ਪੈਰੋਲ ਤੇ ਪੈਰੋਲ ਲੈ ਰਹੇ ਰਾਮ ਰਹੀਮ ਦੀ ਹੁਣ ਸਜ਼ਾ ਵੀ ਹੋ ਸਕਦੀ ਹੈ ਮਾਫ, ਕਹਿੰਦੇ- ਜੇਲ੍ਹ ‘ਚ ਆਚਰਣ ਵਧੀਆ ਆ ਰਾਮ ਰਹੀਮ ਦਾ
ਨਵੀਂ ਦਿੱਲੀ (ਵੀਓਪੀ ਬਿਊਰੋ) ਇੱਕ ਹਫ਼ਤਾ ਪਹਿਲਾਂ 50 ਦਿਨਾਂ ਦੀ ਪੈਰੋਲ ‘ਤੇ ਜੇਲ੍ਹ ਤੋਂ ਬਾਹਰ ਆਏ ਰਾਮ ਰਹੀਮ ਨੂੰ ਇੱਕ ਹੋਰ ਰਾਹਤ ਮਿਲੀ ਹੈ। ਉਸ ਦੀ ਉਮਰ ਕੈਦ ਦੀ ਸਜ਼ਾ 60 ਦਿਨ ਘਟਾ ਦਿੱਤੀ ਜਾਵੇਗੀ, ਕਿਉਂਕਿ ਗਣਤੰਤਰ ਦਿਵਸ ਦੀ ਪੂਰਵ ਸੰਧਿਆ ‘ਤੇ ਸਰਕਾਰ ਨੇ ਉਮਰ ਕੈਦ ਦੀ ਸਜ਼ਾ 60 ਦਿਨ, 5 ਸਾਲ ਤੋਂ ਵੱਧ ਅਤੇ 10 ਸਾਲ ਤੋਂ ਘੱਟ ਉਮਰ ਕੈਦੀਆਂ ਦੀ ਸਜ਼ਾ ਨੂੰ ਘਟਾ ਕੇ 45 ਦਿਨ ਅਤੇ 5 ਸਾਲ ਵਾਲਿਆਂ ਦੀ 30 ਦਿਨ ਕਰ ਦਿੱਤੀ ਹੈ।
ਬਸ਼ਰਤੇ ਕਿ ਜੇਲ੍ਹ ਵਿੱਚ ਸਜ਼ਾ ਦੌਰਾਨ ਕੈਦੀ ਦਾ ਆਚਰਣ ਠੀਕ ਹੋਵੇ। ਰਾਮ ਰਹੀਮ ਵੀ ਇਸ ਨਿਯਮ ਦੇ ਦਾਇਰੇ ‘ਚ ਆ ਰਿਹਾ ਹੈ। ਜੇਲ੍ਹ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਹੁਣੇ ਹੀ ਹੁਕਮ ਆਏ ਹਨ। ਹਰ ਕੈਦੀ ਦੇ ਰਿਕਾਰਡ ਦੀ ਜਾਂਚ ਕੀਤੀ ਜਾਵੇਗੀ। ਇਸ ਆਧਾਰ ‘ਤੇ ਮੁਆਫ਼ੀ ਦਿੱਤੀ ਜਾਵੇਗੀ।
ਰਾਮ ਰਹੀਮ ਨੂੰ ਸਾਧਵੀ ਬਲਾਤਕਾਰ ਮਾਮਲੇ ਵਿੱਚ 2017 ਵਿੱਚ ਸਜ਼ਾ ਸੁਣਾਈ ਗਈ ਸੀ। ਬਾਅਦ ਵਿੱਚ ਉਸ ਨੂੰ ਛਤਰਪਤੀ ਕਤਲ ਕੇਸ ਅਤੇ ਰਣਜੀਤ ਕਤਲ ਕੇਸ ਵਿੱਚ ਉਮਰ ਕੈਦ ਦੀ ਸਜ਼ਾ ਸੁਣਾਈ ਗਈ ਸੀ। 19 ਜਨਵਰੀ ਨੂੰ ਉਸ ਦੀ 50 ਦਿਨਾਂ ਦੀ ਪੈਰੋਲ ਦੀ ਅਰਜ਼ੀ ਮਨਜ਼ੂਰ ਹੋ ਗਈ ਸੀ। ਇਸ ਤੋਂ ਬਾਅਦ ਪੁਲਿਸ ਉਸ ਨੂੰ ਯੂਪੀ ਦੇ ਬਾਗਪਤ ਸਥਿਤ ਬਰਨਾਵਾ ਆਸ਼ਰਮ ਲੈ ਗਈ। ਰਾਮ ਰਹੀਮ ਪਹਿਲਾਂ ਦੀ ਤਰ੍ਹਾਂ ਪੈਰੋਲ ਦਾ ਸਮਾਂ ਉੱਥੇ ਹੀ ਬਿਤਾ ਰਿਹਾ ਹੈ।
