9 ਤੋਂ 14 ਸਾਲ ਦੇ 4 ਬੱਚੇ 2 ਦਿਨਾਂ ਤੋਂ ਲਾਪਤਾ, ਘਰੋਂ ਸਕੂਲ ਦਾ ਕਹਿ ਕੇ ਗਏ ਨਹੀਂ ਆਏ ਵਾਪਸ, ਸੀਸੀਟੀਵੀ ਫੁਟੇਜ ਦੇਖੀ ਤਾਂ ਉੱਡੇ ਹੋਸ਼
ਮੋਹਾਲੀ (ਵੀਓਪੀ ਬਿਊਰੋ) ਮੋਹਾਲੀ ਦੇ ਹਲਕਾ ਡੇਰਾਬੱਸੀ ਦੇ ਨੇੜਲੇ ਪਿੰਡ ਕਕਰਾਲੀ ਤੋਂ 9 ਤੋਂ 14 ਸਾਲ ਦੇ ਚਾਰ ਨਾਬਾਲਿਗ ਬੱਚੇ ਲਾਪਤਾ ਹੋ ਗਏ ਹਨ ਅਤੇ ਇਹ ਬੱਚੇ ਮੰਗਲਵਾਰ ਤੋਂ ਲਾਪਤਾ ਹਨ। ਚਾਰ ਬੱਚਿਆਂ ਵਿੱਚੋਂ ਤਿੰਨ ਸਰਕਾਰੀ ਸਕੂਲ ਕਕਰਾਲੀ ਵਿੱਚ ਚੌਥੀ ਜਮਾਤ ਦੇ ਵਿਦਿਆਰਥੀ ਹਨ ਅਤੇ ਚੌਥਾ ਬੱਚਾਂ ਅਲੱਗ ਹੈ। ਤਿੰਨੇ ਵਿਦਿਆਰਥੀ ਦੁਪਹਿਰ 3 ਵਜੇ ਸਕੂਲ ਦੇ ਸਮੇਂ ਤੋਂ ਬਾਅਦ ਰਵਾਨਾ ਹੋਏ ਅਤੇ ਸੀਸੀਟੀਵੀ ਫੁਟੇਜ ਵਿੱਚ ਸਨੌਲੀ ਪਿੰਡ ਵੱਲ ਜਾਂਦੇ ਅਤੇ ਮੁਬਾਰਿਕਪੁਰ ਨੂੰ ਵਾਪਸ ਆਉਂਦੇ ਹੋਏ ਦਿਖਾਈ ਦਿੱਤੇ। ਪੁਲਿਸ ਨੇ ਦੱਸਿਆ ਕਿ ਤਲਾਸ਼ ਸ਼ੁਰੂ ਕਰ ਦਿੱਤੀ ਗਈ ਹੈ। ਏਐੱਸਪੀ ਡਾ. ਦਰਪਨ ਆਹਲੂਵਾਲੀਆ ਨੇ ਦੱਸਿਆ ਕਿ ਮਾਮਲਾ ਦਰਜ ਕਰ ਲਿਆ ਗਿਆ ਹੈ। ਪੁਲਿਸ ਵੱਖ-ਵੱਖ ਟੀਮਾਂ ਬਣਾ ਕੇ ਬੱਚਿਆਂ ਦੀ ਭਾਲ ਕਰ ਰਹੀ ਹੈ। ਲਾਪਤਾ ਬੱਚਿਆਂ ਵਿੱਚ ਦੋ ਬੱਚੇ 9 ਸਾਲ ਦੇ, ਇੱਕ ਦੀ ਉਮਰ 10 ਸਾਲ ਅਤੇ ਇੱਕ ਦੀ ਉਮਰ 14 ਸਾਲ ਹੈ।
ਲਾਪਤਾ ਬੱਚਿਆਂ ਦੇ ਇੱਕ ਸਰਪ੍ਰਸਤ ਅਸ਼ੋਕ ਨੇ ਦੱਸਿਆ ਕਿ ਪਤਨੀ ਘਰ ਵਿੱਚ ਮੌਜੂਦ ਸੀ ਅਤੇ ਤਿੰਨ ਵਜੇ ਸਕੂਲ ਤੋਂ ਛੁੱਟੀ ਹੋਣ ਤੋਂ ਬਾਅਦ ਬੇਟੇ ਨੇ ਕਿਹਾ ਕਿ ਮੈਂ ਦੁਬਾਰਾ ਸਕੂਲ ਪੜ੍ਹਨ ਲਈ ਜਾ ਰਿਹਾ ਹਾਂ ਅਤੇ ਉਹ ਘਰੋਂ ਚਲਾ ਗਿਆ ਸੀ। ਇਸੇ ਤਰ੍ਹਾਂ ਬਾਕੀ ਬੱਚੇ ਵੀ ਬਹਾਨੇ ਬਣਾ ਕੇ ਘਰੋਂ ਚਲੇ ਗਏ ਹਨ। 9 ਸਾਲਾ ਸਤਵੀਰ ਬੈਗ ਲੈ ਕੇ ਘਰੋਂ ਨਿਕਲਿਆ ਤਾਂ ਕਿ ਕਿਸੇ ਨੂੰ ਸ਼ੱਕ ਨਾ ਹੋਵੇ। ਇਸ ਤੋਂ ਬਾਅਦ ਬੱਚੇ ਖੇਡਦੇ ਹੋਏ ਪਿੰਡ ਦੇ ਬਾਹਰ ਨਿਕਲੇ, ਇਸ ਘਟਨਾ ਦਾ ਪਤਾ ਸੀਸੀਟੀਵੀ ਤੋਂ ਲੱਗਾ ਹੈ। ਸ਼ਾਮ ਛੇ ਵਜੇ ਤੋਂ ਬਾਅਦ ਮਾਪਿਆਂ ਨੇ ਬੱਚਿਆਂ ਦੀ ਭਾਲ ਸ਼ੁਰੂ ਕਰ ਦਿੱਤੀ। ਪਹਿਲੀ ਫੁਟੇਜ ‘ਚ ਬੱਚਿਆਂ ਨੂੰ ਸਵੇਰੇ 3.54 ‘ਤੇ ਪਿੰਡ ਛੱਡਦੇ ਦੇਖਿਆ ਗਿਆ। ਦੂਜੀ ਫੁਟੇਜ ‘ਚ ਉਨ੍ਹਾਂ ਨੂੰ ਸਵੇਰੇ 4.34 ਵਜੇ ਤਿੰਨ ਕਿਲੋਮੀਟਰ ਦੂਰ ਪਿੰਡ ਸਨੌਲੀ ਦੇ ਚਰਚ ‘ਚੋਂ ਬਾਹਰ ਆਉਂਦੇ ਦੇਖਿਆ ਗਿਆ। ਇਸ ਤੋਂ ਬਾਅਦ ਬੱਚਿਆਂ ਦੀ ਕੋਈ ਫੁਟੇਜ ਨਹੀਂ ਮਿਲੀ ਕਿ ਉਹ ਕਿਸ ਰਸਤੇ ਗਏ ਸਨ।
ਦੱਸ ਦੇਈਏ ਕਿ ਲਾਪਤਾ ਹੋਏ ਚਾਰ ਬੱਚਿਆਂ ਵਿੱਚ 9 ਸਾਲਾ ਸੁੱਖੀ ਪੁੱਤਰ ਅਸ਼ੋਕ ਕੁਮਾਰ, 14 ਸਾਲਾ ਵਿਸ਼ਾਲ ਪੁੱਤਰ ਸ਼ੋਇਬ ਰਾਮ, 9 ਸਾਲਾ ਅਜੇ ਪਾਲ ਪੁੱਤਰ ਦੀਪੇਸ਼, 10 ਸਾਲਾ ਸਤਵੀਰ ਪੁੱਤਰ ਗੁਰਦੀਪ ਸਿੰਘ ਸ਼ਾਮਲ ਹਨ। ਲਾਪਤਾ ਸਤਵੀਰ ਦਾ ਪਿਤਾ ਖੇਤੀਬਾੜੀ ਕਰਦਾ ਹੈ ਅਤੇ ਬਾਕੀ ਤਿੰਨ ਬੱਚੇ ਪਰਵਾਸੀ ਮਜ਼ਦੂਰ ਹਨ। 14 ਸਾਲਾ ਵਿਸ਼ਾਲ ਨੂੰ ਛੱਡ ਕੇ ਤਿੰਨੋਂ ਬੱਚੇ ਇੱਕੋ ਸਕੂਲ ਵਿੱਚ ਪੜ੍ਹਦੇ ਹਨ। ਜਦੋਂ ਤੋਂ ਬੱਚੇ ਲਾਪਤਾ ਹੋਏ ਹਨ, ਚਾਰੇ ਬੱਚਿਆਂ ਦੇ ਪਰਿਵਾਰਕ ਮੈਂਬਰ ਦੁਖੀ ਹਨ ਅਤੇ ਚਿੰਤਾ ਵਿੱਚ ਹਨ ਕਿ ਸਰਦੀਆਂ ਵਿੱਚ ਬੱਚੇ ਕਿੱਥੇ ਹੋਣਗੇ। ਉਸ ਨੂੰ ਨਾ ਤਾਂ ਸਕੂਲ ਵਿਚ ਕਿਸੇ ਨੇ ਝਿੜਕਿਆ ਅਤੇ ਨਾ ਹੀ ਘਰ ਵਿਚ ਕਿਸੇ ਨੇ ਝਿੜਕਿਆ ਹੈ।
