ਸਵੇਰੇ-ਸਵੇਰੇ ਚਾਹ ਬਨਾਉਣ ਨੂੰ ਲੈ ਕੇ ਹੋਏ ਝਗੜੇ ‘ਚ ਵੱਧ ਗਿਆ ਪਤੀ ਦਾ ਪਾਰਾ, ਤਲਵਾਰ ਮਾਰ ਲਾਹ’ਤੀ ਪਤਨੀ ਦੀ ਧੌਣ
ਗਾਜ਼ੀਆਬਾਦ (ਵੀਓਪੀ ਬਿਊਰੋ): ਗਾਜ਼ੀਆਬਾਦ ਦੇ ਭੋਜਪੁਰ ਥਾਣਾ ਖੇਤਰ ਵਿੱਚ ਮੰਗਲਵਾਰ ਸਵੇਰੇ ਚਾਹ ਬਣਾਉਣ ਨੂੰ ਲੈ ਕੇ ਪਤੀ-ਪਤਨੀ ਵਿੱਚ ਝਗੜਾ ਹੋ ਗਿਆ। ਇਸੇ ਝਗੜੇ ਕਾਰਨ ਪਤੀ ਨੇ ਘਰ ‘ਚ ਰੱਖੀ ਤੇਜ਼ਧਾਰ ਤਲਵਾਰ ਨਾਲ ਪਤਨੀ ਦੀ ਗਰਦਨ ‘ਤੇ ਵਾਰ ਕਰ ਦਿੱਤਾ, ਜਿਸ ਕਾਰਨ ਉਸ ਦੀ ਮੌਤ ਹੋ ਗਈ। ਇਸ ਤੋਂ ਬਾਅਦ ਉਹ ਫਰਾਰ ਹੋ ਗਿਆ। ਮੌਕੇ ‘ਤੇ ਪਹੁੰਚੀ ਪੁਲਸ ਨੇ ਲਾਸ਼ ਨੂੰ ਕਬਜ਼ੇ ‘ਚ ਲੈ ਕੇ ਪੋਸਟਮਾਰਟਮ ਲਈ ਭੇਜ ਦਿੱਤਾ ਹੈ ਅਤੇ ਦੋਸ਼ੀ ਪਤੀ ਦੀ ਭਾਲ ਕੀਤੀ ਜਾ ਰਹੀ ਹੈ।
ਗਾਜ਼ੀਆਬਾਦ ਦੇ ਭੋਜਪੁਰ ਥਾਣਾ ਖੇਤਰ ਦੇ ਪਿੰਡ ਫਜ਼ਲਗੜ੍ਹ ‘ਚ ਮੰਗਲਵਾਰ ਸਵੇਰੇ ਕਰੀਬ 6 ਵਜੇ ਧਰਮਵੀਰ ਨਾਂ ਦੇ ਵਿਅਕਤੀ ਦਾ ਆਪਣੀ ਪਤਨੀ ਸੁੰਦਰੀ (50) ਨਾਲ ਸਵੇਰੇ ਚਾਹ ਬਣਾਉਣ ਨੂੰ ਲੈ ਕੇ ਝਗੜਾ ਹੋ ਗਿਆ। ਪਤੀ ਇੰਨਾ ਗੁੱਸੇ ‘ਚ ਆ ਗਿਆ ਕਿ ਉਸ ਨੇ ਘਰ ਦੇ ਅੰਦਰ ਰੱਖੀ ਤਿੱਖੀ ਤਲਵਾਰ ਲੈ ਕੇ ਚੁੱਲ੍ਹੇ ‘ਤੇ ਚਾਹ ਬਣਾ ਰਹੀ ਆਪਣੀ ਪਤਨੀ ਦੇ ਪਿੱਛੇ ਤੋਂ ਉਸ ਦੀ ਗਰਦਨ ‘ਤੇ ਵਾਰ ਕਰ ਦਿੱਤਾ, ਜਿਸ ਨਾਲ ਉਸ ਦੀ ਮੌਕੇ ‘ਤੇ ਹੀ ਮੌਤ ਹੋ ਗਈ।
ਸੁੰਦਰੀ ਅਤੇ ਧਰਮਵੀਰ ਦੇ ਪੰਜ ਬੱਚੇ ਹਨ। ਜਦੋਂ ਇਹ ਘਟਨਾ ਵਾਪਰੀ ਤਾਂ ਬੱਚੇ ਸੁੱਤੇ ਪਏ ਸਨ। ਪੁਲਿਸ ਤੋਂ ਪ੍ਰਾਪਤ ਜਾਣਕਾਰੀ ਅਨੁਸਾਰ ਕਥਿਤ ਦੋਸ਼ੀ ਧਰਮਵੀਰ ਫਿਲਹਾਲ ਫ਼ਰਾਰ ਹੈ, ਉਸਦੀ ਭਾਲ ਕੀਤੀ ਜਾ ਰਹੀ ਹੈ ਅਤੇ ਜਲਦ ਹੀ ਉਸਦੇ ਖਿਲਾਫ ਕਾਰਵਾਈ ਕੀਤੀ ਜਾਵੇਗੀ।
