ਮੂਸੇਵਾਲਾ ਕਤਲਕਾਂਡ ‘ਚ ਚਾਰਜਸ਼ੀਟ ਦਾਖਲ, 36 ਮੁਲਜ਼ਮ ਨਾਮਜ਼ਦ, 122 ਗਵਾਹ ਵੀ ਤਿਆਰ…
ਮਾਨਸਾ (ਵੀਓਪੀ ਬਿਊਰੋ) 29 ਮਈ ਨੂੰ ਹੋਏ ਪੰਜਾਬੀ ਸਿੰਗਰ ਸਿੱਧੂ ਮੂਸੇਵਾਲਾ ਦੇ ਕਤਲ ਤੋਂ ਬਾਅਦ ਹੁਣ ਪੁਲਿਸ ਨੇ ਮਾਨਸਾ ਦੀ ਅਦਾਲਤ ਵਿੱਚ ਚਾਰਜਸ਼ੀਟ ਪੇਸ਼ ਕੀਤੀ ਹੈ। ਉਕਤ ਮਾਮਲੇ ਵਿੱਚ ਪੁਲਿਸ ਨੇ ਚਾਰਜਸ਼ੀਟ ਵਿੱਚ ਕੁੱਲ 36 ਮੁਲਜ਼ਮਾਂ ਨੂੰ ਨਾਮਜ਼ਦ ਕੀਤਾ ਹੈ ਅਤੇ ਇਸ ਵਿੱਚੋਂ 24 ਮੁਲਜ਼ਮਾਂ ਖ਼ਿਲਾਫ਼ ਚਲਾਨ ਪੇਸ਼ ਕੀਤਾ ਹੈ। ਸਿੱਧੂ ਕਤਲ ਕੇਸ ਵਿੱਚ ਗਵਾਹ ਬਣ ਚੁੱਕੇ ਗਵਾਹਾਂ ਦੀ ਗਿਣਤੀ ਹੁਣ 122 ਦੇ ਕਰੀਬ ਹੈ।ਇਸ ਦੌਰਾਨ ਵਿਦੇਸ਼ ਵਿਚ ਡੇਰਾ ਲਾਈ ਬੈਠੇ 4 ਗੈਂਗਸਟਰਾਂ ਨੂੰ ਵੀ ਨਾਮਜ਼ਦ ਕੀਤਾ ਹੈ। ਵਿਦੇਸ਼ ਬੈਠੇ ਚਾਰ ਗੈਂਗਸਟਰ ਜਿਨ੍ਹਾਂ ‘ਚ ਗੋਲਡੀ ਬਰਾੜ, ਅਨਮੋਲ, ਸਚਿਨ ਅਤੇ ਲਿਪਿਨ ਨਹਿਰਾ ਸ਼ਾਮਲ ਹਨ। 
ਮਾਨਸਾ ਪੁਲੀਸ ਨੇ 1850 ਪੰਨਿਆਂ ਦੀ ਵਿਸਤ੍ਰਿਤ ਚਾਰਜਸ਼ੀਟ ਦਾਇਰ ਕੀਤੀ ਹੈ। ਇਸ ਚਾਰਜਸ਼ੀਟ ਵਿੱਚ ਕੁੱਲ 36 ਮੁਲਜ਼ਮਾਂ ਵਿੱਚੋਂ 24 ਕਾਤਲਾਂ ਦੇ ਨਾਂ ਦਿੱਤੇ ਗਏ ਹਨ। ਇਸ ਦੌਰਾਨ ਗਵਾਹਾਂ ਵਿਚ ਸਿੱਧੂ ਦੇ ਪਿਤਾ ਦੇ ਨਾਲ-ਨਾਲ ਉਸਦੇ ਦੋ ਦੋਸਤ, ਜਾਂਚ ਅਧਿਕਾਰੀ, ਪਿੰਡ ਜਵਾਹਰ ਕੇ ਦੇ ਲੋਕ, ਪੋਸਟਮਾਰਟਮ ਕਰਨ ਵਾਲਾ ਡਾਕਟਰ, ਮੌਕੇ ‘ਤੇ ਪਹੁੰਚੇ ਪੁਲਿਸ ਅਧਿਕਾਰੀ ਅਤੇ ਕਈ ਸ਼ਾਮਲ ਹਨ। ਜਾਣਕਾਰੀ ਅਨੁਸਾਰ ਸਿੱਧੂ ਕਤਲ ਕੇਸ ਵਿੱਚ ਜਿਨ੍ਹਾਂ ਗੁਆਂਢੀਆਂ ਦਾ ਨਾਮ ਆਇਆ ਹੈ, ਉਹ ਦੋਵੇਂ ਅਸਲੀ ਭਰਾ ਹਨ। ਜੀਵਨਜੋਤ ਸਿੰਘ ਅਤੇ ਜਗਤਾਰ ਸਿੰਘ ਸਿੱਧੂ ਮੂਸੇਵਾਲਾ ਦੇ ਗੁਆਂਢੀ ਹਨ।
