ਕਜ਼ਾਖ਼ਸਤਾਨ ਦੇ ਅਕਤਾਉ ਸ਼ਹਿਰ ਦੇ ਨੇੜੇ ਅਜ਼ਰਬਾਈਜਾਨ ਏਅਰਲਾਈਨ ਦਾ ਇੱਕ ਜਹਾਜ਼ ਬੀਤੇ ਦਿਨ ਕਰੈਸ਼ ਹੋ ਗਿਆ ਸੀ। ਇਸ ਹਾਦਸੇ ਵਿੱਚ 38 ਲੋਕਾਂ ਦੀ ਮੌਤ ਹੋ ਗਈ। ਹਾਦਸੇ ਤੋਂ ਬਾਅਦ ਹੁਣ ਇਸ ਦੀਆਂ ਵੀਡੀਓਜ਼ ਵੀ ਸੋਸ਼ਲ ਮੀਡੀਆ ‘ਤੇ ਵਾਇਰਲ ਹੋ ਰਹੀਆਂ ਹਨ। ਇਕ ਵਾਇਰਲ ਵੀਡੀਓ ਵਿੱਚ ਇੱਕ ਵਿਅਕਤੀ ਹਾਦਸੇ ਤੋਂ ਪਹਿਲਾਂ ਜਹਾਜ਼ ਦੇ ਅੰਦਰ ਵੀਡੀਓ ਬਣਾ ਰਿਹਾ ਹੈ, ਜਿਸ ਵਿੱਚ ਇੱਕ ਯਾਤਰੀ ‘ਅੱਲਾਹ-ਹੂ-ਅਕਬਰ’ ਕਹਿ ਰਿਹਾ ਹੈ।
ਦਾਅਵਾ ਕੀਤਾ ਜਾ ਰਿਹਾ ਹੈ ਕਿ ਇਹ ਯਾਤਰੀ ਇਸੇ ਜਹਾਜ਼ ਵਿੱਚ ਸਵਾਰ ਸੀ। ਹਾਦਸੇ ਦੀ ਇਹ ਦਰਦਨਾਕ ਵੀਡੀਓ ਸੋਸ਼ਲ ਮੀਡੀਆ ‘ਤੇ ਕਾਫੀ ਸ਼ੇਅਰ ਕੀਤੀ ਜਾ ਰਹੀ ਹੈ, ਜਿਸ ‘ਚ ਹਾਦਸੇ ਦਾ ਸ਼ਿਕਾਰ ਹੋਏ ਜਹਾਜ਼ ਦੇ ਆਖਰੀ ਪਲ ਦੇਖੇ ਜਾ ਸਕਦੇ ਹਨ। ਕੈਸਪੀਅਨ ਸਾਗਰ ਦੇ ਪੂਰਬੀ ਤੱਟ ‘ਤੇ ਤੇਲ ਅਤੇ ਗੈਸ ਕੇਂਦਰ, ਅਕਤਾਊ ਸ਼ਹਿਰ ਦੇ ਨੇੜੇ ਹੋਏ ਇਸ ਹਾਦਸੇ ‘ਚ 38 ਲੋਕਾਂ ਦੀ ਮੌਤ ਹੋ ਗਈ।
ਵੀਡੀਓ ‘ਚ ਇਕ ਯਾਤਰੀ ਨੂੰ ਵਾਰ-ਵਾਰ ‘ਅੱਲ੍ਹਾ ਹੂ ਅਕਬਰ’ ਕਹਿੰਦੇ ਸੁਣਿਆ ਜਾ ਸਕਦਾ ਹੈ। ਇਸ ਦੌਰਾਨ ਜਹਾਜ਼ ਤੇਜ਼ੀ ਨਾਲ ਹੇਠਾਂ ਡਿੱਗ ਰਿਹਾ ਹੈ। ਸੀਟਾਂ ‘ਤੇ ਪੀਲੇ ਆਕਸੀਜਨ ਮਾਸਕ ਲਟਕਦੇ ਦਿਖਾਈ ਦੇ ਰਹੇ ਹਨ। ਜਦੋਂ ਕਿ ‘ਆਪਣੀ ਸੀਟ ਬੈਲਟ ਪਹਿਨੋ’, ਇੱਕ ਦਰਵਾਜ਼ੇ ਦੀ ਘੰਟੀ ਵਰਗੀ ਆਵਾਜ਼, ਚੀਕਣ ਦੀਆਂ ਆਵਾਜ਼ਾਂ ਸੁਣੀਆਂ ਜਾ ਸਕਦੀਆਂ ਹਨ। ਇਹ ਜਹਾਜ਼ ਕੈਸਪੀਅਨ ਦੇ ਪੱਛਮੀ ਤੱਟ ‘ਤੇ ਸਥਿਤ ਅਜ਼ਰਬਾਈਜਾਨ ਦੀ ਰਾਜਧਾਨੀ ਬਾਕੂ ਤੋਂ ਦੱਖਣੀ ਰੂਸ ਦੇ ਚੇਚਨੀਆ ਦੇ ਗਰੋਜ਼ਨੀ ਸ਼ਹਿਰ ਲਈ ਉਡਾਣ ਭਰ ਰਿਹਾ ਸੀ। ਅਜ਼ਰਬਾਈਜਾਨ ਏਅਰਲਾਈਨਜ਼ ਨੇ ਕਿਹਾ ਕਿ ਜਹਾਜ਼ ਨੇ ਅਕਟਾਊ ਤੋਂ ਲਗਭਗ 3 ਕਿਲੋਮੀਟਰ ਦੂਰ ਐਮਰਜੈਂਸੀ ਲੈਂਡਿੰਗ ਕੀਤੀ।
ਕੈਬਿਨ ਦੇ ਅੰਦਰ ਲਈ ਗਈ ਇੱਕ ਹੋਰ ਵੀਡੀਓ ਵਿੱਚ, ਜਹਾਜ਼ ਦੀ ਛੱਤ ਦਾ ਪੈਨਲ, ਜਿਸ ਕੋਲ ਰੀਡਿੰਗ ਲਾਈਟਾਂ ਅਤੇ ਏਅਰ ਬਲੋਅਰ ਹੈ, ਉਹ ਉਲਟਾ ਦਿਖਾਈ ਦੇ ਰਿਹਾ ਹੈ ਅਤੇ ਲੋਕ ਮਦਦ ਲਈ ਰੌਲਾ ਪਾਉਂਦੇ ਵੀ ਨਜ਼ਰ ਆ ਰਹੇ ਹਨ। ਇਹ ਵੀਡੀਓ ਸਪੱਸ਼ਟ ਤੌਰ ‘ਤੇ ਜਹਾਜ਼ ਦੇ ਕਰੈਸ਼ ਹੋਣ ਤੋਂ ਬਾਅਦ ਦਾ ਹੈ।
ਇਸ ਦੌਰਾਨ ਅਜ਼ਰਬਾਈਜਾਨ ਨੇ ਰਾਜਧਾਨੀ ਬਾਕੂ ਤੋਂ ਰੂਸ ਦੇ ਗ੍ਰੋਨਜੀ ਜਾ ਰਹੇ ਐਂਬਰੇਅਰ 190 ਯਾਤਰੀ ਜਹਾਜ਼ ਦੇ ਹਾਦਸੇ ਵਿੱਚ ਮਾਰੇ ਗਏ ਵਿਅਕਤੀਆਂ ਦੇ ਸਨਮਾਨ ਵਿੱਚ ਵੀਰਵਾਰ ਨੂੰ ਰਾਸ਼ਟਰੀ ਸੋਗ ਦਾ ਐਲਾਨ ਕੀਤਾ ਹੈ। ਫਲਾਈਟ ਨੰਬਰ J2-8243 ਕਜ਼ਾਕਿਸਤਾਨ ਦੇ ਅਕਤਾਊ ਹਵਾਈ ਅੱਡੇ ਦੇ ਨੇੜੇ ਹਾਦਸਾਗ੍ਰਸਤ ਹੋ ਗਿਆ। ਕਜ਼ਾਕਿਸਤਾਨ ਦੇ ਐਮਰਜੈਂਸੀ ਸਥਿਤੀਆਂ ਦੇ ਮੰਤਰਾਲੇ (ਐਮਈਐਸ) ਨੇ 28 ਬਚੇ ਲੋਕਾਂ ਦੀ ਰਿਪੋਰਟ ਕੀਤੀ ਹੈ। ਬਚਾਅ ਕਾਰਜ ਜਾਰੀ ਹੈ।
