾਜ਼ਰ ਕਰ ਦਿੱਤਾ ਗਿਆ। ਇਹ ਮਾਮਲਾ ਉੱਤਰ ਪ੍ਰਦੇਸ਼ ਦੇ ਉਨਾਵ ਜ਼ਿਲ੍ਹੇ ਤੋਂ ਸਾਹਮਣੇ ਆਇਆ ਹੈ। ਇੱਥੇ ਬੇਹਟਾ ਮੁਜਾਵਰ ਥਾਣਾ ਇੰਚਾਰਜ ਰਮੇਸ਼ ਚੰਦਰ ਸਾਹਨੀ ਦੇ ਪਰਿਵਾਰ ਨੇ 500-500 ਦੇ ਨੋਟਾਂ ਦੇ ਬੰਡਲ ਨਾਲ ਸੋਸ਼ਲ ਮੀਡੀਆ ‘ਤੇ ਫੋਟੋ ਅਪਲੋਡ ਕੀਤੀ। ਜਿਵੇਂ ਹੀ ਫੋਟੋ ਵਾਇਰਲ ਹੋਈ ਤਾਂ ਐੱਸ.ਪੀ ਨੇ ਇਸ ਦਾ ਨੋਟਿਸ ਲੈਂਦਿਆਂ ਤੁਰੰਤ ਰਮੇਸ਼ ਚੰਦਰ ਸਾਹਨੀ ਨੂੰ ਲਾਈਨ ਹਾਜ਼ਰ ਕਰ ਕੇ ਸਪੱਸ਼ਟੀਕਰਨ ਮੰਗਿਆ।
ਵਾਇਰਲ ਫੋਟੋ ਵਿੱਚ ਦੇਖਿਆ ਜਾ ਸਕਦਾ ਹੈ ਕਿ ਨੋਟਾਂ ਦੇ ਕੁੱਲ 27 ਬੰਡਲ ਹਨ। ਕਰੀਬ 14 ਲੱਖ ਰੁਪਏ ਦੱਸੇ ਜਾ ਰਹੇ ਹਨ। ਦਰਅਸਲ ਵੀਰਵਾਰ ਨੂੰ ਸੋਸ਼ਲ ਮੀਡੀਆ ‘ਤੇ ਰਮੇਸ਼ ਚੰਦਰ ਸਾਹਨੀ ਦੇ ਪਰਿਵਾਰ ਦੀ ਇਕ ਫੋਟੋ ਵਾਇਰਲ ਹੋਈ ਸੀ। ਫੋਟੋ ‘ਚ ਦੇਖਿਆ ਜਾ ਸਕਦਾ ਹੈ ਕਿ ਉਸ ਦੇ ਦੋ ਬੱਚੇ ਬੈੱਡ ‘ਤੇ 500-500 ਦੇ ਨੋਟਾਂ ਦੇ ਕਈ ਬੰਡਲਾਂ ਨਾਲ ਖੇਡਦੇ ਦਿਖਾਈ ਦੇ ਰਹੇ ਹਨ। ਫੋਟੋ ‘ਚ ਉਨ੍ਹਾਂ ਦੀ ਪਤਨੀ ਵੀ ਬੱਚਿਆਂ ਨਾਲ ਨਜ਼ਰ ਆ ਰਹੀ ਹੈ। ਇਨ੍ਹਾਂ ਲੋਕਾਂ ਨੇ ਨੋਟਾਂ ਦੇ ਬੰਡਲ ਨੂੰ ਬੈੱਡ ‘ਤੇ ਰੱਖ ਕੇ ਇਕੱਠੇ ਫੋਟੋਆਂ ਖਿੱਚੀਆਂ ਅਤੇ ਆਪਣੇ ਸੋਸ਼ਲ ਮੀਡੀਆ ਪੇਜ ‘ਤੇ ਪਾ ਦਿੱਤੀਆਂ।
ਫੋਟੋ ਵਾਇਰਲ ਹੁੰਦੇ ਹੀ ਪੁਲਸ ਵਿਭਾਗ ‘ਚ ਹੜਕੰਪ ਮਚ ਗਿਆ।ਐਸਪੀ ਸਿਧਾਰਥ ਸ਼ੰਕਰ ਮੀਨਾ ਨੇ ਤੁਰੰਤ ਪ੍ਰਭਾਵ ਨਾਲ ਰਮੇਸ਼ ਚੰਦਰ ਸਾਹਨੀ ਨੂੰ ਲਾਈਨ ਹਾਜ਼ਰ ਕਰ ਕੇ ਸੀਓ ਬੰਗੜਮਾਊ ਪੰਕਜ ਸਿੰਘ ਨੂੰ ਜਾਂਚ ਦੇ ਹੁਕਮ ਦਿੱਤੇ। ਹਾਲਾਂਕਿ ਰਮੇਸ਼ ਚੰਦਰ ਸਾਹਨੀ ਨੇ ਇਸ ‘ਤੇ ਸਪੱਸ਼ਟੀਕਰਨ ਦਿੰਦੇ ਹੋਏ ਕਿਹਾ ਕਿ ਇਹ ਫੋਟੋ 14 ਨਵੰਬਰ 2021 ਨੂੰ ਲਈ ਗਈ ਸੀ। ਉਸ ਨੇ ਆਪਣੀ ਇਕ ਪਰਿਵਾਰਕ ਜਾਇਦਾਦ ਵੇਚ ਦਿੱਤੀ ਸੀ, ਉਸ ਦੇ ਪੈਸੇ ਵੀ ਮਿਲੇ ਸਨ।
ਦਰਅਸਲ ਰਮੇਸ਼ ਚੰਦਰ ਸਾਹਨੀ ਦੋ ਸਾਲ ਪਹਿਲਾਂ ਹਰਦੋਈ ਤੋਂ ਬਦਲੀ ਹੋ ਕੇ ਉਨਾਓ ਆ ਗਏ ਸਨ। ਤਤਕਾਲੀ ਐਸਪੀ ਆਨੰਦ ਕੁਲਕਰਨੀ ਨੇ ਉਨ੍ਹਾਂ ਨੂੰ ਬੇਹਟਾ ਮੁਜਾਵਰ ਥਾਣੇ ਦਾ ਚਾਰਜ ਦਿੱਤਾ ਸੀ। ਇਨ੍ਹਾਂ ਦੋ ਸਾਲਾਂ ਵਿੱਚ ਕਈ ਘਟਨਾਵਾਂ ਵਿੱਚ ਉਸ ਦੀ ਲਾਪਰਵਾਹੀ ਵੀ ਦੇਖਣ ਨੂੰ ਮਿਲੀ।ਪਰ ਉਨ੍ਹਾਂ ਖਿਲਾਫ ਕੋਈ ਕਾਰਵਾਈ ਨਹੀਂ ਕੀਤੀ ਗਈ। ਇਹ ਇਲਾਕੇ ਅਤੇ ਪੁਲਿਸ ਵਿਭਾਗ ਵਿੱਚ ਕਾਫੀ ਚਰਚਾ ਦਾ ਵਿਸ਼ਾ ਬਣਿਆ ਰਿਹਾ।
