ਗੈਸ ਟੈਂਕਰ ਤੇ ਟਰਾਲੇ ਦੀ ਟੱਕਰ ਨੇ ਮਚਾਈ ਤਬਾਹੀ, ਭਿਆਨਕ ਧਮਾਕੇ ‘ਚ ਤਿੰਨ ਦੀ ਮੌਤ, 500 ਮੀਟਰ ਦੇ ਘੇਰੇ ‘ਚ ਫੈਲ ਗਈ ਅੱਗ
ਅਜਮੇਰ (ਵੀਓਪੀ ਬਿਊਰੋ) ਅਜਮੇਰ ਤੋਂ ਇੱਕ ਵੱਡਾ ਹਾਦਸਾ ਹੋਣ ਦੀ ਖਬਰ ਸਾਹਮਣੇ ਆਈ ਹੈ। ਵੀਰਵਾਰ ਦੇਰ ਰਾਤ 12:30 ਵਜੇ ਰਾਣੀ ਬਾਗ ਰਿਜ਼ੋਰਟ ਨੇੜੇ ਨੈਸ਼ਨਲ ਹਾਈਵੇਅ-8 ‘ਤੇ ਗੈਸ ਟੈਂਕਰ ਅਤੇ ਟਰਾਲੇ ਦੀ ਟੱਕਰ ਹੋ ਗਈ। ਹਾਦਸਾ ਇੰਨਾ ਭਿਆਨਕ ਸੀ ਕਿ 500 ਮੀਟਰ ਦਾ ਇਲਾਕਾ ਅੱਗ ਦਾ ਗੋਲਾ ਬਣ ਗਿਆ। ਇਸ ਹਾਦਸੇ ‘ਚ 3 ਲੋਕ ਜ਼ਿੰਦਾ ਸੜ ਗਏ ਅਤੇ 4 ਲੋਕ ਗੰਭੀਰ ਜ਼ਖਮੀ ਦੱਸੇ ਜਾ ਰਹੇ ਹਨ। ਇਕ ਹੋਰ ਜ਼ਖਮੀ ਦੀ ਸ਼ੁੱਕਰਵਾਰ ਨੂੰ ਇਲਾਜ ਦੌਰਾਨ ਮੌਤ ਹੋ ਗਈ।
ਇਸ ਦੌਰਾਨ ਹਾਈਵੇਅ ‘ਤੇ ਚੱਲ ਰਹੇ ਦੋ ਟਰੱਕ ਅਤੇ ਕਈ ਦੋਪਹੀਆ ਵਾਹਨ ਵੀ ਇਸ ਦੀ ਲਪੇਟ ‘ਚ ਆ ਗਏ। ਮਿਸਰੀਪੁਰਾ ਅਤੇ ਗਰੀਬ ਨਵਾਜ਼ ਕਲੋਨੀ ਸਮੇਤ ਚਾਰੇ ਪਾਸੇ ਫੈਲੀ ਅੱਗ ਕਾਰਨ 10 ਤੋਂ ਵੱਧ ਘਰਾਂ ਨੂੰ ਵੀ ਅੱਗ ਲੱਗ ਗਈ। ਮਰਨ ਵਾਲਿਆਂ ਵਿੱਚ ਸੰਗਮਰਮਰ ਦੇ ਪੱਥਰ ਲੈ ਕੇ ਜਾ ਰਹੇ ਟਰਾਲੇ ਤੇ ਗੈਸ ਟੈਂਕਰ ਦੋਵਾਂ ਦੇ ਡਰਾਈਵਰ ਸ਼ਾਮਲ ਹਨ। ਜ਼ਖ਼ਮੀਆਂ ਨੂੰ ਜੇਐਲਐਨ ਹਸਪਤਾਲ ਵਿੱਚ ਦਾਖ਼ਲ ਕਰਵਾਇਆ ਗਿਆ ਹੈ।
ਦੇਰ ਰਾਤ ਵਾਪਰੇ ਹਾਦਸੇ ਦੀ ਸੂਚਨਾ ਮਿਲਦੇ ਹੀ ਕਲੈਕਟਰ ਅੰਸ਼ਦੀਪ ਅਤੇ ਐਸਪੀ ਚੂਨਾਰਾਮ ਜਾਟ ਮੌਕੇ ’ਤੇ ਪੁੱਜੇ ਅਤੇ ਰਾਤ ਇੱਕ ਵਜੇ ਤੋਂ ਬਚਾਅ ਕਾਰਜ ਕਰਵਾਇਆ। ਸਥਾਨਕ ਪੁਲਿਸ ਸਟੇਸ਼ਨ, ਫਾਇਰ ਬ੍ਰਿਗੇਡ, ਐਂਬੂਲੈਂਸ ਨੇ ਮੌਕੇ ‘ਤੇ ਰਾਤ ਨੂੰ ਬਚਾਅ ਕਾਰਜ ਕੀਤੇ। ਮੌਕੇ ‘ਤੇ ਮੌਜੂਦ ਵਾਹਨ ਚਾਲਕਾਂ ਅਨੁਸਾਰ ਅੱਗ ਲੱਗਣ ਕਾਰਨ ਹਾਈਵੇਅ ਕਾਫੀ ਸਮੇਂ ਤੱਕ ਜਾਮ ਰਿਹਾ। ਸੁਰਾਨਾ ਪੋਲ ਫੈਕਟਰੀ ਦੇ ਚਸ਼ਮਦੀਦ ਚੌਕੀਦਾਰ ਹੁਸੈਨ ਖਾਨ ਨੇ ਦੱਸਿਆ ਕਿ ਧਮਾਕੇ ਦੀ ਆਵਾਜ਼ ਦੂਰ-ਦੂਰ ਤੱਕ ਸੁਣਾਈ ਦਿੱਤੀ।
