ਫੋਟੋਗ੍ਰਾਫਰ ਨੂੰ ਨੌਸਰਬਾਜ਼ ਲਾ ਕੇ ਚੂਨਾ, ਲੱਖਾਂ ਦੇ ਕੈਮਰੇ ਤੇ ਹੋਰ ਸਮਾਨ ਲੈ ਕੇ ਹੋਏ ਰਫੂ ਚੱਕਰ
ਲੁਧਿਆਣਾ (ਵੀਓਪੀ ਬਿਊਰੋ) ਸਮਰਾਲਾ ਤੋਂ ਲੁਧਿਆਣਾ ਫੰਕਸ਼ਨ ਲਾਉਣ ਚੱਲਿਆ ਫੋਟੋਗ੍ਰਾਫਰ ਨਾਲ ਠੱਗੀ ਹੋ ਗਈ। ਕਾਰ ਚਾਲਕ ਸਮੇਤ ਦੋ ਨੌਸਰਬਾਜ਼, ਫੋਟੋਗ੍ਰਾਫਰ ਦੇ ਕਰੀਬ 5 ਲੱਖ ਰੁਪਏ ਦੇ ਕੈਮਰੇ ਅਤੇ ਹੋਰ ਜ਼ਰੂਰੀ ਸਮਾਨ ਲੈ ਕੇ ਫਰਾਰ ਹੋ ਗਏ। ਇਸ ਸਬੰਧੀ ਪੀੜਤ ਵੱਲੋਂ ਸਮਰਾਲਾ ਪੁਲਸ ਸਟੇਸ਼ਨ ਵਿਚ ਸ਼ਿਕਾਇਤ ਦਿੱਤੀ ਗਈ ਹੈ ਅਤੇ ਆਲੇ ਦੁਆਲੇ ਦੇ ਫੋਟੋਗ੍ਰਾਫਰ ਪੁਲਿਸ ਸਟੇਸ਼ਨ ਵਿਚ ਇਕੱਠੇ ਹੋ ਗਏ ਹਨ। ਪੀੜਤ ਰਾਹੁਲ ਨੇ ਦੱਸਿਆ ਕਿ ਮੈਨੂੰ ਬੀਤੇ ਦਿਨੀਂ ਰਾਣਾ ਫੋਟੋਗਰਾਫੀ ਦੇ ਦਮਨਪ੍ਰੀਤ ਸਿੰਘ ਤੋਂ ਫੋਨ ਆਇਆ ਕਿ ਇਕ ਫੰਕਸ਼ਨ ਲਾਉਣ ਲੁਧਿਆਣਾ ਜਾਣਾ ਹੈ, ਜਿਨ੍ਹਾਂ ਨਾਲ ਫੰਕਸ਼ਨ ਲਾਉਣ ਜਾਣਾ ਹੈ ਉਹ ਵਿਅਕਤੀ ਚੰਡੀਗੜ੍ਹ ਦੇ ਹਨ। ਪੀੜਤ ਨੇ ਦੱਸਿਆ ਕਿ ਚੰਡੀਗੜ੍ਹ ਦੇ ਵਿਅਕਤੀਆਂ ਨਾਲ ਮੇਰੀ ਗੱਲ ਹੋਈ ਹੈ ਅਤੇ ਉਨ੍ਹਾਂ ਨੇ ਮੈਨੂੰ ਅੱਜ ਸਵੇਰੇ 5 ਵਜੇ ਸਮਰਾਲਾ ਦੇ ਮੇਨ ਚੌਂਕ ਵਿਚ ਆਉਣ ਨੂੰ ਕਿਹਾ ਹੈ।
ਅੱਜ ਸਵੇਰੇ ਜਦੋਂ ਆਪਣੇ ਪਿੰਡ ਤੋਂ ਸਮਰਾਲਾ ਦੇ ਮੇਨ ਚੌਂਕ ਪਹੁੰਚਿਆ ਤਾਂ ਉਕਤ ਨੌਸਰਬਾਜ਼ ਆਪਣੀ ਵੋਕਸਵੈਗਨ ਗੱਡੀ ਵਿਚ ਆਏ ਜਿਸ ਵਿਚ ਦੋ ਵਿਅਕਤੀ ਸਵਾਰ ਸਨ। ਉਨ੍ਹਾਂ ਨੇ ਮੈਨੂੰ ਕਿਹਾ ਕਿ ਅਸੀਂ ਇਕ ਹੀ ਗੱਡੀ ਵਿਚ ਚੱਲਦੇ ਹਾਂ ਤੁਸੀਂ ਆਪਣੇ ਕੈਮਰੇ ਮੇਰੇ ਗੱਡੀ ਵਿਚ ਰੱਖ ਦਿਓ ਅਤੇ ਆਪਣੀ ਗੱਡੀ ਪਾਰਕਿੰਗ ਵਿਚ ਲਾ ਦਵੋ। ਇਸ “ਤੇ ਮੈਂ ਆਪਣੇ ਕੈਮਰੇ ਅਤੇ ਅਕਸੈੱਸਰੀ ਉਕਤ ਨੌਸਰਬਾਜ਼ਾਂ ਦੀ ਗੱਡੀ ਵਿਚ ਰੱਖ ਦਿੱਤੇ ਅਤੇ ਆਪਣੀ ਗੱਡੀ ਪਾਰਕਿੰਗ ਚੌਂਕ ਦੇ ਕੋਲ ਪੈਟਰੋਲ ਪੰਪ ਕੋਲ ਲਾਉਣ ਗਿਆ ਤਾਂ ਇੰਨੇ ਵਿਚ ਨੌਸਰਬਾਜ਼ ਮੇਰੇ ਕੈਮਰੇ ਅਤੇ ਮਹਿੰਗਾ ਸਮਾਨ ਲ਼ੈ ਕੇ ਫਰਾਰ ਹੋ ਗਏ।
ਨੌਜਵਾਨ ਫ਼ੋਟੋਗ੍ਰਾਫਰ ਦੇ ਹੱਕ ਵਿੱਚ ਥਾਣਾ ਪਹੁੰਚੇ ਹਲਕਾ ਇੰਚਾਰਜ ਸ਼੍ਰੋਮਣੀ ਅਕਾਲੀ ਦਲ ਪਰਮਜੀਤ ਸਿੰਘ ਢਿੱਲੋਂ ਨੇ ਕਿਹਾ ਕਿ ਸਮਰਾਲਾ ਵਿੱਚ ਆਏ ਦਿਨ ਵਾਰਦਾਤਾਂ ਹੁੰਦੀਆਂ ਰਹਿੰਦੀਆਂ ਹਨ ਉਹਨਾਂ ਕਿਹਾ ਕਿ ਪੁਲਿਸ ਪ੍ਰਸ਼ਾਸਨ ਕ੍ਰਾਈਮ ਰੋਕਣ ਵਿੱਚ ਨਾਕਾਮ ਹੋ ਚੁੱਕਿਆ ਹੈ ਅਤੇ ਲਾਅ ਐਂਡ ਆਰਡਰ ਬੁਰੀ ਤਰ੍ਹਾਂ ਫੇਲ ਹੋ ਚੁੱਕਿਆ ਹੈ।
ਇਸ ਮੌਕੇ ਐਸ ਐਚ ਓ ਸਮਰਾਲਾ ਪਵਿੱਤਰ ਸਿੰਘ ਨਾਲ ਗੱਲਬਾਤ ਕੀਤੀ ਗਈ ਤਾਂ ਉਹਨਾਂ ਨੇ ਕਿਹਾ ਕਿ ਇਸ ਮਾਮਲੇ ਦੀ ਗਹਿਰਾਈ ਨਾਲ ਜਾਂਚ ਕੀਤੀ ਜਾ ਰਹੀ ਹੈ। ਸੀਸੀਟੀ ਕੈਮਰੇ ਖੰਗਾਲੇ ਜਾ ਰਹੇ ਹਨ ਜਲਦੀ ਹੀ ਨਾਸਰਬਾਜਾਂ ਨੂੰ ਕਾਬੂ ਕਰ ਲਿਆ ਜਾਵੇਗਾ।
