ਚੋਰੀ ਦਾ ਸਮਾਨ ਵੰਡਣ ਨੂੰ ਲੈ ਕੇ ਆਪਸ ‘ਚ ਲੜ ਪਏ ਨਸ਼ੇੜੀਆਂ ਨੇ ਕੰਧ ‘ਚ ਸਿਰ ਮਾਰ-ਮਾਰ ਕਰ’ਤਾ ਦੋਸਤ ਦਾ ਕਤਲ
ਸੰਗਰੂਰ (ਵੀਓਪੀ ਬਿਊਰੋ) ਚੋਰੀ ਦਾ ਸਾਮਾਨ ਵੰਡਣ ਨੂੰ ਲੈ ਕੇ 3 ਦੋਸਤਾਂ ਵਿਚਾਲੇ ਹੋਈ ਲੜਾਈ ‘ਚ ਇਕ ਦੋਸਤ ਦੀ ਮੌਤ ਹੋ ਗਈ। ਦੋਸ਼ ਹੈ ਕਿ ਦੋ ਦੋਸਤਾਂ ਨੇ ਤੀਜੇ ਦੋਸਤ ਨੂੰ ਫੜ ਕੇ ਕੰਧ ‘ ਚ ਉਸ ਦਾ ਸਿਰ ਮਾਰਿਆ। ਇਸ ਤੋਂ ਬਾਅਦ ਉਸ ਦਾ ਗਲਾ ਘੁੱਟਿਆ ਗਿਆ। ਘਟਨਾ ਤੋਂ ਬਾਅਦ ਨੌਜਵਾਨ ਦੀ ਲਾਸ਼ 3 ਦਿਨ ਤੱਕ ਘਰ ‘ਚ ਪਈ ਰਹੀ। ਪਿੰਡ ਗੰਡੇਵਾਲ ਦੀ ਵਸਨੀਕ ਹਰਜੀਤ ਕੌਰ ਨੇ ਪੁਲਿਸ ਨੂੰ ਦੱਸਿਆ ਕਿ ਉਹ 4 ਭੈਣ-ਭਰਾ ਸੀ। ਸਭ ਤੋਂ ਛੋਟਾ ਭਰਾ ਸਵਰਨ ਸਿੰਘ ਉਰਫ਼ ਸੋਮਾ (35) ਅਣਵਿਆਹਿਆ ਸੀ ਜਦਕਿ 3 ਭੈਣ-ਭਰਾ ਵਿਆਹੇ ਹੋਏ ਹਨ। ਸਵਰਨ ਸਿੰਘ ਦਾ ਆਪਣੇ ਭਰਾ ਚੂਹੜ ਸਿੰਘ ਨਾਲ ਜ਼ਮੀਨੀ ਵਿਵਾਦ ਚੱਲ ਰਿਹਾ ਹੈ।
ਦੋਵੇਂ ਭਰਾ ਆਪਣੇ-ਆਪਣੇ ਘਰ ਵੱਖ-ਵੱਖ ਰਹਿੰਦੇ ਹਨ। ਦੋਹਾਂ ਘਰਾਂ ਦੀ ਕੰਧ ਸਾਂਝੀ ਹੈ। ਛੋਟਾ ਭਰਾ ਸਵਰਨ ਸਿੰਘ ਉਸ ਨੂੰ ਮਿਲਣ ਆਉਂਦਾ ਸੀ ਪਰ ਪਿਛਲੇ 3 ਦਿਨਾਂ ਤੋਂ ਨਹੀਂ ਆਇਆ। ਉਹ ਸੋਮਵਾਰ ਦੁਪਹਿਰ ਪਿੰਡ ਰਾਮ ਨਗਰ ਛੰਨਾ ਵਿਖੇ ਆਈ ਜਿੱਥੇ ਘਰ ਦਾ ਮੇਨ ਗੇਟ ਖੁੱਲ੍ਹਾ ਸੀ ਅਤੇ ਕਮਰੇ ਨੂੰ ਤਾਲਾ ਲੱਗਿਆ ਹੋਇਆ ਸੀ। ਕਮਰੇ ਵਿੱਚੋਂ ਬਦਬੂ ਆ ਰਹੀ ਸੀ। ਜਦੋਂ ਮੈਂ ਤਾਲਾ ਤੋੜ ਕੇ ਦੇਖਿਆ ਤਾਂ ਅੰਦਰ ਮੇਰਾ ਭਰਾ ਮਰਿਆ ਪਿਆ ਸੀ। ਭੈਣ ਦੇ ਬਿਆਨਾਂ ’ਤੇ ਪੁਲਿਸ ਨੇ ਕਤਲ ਦਾ ਕੇਸ ਦਰਜ ਕਰਕੇ ਸਤਨਾਮ ਸਿੰਘ ਅਤੇ ਸੁਖਚੈਨ ਸਿੰਘ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ।
ਸਤਨਾਮ ਅਤੇ ਸੁਖਚੈਨ ਸਿੰਘ ਨੇ ਸਵਰਨ ਸਿੰਘ ਨੂੰ ਫੜ ਕੇ ਕੰਧ ਨਾਲ ਸਿਰ ਮਾਰਿਆ। ਜਦੋਂ ਉਹ ਜ਼ਮੀਨ ‘ਤੇ ਡਿੱਗਿਆ ਤਾਂ ਉਸਦਾ ਗਲਾ ਘੁੱਟਿਆ ਗਿਆ। ਇਸ ਕਾਰਨ ਸਵਰਨ ਸਿੰਘ ਦੀ ਮੌਤ ਹੋ ਗਈ। ਬਾਅਦ ਵਿਚ ਦੋਸ਼ੀ ਕਮਰੇ ਨੂੰ ਬਾਹਰੋਂ ਤਾਲਾ ਲਗਾ ਕੇ ਫਰਾਰ ਹੋ ਗਿਆ। ਐਸਐਸਪੀ ਸੁਰਿੰਦਰ ਲਾਂਬਾ ਨੇ ਦੱਸਿਆ ਕਿ ਸਵਰਨ ਸਿੰਘ ਦੀ ਸਤਨਾਮ ਸਿੰਘ ਅਤੇ ਸੁਖਚੈਨ ਸਿੰਘ ਨਾਲ ਦੋਸਤੀ ਸੀ। ਉਹ ਨਸ਼ੇ ਦੇ ਆਦੀ ਹਨ। ਕੁਝ ਦਿਨ ਪਹਿਲਾਂ ਤਿੰਨਾਂ ਨੇ ਪਿੰਡ ਰਾਮ ਨਗਰ ਛੰਨਾ ਤੋਂ ਐਲਸੀਡੀ ਅਤੇ ਹੋਰ ਸਾਮਾਨ ਚੋਰੀ ਕਰ ਲਿਆ ਸੀ। 24 ਫਰਵਰੀ ਦੀ ਰਾਤ ਨੂੰ ਸਵਰਨ ਸਿੰਘ ਦੇ ਘਰ ਚੋਰੀ ਦਾ ਸਾਮਾਨ ਵੰਡਣ ਨੂੰ ਲੈ ਕੇ ਤਿੰਨਾਂ ਵਿਚਾਲੇ ਲੜਾਈ ਹੋ ਗਈ।
