ਗੁੰਡਾਗਰਦੀ; ਟੋਲ ਪਲਾਜ਼ਾ ‘ਤੇ ਪਰਚੀ ਕਟਾਉਣ ਨੂੰ ਕਿਹਾ ਤਾਂ ਮੈਨੇਜਰ ਦੇ ਕਮਰੇ ‘ਚ ਜਾ ਕੇ ਕੀਤੀ ਕੁੱਟਮਾਰ, ਦਿੱਤੀ ਜਾਨੋਂ ਮਾਰਨ ਦੀ ਧਮਕੀ
ਨੋਇਡਾ (ਵੀਓਪੀ ਬਿਊਰੋ): ਦਾਦਰੀ ਥਾਣਾ ਖੇਤਰ ਦੇ ਅਧੀਨ ਆਉਂਦੇ ਲੁਹਾਰਲੀ ਟੋਲ ਪਲਾਜ਼ਾ ‘ਤੇ ਲੜਾਈ-ਝਗੜੇ ਦੀਆਂ ਘਟਨਾਵਾਂ ਸਾਹਮਣੇ ਆ ਰਹੀਆਂ ਹਨ। ਇੱਥੇ ਟੋਲ ਕਰਮਚਾਰੀਆਂ ਤੋਂ ਧੱਕੇਸ਼ਾਹੀ ਕਰਕੇ ਗੁੰਡਿਆਂ ਵੱਲੋਂ ਬਿਨਾਂ ਟੋਲ ਦੇ ਵਾਹਨਾਂ ਨੂੰ ਬਾਹਰ ਕੱਢਿਆ ਜਾਂਦਾ ਹੈ ਪਰ ਇਸ ਗੱਲ ਦਾ ਵਿਰੋਧ ਕਰਨਾ ਟੋਲ ਕਰਮਚਾਰੀਆਂ ਅਤੇ ਪ੍ਰਬੰਧਕਾਂ ਨੂੰ ਭਾਰੀ ਪੈ ਰਿਹਾ ਹੈ। ਸਾਹਮਣੇ ਆਈ ਇੱਕ ਸੀਸੀਟੀਵੀ ਵੀਡੀਓ ਦੇ ਅਨੁਸਾਰ, ਕੁਝ ਬਦਮਾਸ਼ ਟੋਲ ਮੈਨੇਜਰ ਦੇ ਦਫਤਰ ਵਿੱਚ ਦਾਖਲ ਹੋਏ ਅਤੇ ਉਸ ਦੀ ਕੁੱਟਮਾਰ ਕੀਤੀ ਅਤੇ ਉਸ ਨੂੰ ਜਾਨੋਂ ਮਾਰਨ ਦੀਆਂ ਧਮਕੀਆਂ ਵੀ ਦਿੱਤੀਆਂ।
ਪ੍ਰਾਪਤ ਜਾਣਕਾਰੀ ਅਨੁਸਾਰ NH 91 ਦੇ ਲੁਹਾਰਲੀ ਟੋਲ ਪਲਾਜ਼ਾ ਦੇ ਟੋਲ ਮੈਨੇਜਰ ਰਜਨੀਕਾਂਤ ਦਿਵੇਦੀ ਨੇ ਦਾਦਰੀ ਪੁਲਿਸ ਨੂੰ ਸ਼ਿਕਾਇਤ ਕਰਦੇ ਹੋਏ ਦੱਸਿਆ ਕਿ ਜੋਖਾਬਾਦ ਦਾ ਰਹਿਣ ਵਾਲਾ ਧੀਰੇਂਦਰ ਆਪਣੇ ਸਾਥੀਆਂ ਸਮੇਤ ਦਫ਼ਤਰ ‘ਚ ਦਾਖ਼ਲ ਹੋਇਆ ਅਤੇ ਮੇਰੀ ਕੁੱਟਮਾਰ ਕੀਤੀ। ਉਨ੍ਹਾਂ ਅੱਗੇ ਦੱਸਿਆ ਕਿ ਉਕਤ ਵਿਅਕਤੀਆਂ ਦੀ ਕਮਰਸ਼ੀਅਲ ਗੱਡੀ ਰੋਕੀ ਗਈ ਸੀ, ਜੋ ਬਿਨਾਂ ਟੋਲ ਅਦਾ ਕੀਤੇ ਜਾ ਰਹੀ ਸੀ। ਇਸ ਗੱਲ ‘ਤੇ ਉਹ ਗੁੱਸੇ ‘ਚ ਆ ਗਿਆ ਅਤੇ ਕਿਹਾ ਕਿ ਸਾਰੇ ਕਮਰਸ਼ੀਅਲ ਵਾਹਨ ਬਿਨਾਂ ਟੋਲ ਟੈਕਸ ਦੇ ਚੱਲਣਗੇ, ਜੇਕਰ ਉਨ੍ਹਾਂ ਤੋਂ ਟੋਲ ਟੈਕਸ ਮੰਗਿਆ ਗਿਆ ਤਾਂ ਮੈਂ ਉਨ੍ਹਾਂ ਨੂੰ ਮਾਰ ਦਿਆਂਗਾ।
