ਬਜ਼ੁਰਗਾਂ ਦੀ ਐਫਡੀ ਤੋਂ ਅਮੀਰ ਹੋ ਰਹੀ ਸਰਕਾਰ, ਕਮਾਏ ਹਜ਼ਾਰਾਂ ਕਰੋੜ ਰੁਪਏ, ਜਾਣੋਂ ਕਿਸ ਤਰ੍ਹਾਂ

ਸਰਕਾਰ ਨੇ ਦੇਸ਼ ਦੇ ਸੀਨੀਅਰ ਨਾਗਰਿਕਾਂ ਦੇ ਫਿਕਸਡ ਡਿਪਾਜ਼ਿਟ ਵਿੱਚ ਨਿਵੇਸ਼ ‘ਤੇ ਵਿਆਜ ਤੋਂ ਟੈਕਸ ਵਿੱਚ 27,000 ਕਰੋੜ ਰੁਪਏ ਤੋਂ ਵੱਧ ਦੀ ਕਮਾਈ ਕੀਤੀ ਹੈ। ਇਹ ਇੱਕ ਬਹੁਤ ਹੀ ਚੰਗਾ ਅੰਕੜਾ ਹੈ ਅਤੇ ਪਿਛਲੇ ਅੰਕੜਿਆਂ ਅਨੁਸਾਰ ਇਸ ਵਿੱਚ ਕਾਫ਼ੀ ਵਾਧਾ ਦਰਜ ਕੀਤਾ ਗਿਆ ਹੈ।ਸਰਕਾਰ ਨੇ ਪਿਛਲੇ ਵਿੱਤੀ ਸਾਲ ‘ਚ ਫਿਕਸਡ ਡਿਪਾਜ਼ਿਟ ‘ਤੇ ਮਿਲਣ ਵਾਲੇ ਵਿਆਜ ‘ਤੇ ਸੀਨੀਅਰ ਨਾਗਰਿਕਾਂ ਤੋਂ 27,000 ਕਰੋੜ ਰੁਪਏ ਤੋਂ ਜ਼ਿਆਦਾ ਦਾ ਟੈਕਸ ਇਕੱਠਾ ਕੀਤਾ ਹੈ। ਇਹ ਜਾਣਕਾਰੀ ਦੇਸ਼ ਦੇ ਸਭ ਤੋਂ ਵੱਡੇ ਕਰਜ਼ਦਾਤਾ ਐਸਬੀਆਈ ਰਿਸਰਚ ਦੀ ਰਿਪੋਰਟ ਦੇ ਅਨੁਸਾਰ ਮਿਲੀ ਹੈ।

ਐਸਬੀਆਈ ਰਿਸਰਚ ਦੀ ਰਿਪੋਰਟ ਵਿੱਚ ਕਿਹਾ ਗਿਆ ਹੈ ਕਿ ਪਿਛਲੇ ਪੰਜ ਸਾਲਾਂ ਵਿੱਚ, ਵਿੱਤੀ ਸਾਲ 2023-24 ਦੇ ਅੰਤ ਵਿੱਚ ਜਮ੍ਹਾਂ ਦੀ ਕੁੱਲ ਰਕਮ 143 ਪ੍ਰਤੀਸ਼ਤ ਵਧ ਕੇ 34 ਲੱਖ ਕਰੋੜ ਰੁਪਏ ਹੋ ਗਈ, ਜਦਕਿ ਪੰਜ ਸਾਲ ਪਹਿਲਾਂ ਇਹ 14 ਲੱਖ ਕਰੋੜ ਰੁਪਏ ਸੀ। ਰਿਪੋਰਟ ਮੁਤਾਬਕ ਫਿਕਸਡ ਡਿਪਾਜ਼ਿਟ ‘ਤੇ ਜ਼ਿਆਦਾ ਵਿਆਜ ਦਰਾਂ ਕਾਰਨ ਇਹ ਡਿਪਾਜ਼ਿਟ ਸਕੀਮ ਸੀਨੀਅਰ ਨਾਗਰਿਕਾਂ ‘ਚ ਕਾਫੀ ਮਸ਼ਹੂਰ ਹੋ ਗਈ ਹੈ। ਇਸ ਦੌਰਾਨ ਫਿਕਸਡ ਡਿਪਾਜ਼ਿਟ ਖਾਤਿਆਂ ਦੀ ਕੁੱਲ ਗਿਣਤੀ 81 ਫੀਸਦੀ ਵਧ ਕੇ 7.4 ਕਰੋੜ ਹੋ ਗਈ ਹੈ।

ਐਸਬੀਆਈ ਦੀ ਰਿਸਰਚ ਦਾ ਅੰਦਾਜ਼ਾ ਹੈ ਕਿ ਇਨ੍ਹਾਂ ਵਿੱਚੋਂ 7.3 ਕਰੋੜ ਖਾਤਿਆਂ ਵਿੱਚ 15 ਲੱਖ ਰੁਪਏ ਤੋਂ ਵੱਧ ਦੀ ਰਕਮ ਜਮ੍ਹਾਂ ਹੈ। ਇਨ੍ਹਾਂ ‘ਤੇ 7.5 ਫੀਸਦੀ ਵਿਆਜ ਦੇ ਅੰਦਾਜ਼ੇ ਨੂੰ ਧਿਆਨ ‘ਚ ਰੱਖਦੇ ਹੋਏ ਸੀਨੀਅਰ ਨਾਗਰਿਕਾਂ ਨੇ ਪਿਛਲੇ ਵਿੱਤੀ ਸਾਲ ‘ਚ ਸਿਰਫ ਵਿਆਜ ਦੇ ਰੂਪ ‘ਚ 2.7 ਲੱਖ ਕਰੋੜ ਰੁਪਏ ਕਮਾਏ ਹਨ। ਰਿਪੋਰਟ ‘ਚ ਕਿਹਾ ਗਿਆ ਹੈ ਕਿ ਇਸ ‘ਚ ਬੈਂਕ ਡਿਪਾਜ਼ਿਟ ਤੋਂ 2.57 ਲੱਖ ਕਰੋੜ ਰੁਪਏ ਅਤੇ ਸੀਨੀਅਰ ਸਿਟੀਜ਼ਨ ਸੇਵਿੰਗ ਸਕੀਮ ‘ਤੇ ਬਾਕੀ ਰਕਮ ਸ਼ਾਮਲ ਹੈ।

ਰਿਪੋਰਟ ਵਿੱਚ ਕਿਹਾ ਗਿਆ ਹੈ, “ਇਹ ਮੰਨਦੇ ਹੋਏ ਕਿ ਸੀਨੀਅਰ ਨਾਗਰਿਕਾਂ ਦੁਆਰਾ ਅਦਾ ਕੀਤੇ 10 ਪ੍ਰਤੀਸ਼ਤ (ਔਸਤ) ਟੈਕਸ ਨੂੰ ਸਾਰੀਆਂ ਸ਼੍ਰੇਣੀਆਂ ਵਿੱਚ ਇਕਸਾਰ ਮੰਨਦੇ ਹੋਏ,  ਭਾਰਤ ਸਰਕਾਰ ਦੁਆਰਾ ਟੈਕਸ ਦੀ ਉਗਰਾਹੀ ਲਗਭਗ 27,106 ਕਰੋੜ ਰੁਪਏ ਹੋਵੇਗੀ। ਜ਼ਿਕਰਯੋਗ ਹੈ ਕਿ  ਦੇਸ਼ ਦੇ ਕਈ ਬੈਂਕ ਸੀਨੀਅਰ ਨਾਗਰਿਕਾਂ ਨੂੰ ਆਪਣੀ ਫਿਕਸਡ ਡਿਪਾਜ਼ਿਟ ‘ਤੇ 8.1 ਫੀਸਦੀ ਤੱਕ ਵਿਆਜ ਵੀ ਦੇ ਰਹੇ ਹਨ।