ਟਰੰਪ ਨੇ ਕੈਨੇਡਾ ਨਾਲ ਲੈ ਲਿਆ ਹੋਰ ਪੰਗਾ, ਟੈਰਿਫ ਵਧਾ ਕੇ ਕਿਹਾ- ਇਹ ਝੂਠ ਆ
ਵੀਓਪੀ ਬਿਊਰੋ – ਅਮਰੀਕਾ ਦੇ ਰਾਸ਼ਟਰਪਤੀ ਨੇ ਹੁਣ ਕੈਨੇਡਾ ਦੇ ਨਾਲ ਨਵਾਂ ਟੈਰੀਫ ਵਿਵਾਦ ਸ਼ੁਰੂ ਕਰ ਦਿੱਤਾ ਹੈ। ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਕੈਨੇਡਾ ‘ਤੇ 10 ਪ੍ਰਤੀਸ਼ਤ ਵਾਧੂ ਟੈਰਿਫ ਲਗਾਇਆ ਹੈ। ਉਨ੍ਹਾਂ ਨੇ ਕੈਨੇਡਾ ‘ਤੇ ਸਾਬਕਾ ਅਮਰੀਕੀ ਰਾਸ਼ਟਰਪਤੀ ਰੋਨਾਲਡ ਰੀਗਨ ਦੇ ਭਾਸ਼ਣ ਨੂੰ ਦਰਸਾਉਂਦਾ “ਗੁੰਮਰਾਹਕੁੰਨ ਇਸ਼ਤਿਹਾਰ” ਚਲਾਉਣ ਦਾ ਦੋਸ਼ ਲਗਾਇਆ।
ਟਰੰਪ ਨੇ ਆਪਣੇ ਸੋਸ਼ਲ ਮੀਡੀਆ ਪਲੇਟਫਾਰਮ, ਟਰੂਥ ਸੋਸ਼ਲ ‘ਤੇ ਲਿਖਿਆ, “ਉਨ੍ਹਾਂ ਨੂੰ ਇਸ ਇਸ਼ਤਿਹਾਰ ਨੂੰ ਤੁਰੰਤ ਹਟਾ ਦੇਣਾ ਚਾਹੀਦਾ ਸੀ, ਪਰ ਉਨ੍ਹਾਂ ਨੇ ਇਸਨੂੰ ਵਰਲਡ ਸੀਰੀਜ਼ ਦੌਰਾਨ ਪ੍ਰਸਾਰਿਤ ਕੀਤਾ, ਹਾਲਾਂਕਿ ਉਹ ਜਾਣਦੇ ਸਨ ਕਿ ਇਹ ਝੂਠਾ ਸੀ। ਤੱਥਾਂ ਦੀ ਗਲਤ ਪੇਸ਼ਕਾਰੀ ਅਤੇ ਵਿਰੋਧੀ ਰਵੱਈਏ ਦੇ ਕਾਰਨ, ਮੈਂ ਕੈਨੇਡਾ ‘ਤੇ ਪਹਿਲਾਂ ਹੀ ਲਗਾਏ ਗਏ ਟੈਰਿਫਾਂ ਨੂੰ ਹੋਰ 10 ਪ੍ਰਤੀਸ਼ਤ ਵਧਾ ਰਿਹਾ ਹਾਂ।”
ਟਰੰਪ ਨੇ ਕੈਨੇਡਾ ‘ਤੇ ਅਮਰੀਕੀ ਸੁਪਰੀਮ ਕੋਰਟ ਦੇ ਫੈਸਲੇ ਨੂੰ ਪ੍ਰਭਾਵਿਤ ਕਰਨ ਦੀ ਕੋਸ਼ਿਸ਼ ਕਰਨ ਦਾ ਵੀ ਦੋਸ਼ ਲਗਾਇਆ, ਜੋ ਇਸ ਸਮੇਂ ਟਰੰਪ ਦੁਆਰਾ ਲਗਾਏ ਗਏ ਟੈਰਿਫਾਂ ਨਾਲ ਸਬੰਧਤ ਕਾਨੂੰਨੀ ਮਾਮਲਿਆਂ ਦੀ ਸੁਣਵਾਈ ਕਰ ਰਹੀ ਹੈ। ਟਰੰਪ ਨੇ ਕਿਹਾ “ਇਹ ਪੂਰਾ ਝੂਠ ਕੈਨੇਡਾ ਨੂੰ ਉਮੀਦ ਦੇਣ ਲਈ ਫੈਲਾਇਆ ਗਿਆ ਸੀ ਕਿ ਅਮਰੀਕੀ ਸੁਪਰੀਮ ਕੋਰਟ ਟੈਰਿਫ ਮਾਮਲੇ ਵਿੱਚ ਉਨ੍ਹਾਂ ਦੀ ਰੱਖਿਆ ਕਰੇਗੀ, ਜਦੋਂ ਕਿ ਉਨ੍ਹਾਂ ਨੇ ਲੰਬੇ ਸਮੇਂ ਤੋਂ ਅਮਰੀਕਾ ਨੂੰ ਨੁਕਸਾਨ ਪਹੁੰਚਾਉਣ ਲਈ ਇਨ੍ਹਾਂ ਟੈਰਿਫਾਂ ਦੀ ਵਰਤੋਂ ਕੀਤੀ ਹੈ।
