ਗੁਦਾਮ ਬਾਹਰ ਕੱਚੇ ਰਸਤੇ ਕੰਢੇ ਸੁੱਤਾ ਪਿਆ ਸੀ ਪਰਿਵਾਰ, ਸੁਤੀ ਹੋਈ 5 ਸਾਲਾ ਬੱਚੀ ਆ ਗਈ ਸੜਕ ਵਿਚਕਾਰੇ, ਟਰੱਕ ਹੇਠਾਂ ਆਉਣ ਕਾਰਨ ਹੋ ਗਈ ਮੌਤ
ਵੀਓਪੀ ਬਿਊਰੋ, ਜਲੰਧਰ-ਜਲੰਧਰ-ਪਠਾਨਕੋਟ ਰਾਸ਼ਟਰੀ ਰਾਜਮਾਰਗ ਉਤੇ ਸਥਿਤ ਪਿੰਡ ਸਰਮਸਤਪੁਰ ਡੀਏਵੀ ਯੂਨੀਵਰਸਿਟੀ ਦੇ ਨਜ਼ਦੀਕ ਟਰੱਕ ਹੇਠਾਂ ਆ ਕੇ 5 ਸਾਲਾ ਬੱਚੀ ਦੀ ਦਰਦਨਾਕ ਮੌਤ ਹੋ ਗਈ। ਬੱਚੀ ਦੀ ਪਛਾਣ ਪੂਜਾ (ਕਾਲਪਨਿਕ ਨਾਂ) ਪੁੱਤਰੀ ਸ਼ਾਮ ਮੂਲ ਵਾਸੀ ਉੱਤਰ ਪ੍ਰਦੇਸ਼ ਹਾਲ ਵਾਸੀ ਸੀਮੈਂਟ ਦਾ ਗੁਦਾਮ, ਨੇੜੇ ਡੀ. ਏ. ਵੀ. ਯੂਨੀਵਰਸਿਟੀ ਵਜੋਂ ਹੋਈ ਹੈ।
ਮ੍ਰਿਤਕਾ ਬੱਚੀ ਦੇ ਪਰਿਵਾਰਕ ਮੈਂਬਰਾਂ ਨੇ ਸੂਚਨਾ ਥਾਣਾ ਮਕਸੂਦਾਂ ਦੀ ਪੁਲਿਸ ਨੂੰ ਦਿੱਤੀ। ਸੂਚਨਾ ਮਿਲਦਿਆਂ ਹੀ ਥਾਣਾ ਮਕਸੂਦਾਂ ਦੇ ਸਬ-ਇੰਸਪੈਕਟਰ ਮੇਜਰ ਸਿੰਘ ਸਮੇਤ ਪੁਲਿਸ ਪਾਰਟੀ ਮੌਕੇ ’ਤੇ ਪਹੁੰਚੇ ਤੇ ਜਾਂਚ ਸ਼ੁਰੂ ਕੀਤੀ। ਜਾਣਕਾਰੀ ਦਿੰਦਿਆਂ ਸਬ-ਇੰਸ. ਮੇਜਰ ਸਿੰਘ ਨੇ ਦੱਸਿਆ ਕਿ ਡੀਏਵੀ ਯੂਨੀਵਰਸਿਟੀ ਨਜ਼ਦੀਕ ਜਾਂਦੇ ਕੱਚੇ ਰਸਤੇ ਸੀਮੈਂਟ ਦੇ ਗੁਦਾਮ ’ਚ ਕੰਮ ਕਰਦਾ ਸ਼ਾਮ ਸੀਮੈਂਟ ਦੇ ਗੁਦਾਮ ’ਚ ਕਮਰੇ ’ਚ ਪਰਿਵਾਰ ਸਮੇਤ ਰਹਿ ਰਿਹਾ ਹੈ, ਜੋ ਕੇ ਬੀਤੀ ਰਾਤ ਗਰਮੀ ਹੋਣ ਦੌਰਾਨ ਕਮਰੇ ਵਿਚ ਸੌਣ ਦੀ ਬਜਾਏ ਗੁਦਾਮ ਦੇ ਬਾਹਰ ਕੱਚੇ ਰਸਤੇ ਦੇ ਕਿਨਾਰੇ ’ਤੇ ਸਾਰਾ ਪਰਿਵਾਰ ਸੁੱਤਾ ਪਿਆ ਸੀ ਤਾਂ ਉਨ੍ਹਾਂ ਦੀ ਬੱਚੀ ਸੁੱਤੀ ਹੋਈ ਕਿਨਾਰੇ ਤੋਂ ਕੱਚੇ ਰਸਤੇ ਦੇ ਵਿਚਕਾਰ ਆ ਗਈ ਤਾਂ ਤੜਕਸਾਰ 3 ਵਜੇ ਉੱਥੋਂ ਲੰਘ ਰਹੇ ਟਰੱਕ ਹੇਠ ਆ ਕੇ ਉਸ ਦੀ ਮੌਤ ਹੋ ਗਈ।
ਉਨ੍ਹਾਂ ਦੱਸਿਆ ਕਿ ਮ੍ਰਿਤਕ ਬੱਚੀ ਦੀ ਲਾਸ਼ ਨੂੰ ਕਬਜ਼ੇ ’ਚ ਲੈ ਕੇ ਪੋਸਟਮਾਰਟਮ ਕਰਵਾਇਆ ਗਿਆ। ਲੜਕੀ ਦੇ ਪਰਿਵਾਰ ਵੱਲੋਂ ਪਰਿਵਾਰ ਵੱਲੋਂ ਟਰੱਕ ਚਾਲਕ ਖ਼ਿਲਾਫ਼ ਕੋਈ ਵੀ ਕਾਰਵਾਈ ਨਹੀਂ ਕਰਵਾਈ ਗਈ।
