ਦਰਦ ਹੋਣ ਉਤੇ ਕਰਵਾਇਆ ਆਪ੍ਰੇਸ਼ਨ, ਢਿੱਡ ਵਿਚੋਂ ਨਿਕਲੀਆਂ ਅਜਿਹੀਆਂ ਚੀਜ਼ਾਂ ਕਿ ਡਾਕਟਰਾਂ ਦੇ ਪੈਰਾਂ ਹੇਠੋਂ ਨਿਕਲੀ ਜ਼ਮੀਨ
ਵੀਓਪੀ ਬਿਊਰੋ, ਮੋਗਾ : 40 ਸਾਲਾ ਵਿਅਕਤੀ ਦੇ ਢਿੱਡ ਵਿਚ ਦਰਦ ਹੋਈ ਤਾਂ ਉਸ ਨੇ ਹਸਪਤਾਲ ਵਿਚ ਡਾਕਟਰ ਨਾਲ ਸੰਪਰਕ ਕੀਤਾ। 3 ਘੰਟੇ ਚੱਲੇ ਆਪ੍ਰੇਸ਼ਨ ਦੌਰਾਨ ਉਸ ਦੇ ਢਿੱਡ ਵਿਚੋਂ ਅਜਿਹੀਆਂ ਚੀਜ਼ਾਂ ਨਿਕਲੀਆਂ, ਜੋ ਦੇਖ ਕੇ ਡਾਕਟਰ ਤੇ ਸਾਰੀ ਟੀਮ ਹੈਰਾਨ ਰਹਿ ਗਈ। ਇਹ ਹੈਰਾਨ ਕਰਨ ਵਾਲਾ ਮਾਮਲਾ ਮੋਗਾ ਜ਼ਿਲ੍ਹੇ ਦੇ ਪਿੰਡ ਰੋੜੇ ਦਾ ਹੈ। ਇੱਥੇ 40 ਸਾਲਾਂ ਦੇ ਵਿਅਕਤੀ ਦਾ ਤਿੰਨ ਘੰਟੇ ਆਪਰੇਸ਼ਨ ਚੱਲਿਆ ਅਤੇ ਉਸ ਦੇ ਢਿੱਡ ‘ਚੋਂ ਕਈ ਤਰ੍ਹਾਂ ਦੇ ਨਟ, ਬੋਲਟ, ਈਅਰ ਫੋਨ, ਰੱਖੜੀਆਂ, ਵਾਸ਼ਲ ਅਤੇ ਛੋਟੇ ਪੇਚ ਮਿਲੇ ਹਨ। ਜਾਣਕਾਰੀ ਮੁਤਾਬਕ ਮੋਗਾ ਦੇ ਸਥਾਨਕ ਹਸਪਤਾਲ ‘ਚ ਇਕ 40 ਸਾਲਾਂ ਦਾ ਮਰੀਜ਼ ਕੁਲਦੀਪ ਸਿੰਘ ਦਾਖ਼ਲ ਹੋਇਆ ਸੀ। ਉਸ ਦੇ ਢਿੱਡ ‘ਚ ਦਰਦ ਹੋ ਰਿਹਾ ਸੀ ਅਤੇ ਬੁਖ਼ਾਰ ਵੀ ਸੀ।
ਕਈ ਦਿਨਾਂ ਤੋਂ ਉਹ ਦਰਦ ਨਾਲ ਤੜਫ਼ ਰਿਹਾ ਸੀ ਅਤੇ ਉਲਟੀਆਂ ਵੀ ਬੰਦ ਨਹੀਂ ਹੋ ਰਹੀਆਂ ਸਨ। ਜਦੋਂ ਉਹ ਹਸਪਤਾਲ ਪੁੱਜਿਆ ਤਾਂ ਡਾਕਟਰ ਨੇ ਉਸ ਦੇ ਢਿੱਡ ਦੇ ਐਕਸਰੇ ਅਤੇ ਸਿਟੀ ਸਕੈਨ ਕੀਤੀ। ਇਸ ਦੌਰਾਨ ਉਸ ਦੇ ਢਿੱਡ ‘ਚ ਨਟ, ਬੋਲਟ, ਪੇਚ, ਰੱਖੜੀਆਂ, ਲਾਕੇਟ, ਈਅਰ ਫੋਨ ਅਤੇ ਮੈਗਨੇਟ ਦਿਖਾਈ ਦਿੱਤੇ। ਉਕਤ ਵਿਅਕਤੀ ਦਾ ਹਸਪਤਾਲ ‘ਚ 3 ਘੰਟੇ ਆਪਰੇਸ਼ਨ ਕੀਤਾ ਗਿਆ ਅਤੇ ਸਾਰਾ ਸਮਾਨ ਕੱਢਿਆ ਗਿਆ।
ਡਾਕਟਰਾਂ ਦਾ ਕਹਿਣਾ ਹੈ ਕਿ ਇਹ ਪਹਿਲਾ ਮਾਮਲਾ ਉਨ੍ਹਾਂ ਦੇ ਸਾਹਮਣੇ ਆਇਆ ਹੈ। ਫਿਲਹਾਲ ਮਰੀਜ਼ ਕੁਲਦੀਪ ਸਿੰਘ ਦੀ ਹਾਲਤ ਅਜੇ ਠੀਕ ਨਹੀਂ ਹੈ ਅਤੇ ਉਸ ਨੂੰ ਆਈ. ਸੀ. ਯੂ. ‘ਚ ਵੈਂਟੀਲੇਟਰ ‘ਤੇ ਰੱਖਿਆ ਗਿਆ ਹੈ। ਡਾਕਟਰਾਂ ਦਾ ਕਹਿਣਾ ਹੈ ਕਿ ਉਸ ਨੂੰ ਬਚਾਉਣ ਦੀ ਪੂਰੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ।
